Tout comme el viux créchet s'alleumant tous les oirs
Au coin de l'quéminée, et bajant de s'leumière
Les pots de ch'l'égouttoir, l'vielle horloche et l'caïere,
Mais laichant des coins d'ompe et des indrots tout noirs,

Comme el' mêche étalée à l'pointe ed'l'émouchoir
Flambant comme un fu d'palle et leumant l'plache intière,
Démuchant dins les tros l'arnitoile et l'poussière,
Em' pinsée, elle aussi, a des momints d'espoir.

All' éclaire duch'mint comme eun' tiote leum'rotte
S'étindant alintour, d'un cloquer jusqu'à l'aute.
Tout d'un cop, eun' idée a sugi comme l'éclair !

Je m'cros chiron, flambeau ! vite, habile, ej'prinds m'pleume,
Ej' griffonne deux mots.... em'chervelle all' s'arfreume !
Quand j'pinsos éblouir, mi-même je n'vos pus clair.

Edmond Dupont
Waziers 1911

chiron : cierge
bajant : embrassant
émouchoir : queue de cheval attaché à un manche pour chasser les mouches
caïere (ou cayelle) : chaise
arnitoile : toile d'araignée
leum'rotte : petite lumière