Hier in a été à la plach' ed Palavas avec chés gosses, i avot un solèle ed plomb, j'ai passé presque tout min temps dins l'iau, j'étos bien mais sans min rinte compte j'ai pris un sacré d'cop d'solèle sus min dos , min vinte et m'figure, j'sus à l'biafine à ch't'heure et des douches froites pou ar'frodir m'piau. J'vous dis pa l'nuit qu'j'a passée.
Heureus'mint i fait un peu moins caud aujourd'hui i a des nuach'.

Si comprinds bin, ch'est un' histoire à dormir debout ou assis....vu qu'in dos et d'vinte sont tout rouches !

Ch'a i est, l'orache i est là avec ches trombes d'ieau....cha raffraîchi, ch'est un' douche naturelle pour ti Loumarcel. Allez soigne-te bin al biafine, j'cros qui a des tubes qui doivettent s'vinte al pelle.....

Mi aussi j'ai été eue ! j'bricolos sus m'terrasse à r'peinde des balustrates : y avot un tiot vent qui faisot supporter l'solel, un capieau sus m'tiête j'étos fin bien.
Ah ouais, mais l'soir j'étos rouche fluo dins min dos.
j'ai mis aussi del crème. J'ai pu dormir ch'est déjà cha.

Ben déchidémint... ch'est l'semaine des brûlés.

Mi j'ai fait eune sacrée bêtisse... mardi au matin je chus parti chez Mérilou, du côté de Tours, in mobylette.

Avec les caleurs qu'i a faites, je me chus dit que cha serot peut-être nin superflu de mettre du sint bon dins min caxe et dins mes gints, histoire de mucher les évintuels mauvais sintimints consécutifs - muillerd que je cause bieau - à l'transpiration.

Et comme sint bon, j'ai rin trouvé de miux que de l'ieau de Cologne. Vu que cha ne coûte nin quer, je n'd'ai versé eune bonne rasade dins chaque gant, et eune autre dins le caxe. Aussi sec - façon de parler parce que ch'étot tout fraique - j'ai mis mes gants à mes mains et le caxe chu m'tiête - l'inverse cha n'allot nin - et je chus parti.

Ouais, ben l'alcool à 70 pressé bin fort contre l'pieau de min front, cha l'a brûlée. Pindint 8 heures le supplice i a duré. Et i a rin à faire, i fallot que je roule avec le caxe chu m'tiête... J'ai souffert. A ch't'heure j'arsonne à Gorbachev.

In plus bieau, infin je trouve...

Mais bon, cha va déjà miux. J'avos passé min pestaque des fux d'artifice à éponger le jus qui coulot avec min tire jus. A ch't'heure i n'a pus de jus qui coule. Je chus arvénu à m'majon avec eune compresse chu min front. Les ginses is m'arwettiottent tout drôle eune fos que j'inlevos min caxe...

Promis juré, je ne le ferai pus!

vaut mieux sintir l'transpiration alors,
enfin, pas trop quand même.
t'as dû déguster ch'est sûr

Hé bé tcheu jeu... tertous y cauffe aveuc l'soleile. In dit qui faut mette un capiau pour s'protéger et y n'd'a qui mettent du sint bon dins leur casque.
Pourtint, nous z'aut in est habitué au fumet naturel ed'Batisse. Aveuc s'n'odeur ed Cologne in dirot un vrai viu.
J'sus témoin du dallache... Hé bé qui est laid à ch t'heure! eune terreur pour mes tiots afants qui n'avottent jomais vu leur mononque in lambeaux. A ch't'heure y arsimpe à Gorbatchev mais in pu modeste: au lieu d'avir toute l'carte du monte su s'tiête, Batisse y s'artrouffe aveuc foque el carte de la Réunion su sins front...mais in tros diminsions aveuc el volcan qui guille!!!!
In avot mis un tupe ed mitosyl su l'taff qui fallot nin confonte aveuc de l'mayonnaisse.

Bléssé au front y va mériter eune médale.

Y n'est pos resté lomind à m'majon Batisse, in li a mis des berlouffes autour de s'tiête pour aller à sin lit...

J'va nin faire em mariole, vu que j'a été nin très sache non pu. Diminche in a vindu un tas d'vieuseries à la brocante ed min villache ( mais Batisse y'étot pas cor là) et j'ai attrapé aussi un coup d'soleile in dessous de not parasol.

J'avos mis un collier aveuc un cordon et un berloquant in noix d'coco et bin l'soir j'avos l'trace toute blanque aveuc l'pieau rouche autour...
J'va m'excuser au passache de nin venir gramind su l'foroum à causse ed l'ouvrache, mais min tcheur y buque toudis aveuc vous z'aut tertous.
J'souhaite des bonnes vacances aux ceuss qui in prennent et l'meilleur à tertous et sin quien.

L'piau blanque ch'est là qui restot un tiot peu ed lait d'coco.

Aujourd'hui in a été vire toudis sous l'solèle les cascades ed Sautadet à côté ed La Roque sus Céze, bin ch'est à vire, mais pas après in orach' hein!

t;Loumarcel"Aujourd'hui in a été vir les cascades ed Sautadet, bin ch'est à vire, [color=Red]mais pas après in orach' hein![/quote]

Quo qu'ch'est qu'i nous raconte incore eune fos le boyau rouche? Après un orache, i a puq d'ieau. Donc eune cascade - que normalemint ch'est de l'ieau qui quet - cha serot, dins m'logique à misaute, plus pestaculaire tchand qu'un orache i li amène grammint d'ieau à déverser.

Eh ben Marcel i préfère les cascades qui font un tiot pipi, avec quelques algues toutes vertes.

Quo qu'ch'est que t'as incore voulu dire et qu'in a nin compris?

Ouais j'me comprint, et j'va essayer d'esspliquer :

passe que après chés cascates i a des marmites, des labyrintes etc... et quand qu'i y a des gros orach' in amont et que l'niveau i monte vite i a pus trop d'cascates, tout est noïé, i a déjà eu des morts (des parisiens) et minme un pompier qui voulot sauver quelqu'un.
Cliquez chi d'sous:

https://www.youtube.com/watch?v=_OkKpanEsoE

et pinsez à s'que cha peut faire avec gramint pus d'iau après un orach' et ch'est bin pus long que s'qu'in vot.
I a d'aut' vidéos sus You tupe vous ravis'rez.

j'viens d'aller vire, ch'est bieau, j'imagine quanque y a plus d'ieau, et l'bruit cha dot ête impressionnant.

pour être impressionnant,ch'est imptressionnant!
té t'vos faire du canoé la d'dins!!

ah non, pas là.
Souvint les vacanciers n'connaichent pas l'danger.
In cas d'orache, cha arrive vite l'ieau !
Ch'est parel dins les gorges du Tarn. Y a d'belles tiotes plaches pour s'installer bronzette, pique nique, in installe inne toile ed'tente et pis quanque l'pleuffe ale arriffe i sont pris au piège.

la clo a écrit:

in installe inne toile ed'tente et pis quanque l'pleuffe ale arriffe i sont pris au piège.

Is ont qu'à printe des tintes que l'frotture éclair elle se coinche nin tchand qu'elle est mouillée. Non?

ch'est cha, te fais partie ed ceusses qui n'comprennetent pas du premier cop ! alors j'esplique.
J'ai voulu dire qui sont pris au piège de l'plache qui n'in est pus inne. Tout y est inondé, tout plein d'ieau partout ....

Ah valà... Donc, pour aller faire du campinge par là-bas, i faut printe eune tinte avec le matelas pleumatique cousu dessur.

Ch'est nin cha qu'i a comme radeau de sauvetache dins les avions?

Ch'est peut-être aussi de l'hausse subite du niveau d'ieau qu'elle vient l'expression "le mou Tarn monte à min nez". Quo que t'in pinses, ti que t'es de là in bas?

A part cha, je n'arsonne pus à Gorbachev. J'arsonne à Berlusconi.

J'explique... hier j'ai fini par me décider à tonte min gazon, vu qu'i avot des cruauds de 50 cm de haut qui déhuttottent et que cha faijot incore plus laid que d'habitute.

J'avos mis un bieau bob chu m'tiête, pour nin l'brûler incore puq.

Et comme i faijot rudemint caud, j'ai sué comme un boeu. Et eune fos que j'ai eu fini j'ai pris eune serviette éponche et j'ai essuyé m'tiête, sins pinser à l'brûlure à min front... Du coup l'serviette éponche elle a immenée avec elle l'croûte brune Gorbachévique, pour laichi à l'plache eune bielle pieau rose, qu'in dirot un baiser de guernoule avec grammint de rouche à lèvre.

Ch'est pour cha que je dis qu'à ch't'heure j'arsonne plutôt à Berlusconi...

Vous coperdez?

ouais j'sus là ! j'ai compris, maintenant l'Italie après l'Espagne et l'espagnol
dis me t'es bronzé quemint avec tin bob sul tiête t'es bronzé "in rond?"

Je chus bronzé dins min cou. Et toc!

Tchand que je m'arwette dins l'glache sins quémiche, in dirot que je chus habillé. J'ai comme qui dirot un ticheurte blanc avec des drôles de manques... I a eune couleur pâlotte du mitan du biceps jusqu'au coude et, du coude aux mains ch'est plus foncé. In puq, comme j'ai souvint mins bras gauche au cassis, i est plus coloré que l'autre. Et in vot bin l'trace de l'montre.

J'ai à ch't'heure min crâne plutôt blanc, vu que je me déméfie des cops de solel là-haut, que cha pique et que cha pèle comme les viux de l'hospice, avec m'trace de rouche à lèvres posée par eune bouque bin lipue chu min front.

Miux vaut que je reste muché... un armète contre l'amour batisse!

. Vénez dins l' Pas d' Calais mes gins, à Beurck, jamais un cop d' solèle,..........infin, presque jamais. .
. ( Eune écrevisse cha dot ète un équerchin ? ? ?)

bin nosautes in arvient d'avoir passé 2 jours chez m'bielle mère à Perpignan d'ù qu'in est resté au frais dins l'majon, vu que quind in va là bas ch'est pou profiter de m'bielle mère qui n'sort pus sauf pou s'occuper d'sin gardin, pis après in a passé 3 jours vers Avignon d'ù qui faisot eune caleur - 39°- que même les gins d'las bas is s'plaignottent..... pis quind j'avos réservé là bas j'ai pus pinsé qu'ch'étot in plein pindant l'festival, alors i avot in monte fou c'qui fait qu'in a putôt visité les alintours d'Avignon pace qu'eune jornée dins l'foule cha a suffit à not' bonheur, j'ai quind même été guincher su l'pont et visiter l'Palais des Papes....
in a pris d'bielles couleurs mais pas d'cop d'solel....

au fait mes gins méfiez vos avec l'Biafine, normalemint quind in in met in n'dot pas exposer au solel l'indrot "pommadé" pindant 48 h.... ch'est eune des cosses qu'in apprind quind in fait l'formation aux premiers secours

ah! bon, j'ai jamais intindu cha, j'ai donc fait s'qui fallot pon.

. Ch' est dingereux l' solèle ! ! ! Imagine un peu un nudisse qui prind un bain d' solèle couqué d' sur sin dos! ! ! Un cop d' solèle la d' sure et v'la l' créateur hors d' usache pour eune coupe eude sémaines ! !

ouais Loumarcel i paraitrot qu'cha infreume l'leu dins l'bergerie comme in dit...

j'ai in tiot consel pou Batisse :
l'prochain cop au lieu d'mette de l'ieau d'cologne mais du sint bon spécial bébé, sins alcool d'dins cha évitera qu'té arsonnes à Gorbachev, imagine, avec cha té arsonneros putôt au bébé Cadum qui est quind même pus bieau à raviser que Gorbachev !