Cheule année in dot arfaire nous cartes d'identité.
Nos vl'a partis samedi après midi pour aller faire nous photos. J'pinse que vos savez qu'asteur in a pus l'drot d'sourire su les photos des papis officiels, limite in dot faire la g---e ! (comme chés mannequins tas d'oches su les podiums).
In arrive chez l'photographe, in tiot jone homme d'eune vingtaine d'années, tout bieau, tout frais, me dit qu'i faut aussi qu'j'artire mes leunettes, et mes boucles d'orelles (bon j'avos des grindes boucles d'orelles qui berloquottent, alors cha j'veux bin) mais mes leunettes !!! quoque qu'is vont pas invinter l'prochain cop !!! J'porte des leunettes d'pis l'âche d'6 ins et sins elles comme j'sus myope comme eune taupe, j'vos pas à 5 m et j'ai tindance à faire eune drôle d'tiête ! bref in fait les photos et l'tiot jone me deminde si j'veux les vir.
Et là mes gins, le choc de ma vie !!!! HORRREUR, mais qui ch'est cheulalle que j'me sus dit, i s'a trompé l'tiot jone i m'a fait vir les photos de l'mamie qui est v'nue avint mi, ch'est pas possipe autremint !...
J'm'arconnos absolumint pas, in dirot eune arpris d'justice.... avec eune tiête parelle quind j'vais vouloir prinde l'avion au mos d'avril, is vont jamais m'laisser passer, is vont arcacher dins leu' fichiers du grind banditisme, ch'est mi qui vos l'dit ! In pus in dirot qu'j'ai au moins 10 ins d'pus, is vont jamais m'arconnaite !
Alors à quo cha sert d'avoir eune carte d'identité avec eune photo qui n'arsonne absolumint pas à l'personne ???
Quind à min homme, pou li pas d'problème, in l'arconnot bin ! pfffff !
Ben, j'm'in sus par cor armise ! du cop pou fêter cha, j'ai payé l'restaurant à min homme... faut qu'j'in profite tint que j'peux cor circuler normalemint !

Bienvenue au clup tiote! Ch'est un autre arpris de justice qui te salue.

T'imagine ichi si qu'in arrivint chez les étasuniens le douanier i te deminte de te démaquiller, d'avoir tes cavux toutoules etc. pour être aussi moche que possipe....

Si qu'is étottent logiques avec eux-mêmes, vu qu'is font inlever tes leunettes tchand qu'in n'd'a beso, is devrottent aussi faire inlever les fausses dints et les moumoutes.

Je ne sais nin pourquo is nous font saquer des tiêtes ainsi. Peut-être pour nous arconnaître si jamais in nous trouve morts.

Infin bon, l'plupart du timps in est vivints tchand qu'un flic ou un douanier i nous deminte nous papis. Pis si te meurs dins un attintat ou un mache accidint d'auto, ch'est jamais que t'tiête qu'i a chu l'photo, et elle risque d'être esquintée.

Mi je proposse qu'in mette aussi l'photo des gins tout nus, de dos, de face et de profil.

N'importe quo.

Euh... te pourros nin nous la scanner ta photo d'arprisse de justice? Histoire de rigoler un tiot peu.

Promis in in fera bon usage....

inl'ver ses leunettes pour faire eun' photo d'idintié! bin vlà chi aut' cosse! cha s'rot des leunettes de soleil,là! j'dis pas.
et sur tin permis d'conduire, si té portes des leunettes,in t'oblige de faire eun' photo avec !

t'en savo pas incor cha Batisse? quand j'ai fait arfaire l' miene parce qu'in m'avo volé pes papiers
mi cha cor été pire j'avo attrapé des boutons. ché à-dire que j'avo attrapé eune maladie soit disant d'après l' dermatho qui a disparue d' pis 20 t'ans(la preufe) à cosse des infiltrations. parce qui a d'el cortisone.et cha t'inlève des immunités in diro un lépreux.si ej met l' photo such' site vous allez vous sauver in courant.

Bon j'vos que j'sus pas la seule à faire peur (su l'photo, pace qu'in naturel.... )
Vos imaginez dins eune dizaine d'années quind tertous ara arfait chés cartes d'idintité ou passeports, in va tertous avoir des tiêtes d'zombis...
J'plains chés douaniers, is vont faire d'sacrés cauchemars, cha vaudrot bin eune prime de risque pou non sommel réparateur !

Récemmint j'ai arfait min permis et ch'coup-ichi j'ai pu garder mes leunettes et esquisser l'ombre d'un sourire. L'préfecture elle n'a rin dit. Du coup je chus un tiot peu moins laid que le coup d'avint... pour 2 ins!

batisse a écrit:

Euh... te pourros nin nous la scanner ta photo d'arprisse de justice? Histoire de rigoler un tiot peu.
Promis in in fera bon usage....

Même le scanner i n'a nin voulot d'ête complice de cheule abomination ! i m'a arjeté m'photo et tertoutes leumières ont clignoté rouche !

Eune de mes amies m'a fait armarquer quind j'y ai fait vir l'photo, que pou Halloween j'aros pas b'soin de m'déguiser...
heu ! ch'est eune amie finalemint ?

Citation :

quind j'y ai fait vir l'photo, que pou Halloween j'aros pas b'soin de m'déguiser...

A ch'point là!!!
té rigoles quand même...

bin, té sais j'cros qu'i vaut miux in rire !

met nous eune photo tiote belotte in t' dira s' qu'in in pinse.
t' bile pas in est pas es moqueux d' gins.

Bon pisque vos insistez, mais j'décline toute responsabilité dins vous éventuels cauchemars

cha t'va comme in gant el coiffure in pétard,y parait que ch'est la mode

té belle Adèle