Tétos l'rein.ne de l'cuisine, toudis à l'ouvrache,
Pour cha, té mé n'as donné des l'çons d'corache,
A t'vir ainsin, té m'san.nos jamais mate,
Dins l'famile in n'avot pont quer chés fates,
Ch'est aveuc ti qu'j'a apprind à faire à mier,
In arot cru eq ch'étot vraimint tin métier,
Ej rigole cor in arvé'ïant tous tes castroles,
Mais pour ti j'pinse que j'séros ein' caracole!
Quand que j'brayos té savos m'apouchiner,
Habile, ej couros dins t'n écour quan j'avos eu ein' tournée !
Des fos ch'étot ti eq té m'donnos ein' délacure,
Mais j'dos arconnaite eq ch'étot mérité, cha ch'est sur!
Ch'est ti qu'té m'as dit ecmint parler à Diu, à l'Sain.ne Vierche,
Tout pitit j'avos intindu tes prières dins min berche,
Dire qu'à ch'momint la j'étos si bénache,
J'étos in route à écrire de m'vie chés pu belles paches !
Té n'avos pont quer m'intin.ne parler patois,
Et quand qu'j'a parti d'ichi, té m'invoïos des lettes in patois,
T'avos su m'apprinte eq l'argint i n'fait pont l'bonheur,
Et pi qu'i fallot toudis laicher parler sin coeur.
Je n'm'éros jamais indormi d'vant qu'té m'faiches des baisses,
Et ch'est cor ti qu'té m'as moutré chu qu'ch'étot l'tindresse,
Achteur, in busiant à tout cha, je m'dis qu'j'avos ein trésor,
Dins nou vie gna des cosses gramint pu précieusses que d'l'or !
Dé ch'pu parfond d'min coeur j'volos t'ardire merci,
Et pi je n'povos l'faire eq dins l'lanque ed par chi,
El médale du traval cha 'té pour min père,
El médale de l'tindresse, pour mi, ch'est d'arparler de m'mère ..
Guy Penet