Dins eune école élémintaire, i a des tiotes guernoules qui comminchtent à printe des menoules de guernoules. In particulier elles se mont du rouche à loupes.
Jusque là ch'est nin trop grafe, à part qu'elles ont pris l'habitute de faire des baisses chu les miroirs, pour y laichi l'trace de lu passache.
Et l'guernoule de ménache - je ne vous arpose nin le question de savoir si que ch'est un pléonasse - elle a eune masse de misère à inlever tout cha. Elle in parle au directeur de l'école, qui fait eune tiote affiche avec écrit "définse de laichi du rouche chu les miroirs" et, forchémint, cha suffit pour qu'i n'd'ait incore puq à l'fin de l'journée.
Alors l'guernoule de ménache - chut... - elle deminte au directeur de s'expliquer elle-même avec les tiotes. Pour cha i faut qu'i les rassimble.
Donc réunion au niveau des ouaters, d'ùche que l'guernoule de ménache - re chut... - elle explique aux tiotes que ch'est bin gintil de faire des baisses chu les glaches, mais que cha li fait eune masse d'ouvrache pour ravoir les traces de rouche.
D'ailleurs, qu'elle lu dit, je vas vous moutrer commint que je fais et vous verrez que ch'est nin de l'tarte.
Elle prind eune berlouffe, elle la trimpe dins l'cuvette d'un ouater, et elle comminche à frotter.
De ch'jour-là i n'a pus eu de trace chu les glaches...