"Cha y est, mes gins, les v'la qui r'viennent
Les colporteux d'calindriers !"
Hier soir l'premier spécimen
A moutré s'nez dins no quartier.
In est toudis un peu surpris
D'intinte à l'brune, toquer à l'porte,
D'vir un grand gaillard, dont l'képi
Dégouline d'ieau sus s'bleuse capote.
Soudain, ch'est l'vérité toute crue.
Ch'est l'évidince personnifiée.
L'saison des étrennes est r'vénue...
V'la l'calindrier des pompiers !
Jamais farcés les gars du feu !
Fidèles aux pleufes d'automne.
Vous m'direz, ch'est l'métier qui l'veut,
Ne r'grettons pas les sous qu'in donne.
Tous l'z'ans, ichi, dins no villache,
In a l'drot à l'série complète.
D'el Poste in cujit l'belle imache
Avec tous chés saints, toutes les fiêtes.
Arrivent aussi chés brafes boueux
Immitoufflés dins leu casaques,
Et d'leu grosses mains sont bienheureux
D'nous faire don d'leu almanach.
Derrière es'comptoir l'épicier
Fort soucieux d'vinde es'marchandise,
Offr'el banal calindrier,
Mièleuss' réclame ed' pain d'épice.
Unis comme deux larrons in foire,
Ch'ti d'La Redoute et des Trois Suisses,
Eux, s'mettent in quate pour nous avoir
Jusqu'à l'dernière ed' no quémisses.
Et cha s'impile ! Et cha s'intasse !
N'oublions pas ch'ti du boucher,
El' calindrier de l'paroisse
Avec eun' vue d'not fier clocher.
Infin, d'quoi garnir tout un mur.
N'impêche, que durant tout l'année,
M'femme, in faisant ses écritures,
M'demande toudis el' jour qu'in est !
ROGER MOURA
1928 - 1996 (59)
Sujet: Chés calindriers 
Mer 19 Jan 2011 - 9:23
