Salut les gins. Je l'ai fait mi-même ch't'aprème, alors que j'ai du bricolache à finir...
Pour eune fos ch'est nin de l'poésie trisse. Infin je pinse...
Si que cha vous plait, ch'est bin.
Allez, accrochi vous à l'rampe, ch'est ichi que cha comminche...
Le bain marie
Voilà ichi eune invintion
Qui rind service aux marmitons
In fait plutôt aux marmitonnes
Aux obsédées de la mitonne.
Le bain marie, rin que sin nom
I fait sourire même les crinchons.
Tout un bazar pour cuire dins l'ieau
Un tas de séquos qui n'aimtent nin le caud.
Pourquo marie, ben je vas vous l'dire.
Cha armonte loin, plus d'deux mille ins
Tchand qu'un tiot couple étot dins l'brun
A cause d'un tiot prêt à venir.
Li étot brave, comme un chtimi.
I savot bin que s'tiote amie
Avot fait le tiot avec un autre
Mais i l'aimot, surtout s'popote.
Ch'étot des pauvres. Pour le minger
Et la lessife et se laver
I avot qu'un gaz à un brûleur
Qui pour cauffer mettot des heures.
Du coup Marie, ch'étot sin nom,
Avot créé eune invintion.
Dins un couet i avot de l'ieau caute
D'uche qu'elle trimpot, un truc qui flotte.
L'ieau caute du couet étot bin caute
I avot qu'à l'printe, à l'louque ou autre
Pour faire du jus ou laver l'linche
Et rerimplir avec patiinche.
Li n'aimot nin tous les séquos
Qu'in cuit à l'ieau, surtout qu'au fond
Faire les carreaux au court bouillon
Cha ne fait nin des propres carreaux.
Alors s'guernoule avot pinsé
Faire le minger dins un tiot pot
Qui surnageot sin tchul au caud.
Pour mijoter ch'étot assez.
Et un bieau jour le tiot a v'nu
I faijot frod et le gynéco
Venu à pids dit cré vain diu
Je mingeros bin eune séquo de caud.
Cha tombot bin, i avot toudis
Eune visse séquo qui mijotot
Dins le tiot pot au tchul dins l'ieau.
Ch'jour-là ch'étot du libouli.
I n'd'a mingé et fut saisi
Ch'étot fin bon, i étot bénache
Et a demindé au jeune ménache
Lequel des deux faijot le mingi.
Oh ben Marie! qu'i a dit Joseph,
Le gynéco s'in a rappelé
In a causé aux accouchées
Et ch'est à ch't'heure chu toutes les lèfes.