Ouais mes gins, tout i est dins le titre...

J'ai un souci informatique. J'ai des logiciels d'inregistremint, nettiyache, trinsformation, recodache etc. de sons.

Souvint, si que j'inregistre un son ou eune musique qui dure in va dire un quart d'heure, je chus bon pour attinte un quart d'heure qu'i s'inregistre, avec des tiots dessins qui se mont à l'écran et qui varittent in fonction du signal archu. Après, j'agis chu les tiots dessins.

Et i a un truc qui m'énerfe.... si si, ch'est facilemint possipe... ch'est qu'eune fos que t'as passé 14 minutes du quart d'heure d'inregistremint à surveiller que tout se passe bin, i a comme par hasard un tiot bazar qui ne trouve rin de miux que de s'afficher in bas à droite de l'écran, pour dire que t'as archu un nouvieau messache et qui, surtout, fait un long schboiiiiiinnnnnnnnnggggggggg que t'artrouves tout parel dins tin inregistremint.

Alors j'ai déconnecté tous les sons que j'ai pu. Dins le panneau de configuration, à "sons" tout est à zéro. A "modèle de son" ch'est "aucun son". I a aucune action avec un tiot haut parleur à côté. Tchand que je mets min ordi in route, que je l'arrête et tout cha... silinche total.

Et malgré cha, i a cheule saloperie de tiot bazar avec un carré oranche dessur, qui continue à se lever et à faire schboiiiiiiiiinnnnnnnnnggggggggg à chaque cop qu'i arrive un émile. Je me deminde d'ailleurs si i a nin msn qui fait parel tchand qu'i a quelqu'un qui veut te deminder si cha va...

I a-ti quelqu'un qui saurot commint qu'in fait pour li serrer sin gosier à ch'ti-là ou à cheux-là? Forchémint, si qu'in va dins "configurer" le bazar à Orange, ch'est nin prévu de pouvoir agir là-dessur...

D'avinche je vous armercie si que vous pouvez m'aider à ch'sujet.

Euh, ch'est nin la peine de passer eune nuit blanque là-dessur... vous avez tout vou timps vu que demain au matin je pars in tournée pour quelques jours...

Si t'as des problèmes d'infreumatique, t'as qu'à m'deminder....
T'as qu'a tout débrincher et mette de l'musique dins tin mange dixques comme te fais d'habitute

Pour inregistrer te prinds l'géloso G257 aveuc ses touches in couleur.

Alors là.... te m'in bouches un coin!

Commint que te sais que ch'est un G-257? Je viens d'aller vérifier, ch'est vrai!

mi j'sais cha qui faut faire ! ch'est min garchon qui m'a expliqué cha ! un jour que comme ti , j'm'énervos !

té vas sur msn et t"déconnectes , ch'est simple , hein ?
tellemint simple qu'in y pinse pas

t' as pus qu'à t'arconnecter eune fos qu't'as fini d'inregister !

Ouais, pour msn, ch'est eune manoeuvre que je peux faire sins que cha me gêne.

Mais l'livebox, je ne peux nin la déconnecter, vu qu'i a des fos que mes signaux de sons que j'inregistre is passtent par elle...

j'vas in causer à toni............

Au risque ed passer pour eune vieile.. ch'est m'n'homme qui a réparé des géloso G257 dins eune aut vie.... et y s'in rappelle ! alors j'ai profité qui passot à côté d'mi pour li dminder si ch'étot bin Géloso ches manicraques aveuc des touches ed couleur et cha sintot toudis l'caut... et qu'cha faijot un drôle ed bruit tchin qu'in rimbonbinot ''RITORNO''... et là m'n'homme Y m'a dit qu'ch'étot bin cha des Geloso G257... M'n'homme ch'est quéqu'un d'intelligint, ch'est pour cha qui m'a épousée!

geloso, ch'est l'nom d'eune glache italienne ???

toni i voudrot savoir si t'utilisse l'messagerie d'oranche ou bin si t'as outloock ou windows mail comme bote à émiles ?....
sinon té peux toudis i passer in cop d'fil quind t'arviens de t'semaine de livraison, pace que comme cha que t'espliques i comprind pas bin, alors d'vife vox cha serot miux......

eun' question, t'inregistres quoi et avec quoi?

tiote bellotte a écrit:

toni i voudrot savoir si t'utilisse l'messagerie d'oranche ou bin si t'as outloock ou windows mail comme bote à émiles ?....
sinon té peux toudis i passer in cop d'fil quind t'arviens de t'semaine de livraison, pace que comme cha que t'espliques i comprind pas bin, alors d'vife vox cha serot miux......

Merci pour l'promptitute de t'réponse tiote... et merci à Toni de s'investir là-dedins!

Euh.... je chus désolé mais la messagerie d'oranche j'aime vraimint nin. Du coup j'utilise Mozilla Thunderbird et cha va fin bin. In fait, in configurint la livebox, et comme - heureusemint - elle laisse incore le choix, j'i a dit que l'messagerie à utiliser ch'est Thunderbird.

Donc, tchand qu'i arrife un émile dins l'livebox, elle le passe à Thunderbird qui se débrouille très bin avec.

Sauf qu'in même timps la livebox elle me gueule chu min écran "eh, t'as un émile dins l'tuyau!", ce que Thunderbird me confirme nin longtimps après, avec les noms des expéditeurs et après avoir fait le tri intre les espams et les non espams.

Valavala. J'espère que cha répond à l'question.

Loumarcel a écrit:

eun' question, t'inregistres quoi et avec quoi?

Je ne vas nin te raconter toute m'vie mais, par eximple, i m'arrive d'inregistrer le son d'eune vidéo qui passe chu youtube ou un machin comme cha. Pour cha, i a rin à faire, i faut se taper l'vidéo!

J'inregistre avec Goldwave, mais à m'mote qu'i a plein de programmes qui permettent d'inregistrer. L'avintage de Goldwave ch'est qu'i permet de corriger.... eune fos que t'as dompté le bestiau!

nos nin pus in utilisse pas l'messagerie d'oranche.....
bon j'dirai tout cha à toni c'soir quind i s'ra rintré du traval.... pis vos verrez insonne à l'fin de l'semaine où quind t'arviens si té rintres avint............
passe eune bonne semaine su les routes, fais attintion i paraitrot qu'i va y avoir gramint d'brouillard, ch'est madame météo qui m'a crié cha à m'n'orelle in m'réveillant in sursaut (j'avos du bouger l'bouton du son d'min radio rével sins min aperchevoir )

Hé Batisse, l'son i est sus l'vidéo t'es bin obligé d'passer l'vidéo mais si té cliques sus ch'tit trait un haut à droite té fermes ch'bureau et té va ailleurs et quand t'intint pus d'son t'arva sus tin Goldwave pou arrêter ch'l'inregistemint.
Mi aussi in principe j'ai Thunderbird mais sus l'aut' PC, l'tour qui est toudis amon d'sin méd'cin i devrot pas tarder à arvénir, et j'ai jamais d'problinmes avec Oranch', oranch' m'a jamais annonché qu'j'avos des messach', p'tète que cha a cangé ches derniers temps. Mais in l'configurant j'pinse pas li avoir dit que j'avos Thunderbird.