D'jà min cat a sauté su min bieau coufe lit blanc avec chés pattes toutes crutes alors qu'j'étos cor couquée et qu'i sait très bin qu'i n'a pas l'drot d'grimper su ch'lit... incor heureux qu'i m'a pas déposé eune souris ou un mulot, vu qu'in c'momint i est dins s'période d'chasse et qu'i nos ramène des trophées tous les jours
Pis comme i pleut à verse et qu'chés routes sont rimplies d'flaques j'me sus fait trimper m'longue maronne et mes cauchures par in camion qui roulot trop prêt du trottoir et qui m'a copieusemint espité
Pis j'viens d'faire querre eune quemiche avec tous chés papiers qu'j'ai passé deux heures à tout classer hier après midi.... j'me disos bin qu'i valot miux y ringer dins un classeur !!!
Et pou couronner l'tout, c'soir in a eune répétition très importante à l'orchestre et in lisant mes émiles j'ai d'jà pusieurs défections alors qu'in a dit et répété qu'i fallot faire sin possipe pou ête présent et qu'cha fait deux mos que tertous est prévenu.... à quo cha sert que j'me décarcasse à invoïer des messaches et faire des tiots papiers ?
j'vos l'dit j'sins qu'cha va ête une jornée d'brin... et i est foque 9 h 30....

AH ti aussi t'as des russes aveuc cheusses qui viennent' pon à ché répétitions? mi j'les claqueros à mur des fos (foque que quand ché vraimint pou dl'i'mportant)

Waouh! L'air de rin, i faut s'in déméfier de cheule-là... ch'est qu'elle mordrot!

Bon, alors, la limassonne, commint qu'elle s'a finie t'journée de brun? In joque de savoir. I a du suspince... d'autint que t'as incore rin dit aujord'hu. T'es nin malate au moins?

camanette a écrit:

AH ti aussi t'as des russes aveuc cheusses qui viennent' pon à ché répétitions? mi j'les claqueros à mur des fos (foque que quand ché vraimint pou dl'i'mportant)

ouais des cops i a des margnouffes qui s'perdent !!! même des cops pids au c__ !!!

batisse a écrit:

Waouh!
Bon, alors, la limassonne, commint qu'elle s'a finie t'journée de brun? malate au

bin not chef i étot bin énervé, in intindot les mouques voler ! à doupe titre pace qu'in avot des nouvielles partitions et min diu, seigneur marie joseph, je n'd'ai pas juer gind cosse tellemint ch'est dur et j'étos pas la seule... des partitions avec 6 bémols, suivies de 4 dièses pindant 10 mesures, pou arvenir 5 mesures pus loin à 4 bémols et ainsi d'suite !! d'quo s'mélinger chés pincheaux et chés dogts !!! in s'deminde à quo is pins'tent chés arringeurs...
in a eu des rudes suées ch'est mi qui vos l'dit !!!

[quote="batisse"
d'autint que t'as incore rin dit aujord'hu. T'es nin malate au moins?[/quote]

nin j'sus pas malate, j'ai bin digéré cheule répétition d'orchestre d'brin d'hier au soir mais au matin j'avos répétition d'quintette d'clarinettes jusqu'à midi....
pis là j'ai c'ménache à faire, mes cassis et carreaux à nettier après avoir mis chés rideaux dins l'machine... bin ouais ch'est l'ménache d'printimps, pis surtout j'ai du courache alors faut in profiter !

bin dis donc , que tout des bémols , des diesses , des noires et des croches , tout cha mélingé cha donne quoi , in cacaphonie ,
ech' pauf cat yétot si contint d'artrouver s'patronne , qu'ya oublié d'essuyer ses pieds , té l'prinds par es queue , té l'fait tourner dix coups avant d'el lacher par el fenête , ( OUVERTE )

normalemint bin jué cha devrot donner cha :
https://www.dailymotion.com/video/x800w2_music

ch'est le largo de la "symphonie du nouveau monde" de Dvorak, que ch'est eune pure mervele (quind ch'est bin jué ! ), bon évidemmint nos in est pas l'philharmonique de Vienne, in fait avec c'qu'in a et avec l'arringemint qu'in a... in a jusqu'in juin pou travaler l'partoche

Hé bé, pauff Tiote, et si que te serros tes ys comme si t'avos nin vu tout ches bemols et pis ches diesses.. n'fais pos d'menoules aveuc tout cha... té rajoutera queques bémols in avril et pis les diesses in mai et te sera fin prête in juin.
Quo qu't'in pinche?

Ben je vas vous dire min avis tel que min tiot tchoeur i le pinse.

Au début je m'a dit "vinguette, pour juer cha i ne faut nin de romatique dins ses dogts - ou alors i faut faire chef d'orchesse. Z'avez vu comme i a ses dogts crochus ch'ti-là?.

Pis après, cha ralintit un sacré cop et cha m'a fait pinser à un western - normal pour eune musique du nouvieau monte énon? - tchand qu'i a du suspince, que le bon tout seu avec ses tiots ys bleus tout plissés i marche avec ses guimpes arquées juste cha qu'i faut vers l'indrot d'un duel contre les mécants, qui ont venus à grammint in crachint lu jus de chique par tierre, sous l'oeul de l'chérie au bon, qui arwette tout cha derrire un rideau in serrint sin tire jus dins s'main contre s'bouque vu que, malgré sin jeune âge, elle bafile déjà.

Pis après je me suis dit que le chemin vers l'indrot du duel i devot être rudemint long, vu que cha ne raccélère pus et que cha tourne à l'guimauve et que ch'étot nin la peine de faire autint d'esbroufe au début. Alors j'ai arwetchi les musicienciennes et j'ai vu qu'i a personne qui n'arwette sin chef, que les trombonnes is ne sont nin d'accord intre eux (i n'd'a qui saqtent tchand que les autres is pousstent) mais que finalemint i a fort à parier que les gins is ont quind même applaudi à la fin.

Alors tiote, à ch't'heure que t'as l'avis du public, je te suggère de suggérer à tin chef d'oublier un tiot peu le début qui va à tout berzingue, de se concintrer chu l'partie "approche du duel qui ara peut-être lieu un jour" et pis ch'est marre, même si que, sins le début qui révelle, les gins is risqtent de s'indormir plus tôt.

A la fin vous faites distribution de café pour réveiller tertous et vous verrez qu'is seront bénaches.

Ah ouais, pis aussi, habillez vous chef in cowboy, comme cha i n'd'a qui l'arwettront quind même...

Infin bon, te me connos hein. Je dis cha, je ne dis rin!

mes gins!
si ch'est ti qui fait l'partie d'solo,ch'est vrai que ch'est nin évident,mais té vas i arriver!!
ya un proverbe qui dit,
_quand in veut! in peut.
bonne chance quand même.

Mais oais qu'elle va y arriver Tiote Bellotte! Au début, y'a d'quo in perte el nord, vu qu'cha arsimpe à eune musique provencale, aveuc des tiots santons et pis après ch'est fin bieau, nous in cantot chu c't'air là dins l'chorale.
In tus les cas, y z'ont tertous l'air mache su l'vidéo, et y z'hochènent leurs tiêtes comme si qui z'étottent in colère.
Te va savoir faire cha aussi Tiote?

ouais mes gins ch'est vrai que le mouvemint i est lent, heureusemint d'ailleurs, si chés bémols is étottent que su des noires cha irot mais in peux quind même avoir des doupes croches dins in mouvemint lent, et l'difficulté elle est su l'nompe de notes différintes et qui s'suiv'tent pas forcemint qui a dins l'bazar....
pis ch'est pas l'seule partition comme cha, in dot juer "west side story" aussi, et cha, cha va vite, in l'a pas cor déchiffrée mais j'vos raconte pas l'dallache qu'cha va ête ..... le chef a préféré attinde que l'effectif i seuche au complet, i avot pas invie de s'faire des noeuds à l'estomac ....