Cha fait plusieurs cops que je vous cause de gins que j'ai rincontrés et que je trouve assez extraordinaires. Je dos avoir gardé eune âme d'afant...

Incore ch'ouaiquenne, j'étos à eune sortie du clup de mobylettes, à Thiers, et ch'étot organisé par un gars hors du commun à bin des égards.

Ch'est un incien grind cuisinier - qui avot eune étoile au guide michelin - qui s'a arconverti dins l'coutellerie, cha qui n'a rin à vir avec sin précédint méti. Pour cha i a acaté eune incienne fabrique et i l'a armise in route. Et cha marche du fu de diu. I a opté pour le tout haut de gamme.

Au beau mitan de l'atelier, i a installé eune cuisine et, li le patron, tous les midis i fait à minger pour ses ouvériers. Et je peux vous assurer qu'i n'aime nin l'à peu près bon...

Je ne chus quind même nin le seul à m'émerveiller ainsi de gins hors du commun que je rincontre ichi ou là.

Je seros curieux de connaître vous expérienches à vousautes dins ce domaine. Qui vous avez rincontré dins vous vies, qui vous a marqués, et pourquo?

D'avinche je vous in armercie.

Je me deminte si qu'i n'd'a qui vont parler de lu conjoint(e)...

J'pourros bin sur vos parler d'min tiot mari, mais j'vos déjà l'mine réjouie d'Batisse in train d'dire : "j'in étos sur, ah chés guernoulles !"

Non j'vos parlerai d'mes amis musiciens, membres du quintette d'clarinettes qui font asteur partie de m'famile...
J'vos plante l'décor : j'rintre dins l'bureau d'vote lors des élections municipales, le maire in exercice vient direct vers mi et m'dit : "ah, madame tiote bellote, mon beau frère et un ami veulent remonter un ensemble de clarinettes et ils cherchent une clarinette basse, ils souhaitent vous rencontrer" (faisant déjà partie de l'orchestre, l'Maire me connaichot)
Mi j'me troufe tellemint surprise que comme i s'pinche vers mi, j'cros qui veut m'faire eune baisse et j'y plaque un baiser su c'joue, imaginez l'tableau, li surpris et mi rouche d'confusion in train d'bafouiller, tout cha dins l'bureau d'vote bin rimpli...
j'in auros presque oblié d'aller voter !
Bref eune fos armise d'mes émotions, j'comminche à busier et à m'dire que j'pourros jamais juer avec des musiciens confirmés, mi qui est comminché l'musique à 35 ins.... j'in parle à ma prof d'clarinette (j'prenos cor des cours à cheule époque) et elle me fait armarquer qu'elle connot chés musiciens et que j'peux toudis aller les rincontrer, que cha n'ingache à rin
Me vl'a donc un samedi matin, toute timite (si si ch'est possipe !) in train d'faire l'connaissance d'gins formidapes qui m'ont accueillie in toute simplicité, qui ont fait preufe d'gramint d'patienche (et qui continuent à avoir gramint d'patienche), qui ont adapté certaines partitions pou qu'cha seuche pus facile pou mi
Cha fait maintenant eune dizaine d'année qu'in jue insonne mais dès l'départ in aurot dit que j'les avos toudis connus
in est inter génération car in a, 81, 64, 54, 38 et 23 ins (l'tiote dernière nos ayant arjoint i a 3 ins)

ch'est vrai que des fos i a des rincontres qui cangent eune vie

juste eune remarque,sur el sujet ed tiote belotte.les musicos sont tous des gins remarquables et sympatiques cha m'ai arrivé ed juer avec des pros mi qui su qu'un amateur, j'ai toudis été bien accueilli.