v'là chi l'deuxième poéme comme promis.
ché toudis de Maurice TONNEAU il a été un tiot peu tronqué (pacheque trop long) et mis à l'trosième personne du singulier pour que j'peuche l'dire ( normal'mint ché un homme qui dit cha...)
in vit dins inne époqu' qui n'est pon ordinaire
ténez, ché dernis temps, dins in hebdomadaire
in vintot les mérit's, les pouvoirs d'un parfum
qui attirot les fimme's comme inn' mouque su du .......pain
i seuffijot d'inn' goutt' pou ête irrésistibe
l'effet produit sur eusses, ch'tot inn' séquo d'terribe!
i l'a commindé in douche sins rien dire à s'n'Elise
car si l'avot su cha, y povot faire ses valises
i avos du à s'majon treuver inn' muche, inn' bonne,
i n'povos pos l'cachi dins les poqu's de s'maronne
après avoir passé inn' goutte d'rrir' chaque orelle
i é parti faire in tour pou épreuver ché belles.
à nou trosième pali in pernant l'ascinseur
i tché su la concierch' v'nant d'z'étach's seupérieurs
comme i n'étottent quà deux, restot quand mêm' de l'plache
mais al' serrot conter li, i sintot sin gros corsache...
li souriot à l'z'anch's...pour l'premir' fos ,mes gins
i a vu qu'au fond de s'bouque y li mantchot six dints!
ch'n'étot qu'les prémis pas, y follot print' patiinche
et y li restot pus qu'à poursuif' l'espériinche...
pou s'mette in condition i a caché in indrot
et dins l'bonn' vill' de Lille i a tcheusi sin métro
inxieux comme in malat' qui s'in va à l'clinique
i a monté l'air de rin à l'station "répeublique"
égaré parmi l'foule avec sin bras in l'air
i attindos l'évén'mint...y a v'nu in in éclair...
i s'a treuvé inteuré par inn' binde ed guernoulles
qui tertous à leu tour vénott'nt li faire des papoulles
i n'savot pus d'ù s'mette, mais n'pouvos pos bougi
mon di! dins tche traqu'nard qu'i s'étot ingagi!
ch'est seul'mint à l'arrêt dé l'"cité scientifique"
que s'artreuvant su l'tchai d'inn' poussée homérique,
mes bonn's gins, i arot brait tous les larmes de sin corps!
tin! rien qu'à y pinser, sin tcheur y bat acor...
ouais i avot eu affaire à des fimm's pickpotchettes,
i n'avot pus d'portéfeull', d'mont' ni d'boutons d'minchettes
li restot pus qu'à rintrer, à pis, sins sou in poque,
i allot pouvoir aller es' faire sonner ses cloques.
i comminchot à comprint' qu'i s'étot fait avoir
i avot tchinss' kilomèt's pou s'in aperchévoir
et adan? dit s'n'Elise, et ch'est à ch'teur' qu'té rintes?
j'té promets, min garchon, et que té vas m'intinte!
et al a ajouti, ch'tot l'prémire à l'sortir:
" je n'sais pos, d'pus quequ's s'main's, mi, je n'sais pus t'sintir.
i l'savot bin qu'es fimm' n'étot pos comme inne aute.
a ch'theure ale l'a dins l'nez, et al n'est pos commote.
qui qu'ch'est qu'y arot pinsé attirer les malheurs
rin qu'inmettant su s'tête inn' pétit' goutt' d'odeur?
MAURICE TONNEAU
mes excuses aux soyeux (si....si... y n'da!!) déjà la prononciation, cha n'a pon été du gatiau, mais, là l'arcopier...ch'n'est vraimint pon facile!!
patois du 59, cha n'est pon ch'ti du 62....