Mi? Un briseux de tarte? Nous évlà avec eune recette à l'pâte brisée alors.
Bon, je fais comme si que je me linchos...
J'ai mes 6 oeufs, mes 200 grammes de beurre et min demi paquet de levure.
Je rimplis un bol de lait (un demi litre), je le mets à tiédir un tiot peu au four micro ontes et je mets là-dedins la levure et un tiot peu de sucre. In va dire 3 carrés.
Au bout de combien de timps je considère que l'essai i est loupé et que cha ne montera jamais? Quo que je fais si que cha ne monte nin?
Bon, supposons que cha monte...
Je prinds 3 ou 4 oeufs, selon m'n'humeur, et j'in inlève le djaune. Avec les blancs qui restent, je fais des blancs in neiche. Cha je sais faire... Les djaunes je les mets dins un pipperouare pour plus tard.
Après, je mets chu l'taffe inviron 500 grammes de farine mais plutôt moins vu qu'i faut rajouter le reste à la fin. Bon, allez, j'in mets 400 grammes.
Là dessur je mets m'plaquette de beurre que j'in ai inlevé un bout de 50 grammes, mes blancs in neiche - is vont résister? - les blancs qu'in n'a nin battus in neiche, les jaunes, le cognac - un tiot cop au goulot aussi? - et cha qui a monté dins le bol et qui n'a nin passé au-dessur.
Et in pétrit et in pétrit ét in pétrit pour bin étaler le beurre dins tout cha, tout in rattrapint le lait levuré et les oeufs qui veultent se sauver. Là, allez savoir pourquo, in dit que ch'est pas de l'tarte!
In peut réajuster à l'farine que ch'est écrit. Donc si que ch'est trop liquite in rajoute de l'farine. Si que ch'est trop épais, euh, in rajoute de l'ieau ou du lait. Ou du cognac? Naaaan!
Eune fos que j'ai eune bielle boule à l'bonne consistince, je la mets au tiède eune demi journée. Après je pinse que je fais comme dins les pizzérias: 3 boulettes avec de l'farine alintour et j'étale et je plache cha dins mes 3 moules (l'première fos, je n'd'acaterai deux avint de commincher vu que pour l'instint je n'd'ai qu'un dont je ne me sers d'ailleurs nin grammint...). A tout hasard, je vas mettre du burre chu les moules...
Et j'attaque l'crème. Là, j'ai un tiot peu honte, mais je ne chus nin sur d'avoir compris l'logique du bazar... i faut 2 litres de lait, cha ch'est clair, Marie. Cha qu'in fait avec, cha l'est moins... in a là eune liste d'ingrédiints qu'in nous dit que dins deux paquets de crême patissière i a l'mitan de tout cha qu'i faut. Donc in a le choix: in met tout cha qu'i faut, ou l'mitan de tout cha qu'i faut, sauf le lait qui dot rester 2 litres, et deux paquets de pourette de perlin pimpin qu'in mélinche avec.
Pour mi, vu que dins deux paquets de pourette i a l'mitan de tout cha qu'i faut, si qu'in met 4 paquets de pourette, in a deux fos l'mitan de tout cha qu'i faut. Donc in a tout cha qu'i faut à part 2 litres de lait et in peut armettre les oeufs, l'farine et l'chuc à l'pinte (ch'est quo, du chuc in poute?) à lus plaches.
Finalemint in obtient de l'crême dite au libouli, mais que pour l'instint le lait i est cru et mélingé avec tout le reste, frod.
In met cha dins le four qu'in a fait cauffer plus qu'i fallot pour que l'tarte elle soche bin saisite. Et comme i a 3 tartes et foque 2 grilles au four, un fait un montache avec un quatrième moule qu'in met à l'invers au fond...
Ch'est bin tchand que cha brûle... pour mi cha ne devrot nin être un problème
Valà. J'abindonne l'idée de cachi un tiot pincheau pour passer un tiot peu de djaune d'oeuf mélingé à du café chu l'tranche de l'pâte au bord du moule, vu que ch'est trop étrot pour m'patiinche.
J'ai tout bon là? J'ai comme un doute. In tous les cas, j'ai suivi l'arcette à la lettre.
Sacrées guernoules, vous ne pouvez nin vous imaginer comme ch'est dur pour les hommes de suivre eune arcette écrite par eune guernoule, que cha soche lu mère, lu tiote amie, lu femme, lu bielle mère, lu file ou des collègues de traval.
Mais in vous aime bin quind même. Ch'est tellemint bon tchand que ch'est vous qui le faites à vous mote, in utilisint toutes les séquos qui ne sont nin écrites "mais que tertous i sait cha alors ch'est nin la peine de l'mettre".
Allez, je vous fais eune baisse à tertoutes pour la peine
.