Ches rues d'Billy-Montigny dins I'z annees 30
"Mes brages gins, si vous voulez ben m'acouter ein momint, mettez vos portapes in velle, copez vos télés et vos ordinateurs ... Bon, achteur j'vas vous raconter c'qui s'passot dins l'z' annees 30 dins chés rues d'Billy, quand j'tos cor in tiotes maronnes avec tros mapes et ein bout d'fichelle dins mes poches" !
In ch'temps la, a part in ville dusque chés rues étot't pavées, dins chés corons et l'z' autes rues al'z etot't arcouvertes ed caillaux. Nous chés gosses, in étot contints quand s'am'not l'machine à caillaux qui marchot à l'vapeur. Ein cylinte fort lourd passot et arpassot su chés caillaux jusqu'à rinte ch'quemin bien plat. Ch'tot ein amus'mint pour nous de l'suife ed pres. Des bons qu'mins cha fsot l'affaire d'nott' boulinger qui livrot ses pains d'deux lifes avec s'carriole qui sintot bon ch'pain blanc. Cha arringeot aussi l'marchante ed pichons qui passot dins chés rues, ses moules et ses pichons su ein platiau à quate reules qu'ein baudet i saquot tout duchemint. "A moules, à moules, moules, moulettes, moules bien fraiches ... harengs frais !" Croiez me si vous voulez, cor achteur, j'les ai dins m'n orelle, el marchante ed pichons et s'n ecalette qu'al fsot tourner tout l'long d'chés qu'mins.
D'bonne heure au matin, l'marchante ed lait passot avec ses bidons su ein' tiote armorque montée su des reulles ed velo. AI avot ses m'sures in etain d'ein' pinte et d'ein lite pindues a s'n armorque.
Dins l'journée v'not ch'crémier qui apportot ch'burre qu'i allot querre dins chés cinses. I ram'not aussi du Maroilles. Ah ! l' s'faijot sintir ch'ti la ! I donnot invie d'archiner in s'faisant ein bon briquet. D'timps in temps in veiot pédaler l'arpresintant d'amon Caiffa su sin triporteur vert. I vindot du café et toutes sortes d'artiques d'épicerie.
Dins chés corons et dins chés rues les pu paufes, fallot querre l'iau au robinet dins l'rue. Les lanques al'z y allot't bon train, cha m'rappelle qui n'd'avot ein qui avot ein' rute intalle et ein bon gosier. Ch'tot ch'bachineux. Armuant s'grosse cloque, i passot dins chés rues. Sortant d'leus masons, chés gins i' l'intindot't annoncher chés deulles, chés jours et heures d'interremints. D'toudis bachiner, i l'avot souvint sec sin gosier, mais i restot pas longtemps su s'soif. "- Mais v'la qu'cha m'donne so' aussi - Tiens m'file donne me ein' goutte ed café si té veux - Du fraiche, hein, pas de l'chirloute. Avec ein' bistoulle ... Achteur qu'cha va mieux, j'continue ... ".
A ch'temps la, l'interremint ch'tot toute ein' cérémonie. Tout l'monte in noir ou in sompe avec ein crèpe noir a s'manche ou a s'capote. Chés femmes de l'famile avot't leu tiête muchée pa d'longs voiles noirs. In n'veiot pu leu figure, mais un l'z intindot braire et arnifler. Ch'corbillard i étot saqué pas des qu'vaux qui avot't' su leus dos des couvertes noires. Pou chés pu riches, chés qu'vaux et l'carrette avot't' des pleumes blanques, les bidets su leus tiêtes, ch'corbillard a ses quate coins. Ches gins, tertouss à pieds, suivot't' l'att'lache, chés hommes d'abord, chés femmes après. Ch'tot ben triste d'vire passer ch'corrtèche la, j'étos tout artourné.
Heureus'mint qu'i y avot aussi dins chés rues d'z autes momints qu'chés gamins de m'n ache attinndot't' avec grandmin d'impachiinche. Aux biaux jours, l'marchante ed glaches al passot avec s'belle caarette toute blanque, ses gros couvleches in cuife et ses colonnates torsadées bien astiquées. Chelle femme al avot toudis ein tabier et ein tiot capiau bien blanc. Avec ses pompons d'couleurs à ses orelles, sin baudet i étot tout fier. Quand l'frodure ' étot la, s'n homme i' vindot des marrons tout cauds su' l'plache ed la gare. l Ies fsot cauffer su ein drole fu qu'i avot bricole li minme. Ch'étot ein' tiote locomotife in tole, toute noire, qui funquot comme ein' vraie du quemin d'fer.
A l'z intrées des cinémas, y avot l'marchante ed frites dins ein' baraque in planques montée su des reules. A l'entr'acte al in vindot ~and'min d'cornets. Ch'tot la mote qu'ches jonnes gins i payot't ein cornet d'frites à leu belles. Mais chés pu viux i n'arnonchot't pas d'su ein cornet d'frites.
C'qu'in etot contint aussi ed vire arriver dins chés rues ch'tot l'manèche avec ses tiots quévaux, ses tiots lapins et ses tiots pourchiaux. C'monte la tout in couleurs, tournot su ein platiau d'camionette saqué par ein bidet. Ein' tardiole armontée a l'main pa l'patron du manèche fsot ein' musique bin douche à nos orelles.
"Attindez ein' minute, mes gins... V'la qu'achteur tout s'imbroulle dins m'vielle tiete. In dirot qu'mes souv'nirs i s'bouscult't et qu'ch'est à ch'ti qui seurtira l'premier !. .. J'vas alleumer ein' pipe ... D'il ssqu'i est min toubaque ? Ah ! Le v'la avec m'pipe que j'ai l'pu quere, chelle in terre avec ein' patte ed couulon a s'tiete. Bon ... cha va miux, j'continue".
Dins l'grante rue, tout près d'eul gare, l'passache à niveau i étot souvint freume. I avot toudis du monte à chés barrières qui attindot l'passache ed chés trains. 1'z étot't saqués pa des locomotifes à vapeur. Ch'tot des monstres tout funquant qui chifflot't fort avant d'arriver à l'gare dins ein potin d'tous les diapes. Chés trains fsot't l'navette avec chés fosses, leu wagons à vite ou ben rimplis d'carbon. Y avot aussi chés trains d'voyageurs, avec premiere, deuxième ou trosième classe. Que hot garchon n'a pas révé d'ete pu tard ein mécanicien d'locomotife à vapeur? Ch'étot si biau, si fort ein' locomotife à vapeur ! Mais tout d'minme, cha fsot ein peu tiot peur !
C' qu'in veiot aussi souvint dins chés rues d'Billy, ch'tot l'car d'brasseux querque d'ein' douzain'ne ed tonniaux d'biere. Deux quévaux l'am'not't à ches cabarets qui n'manquot't' pas dins Billy et dins chés corons. Pou armuer ses qu'vaux, i fsot claquer sin clach'ron. Et l'plaisi des gamins ch'tot d'monter à ch'cul de l'carette. Mais cha, ch'étot defindu!
D'boire de l'bière, cha donnot invie de s'soulager. Dins chés rues d'Billy, y avot des pichotières. ln n'd'avot ein' su i'piache du monumint, ein' su i'piache de i'mairie, ein; in face du cinéma Apollo, pi cor ein; su l'plache ed l'école maternelle et ein' à l'intrée du tiot stade dins l'rue du cimetière. ln y véïot taudis du monte.
Faut pas qu'j'oubliche l'marchand d'piaux d'lapins qui passot su sin vélo in criant: "Piaux d'lapins, ... Piaux !" et pi cor l'marchand d'loques qui ramassot toutes sortes d'vielles affaires, des loques, du viux fer, minmes des oches, tout c'qu'i pouvot arvinte. l avot ein' grosse cloque qu'i armuot tout l'long d'chés qu'mins. Su s'carette ch'tot ein étalache d'toute l'misère du monte. Dins chés rues passot't' ches livreux d'carbon avec leu' tornbreaux saqués pa d'gros quévaux. l déquerquot't' su ches trottoirs ou au bord du gardin quand y avot pas d'trottoir. Ches gins rintrot't leu carbon dins leu cafes ou ben dins leu bacs à carrbon. A ch'temps là in fsot à minger et in s'cauffot qu'avec des fux et des cuisinières à carbon qu'in alleuumot avec d'z équettes et des gaillettes. Tous chés fux et chés cuisinières fsot't' des chintes. ln in mettot su ches voïettes ed gardins mais l'pu gros i allot avec el'z ordures des ménaches dins des vielles boulleuses qu'in sortot ein cap par semaine. Ches boueux passot't' dins ches rues et vidot't' ches boulleusses dins leu' tornbreaux.
Tout au long d'l'année in véïot ch'facteur et ch'vindeux d'journal. Ch'facteur i avot ein uniforme bleu foncé et ein képi à galon rouche. l fsot s'tournée à pied in portant s'grosse sacoche ed cuir. ln pouuvot lire ches nouvelles après que ch'vindeux d;journal i état passé à ches masons. Ches deux hommes là i' z'avot't grandmin d'quémin à faire pou v'nir à bout d'leus tournées.
J'peux pas manquer d'parler d'cheulle femme qui passot dins chés rues avec s'mante à hnche rimplie ed pichoulis. Al allot les querre dins ches camps et al n'les vindot pas quer. Que d'bonnes salates in fsot avec ses pichoulis et du lard. D'timps in temps, v'not su ein' drôle ed carette à bras l'arpasseux d'coutiaux et d'cisiaux. Assis à l'arrière i' pédalot pou faire tourner ein' grosse meule. Cha amusot chés gosses ed vire ches étincelles qui giclot't' de l'meule. Dins chés rues tranquilles, chés hommes i juot't' aux biscaïens, à l'guisse ou ben à l'gaboule avec d'vielles boites à conserfes. Ches gamins juot't' aux mapes ou ben au foteballe in cholant d'vielles boites à conserves ou ben des boules ed viux chiffons. Ch'tot rare d'avoir ein' balle ou ein vrai ballon. ln in véïot aussi qui juot't' à 1'torquainne (toupie). Chés files dansot't' à l'corte ou ben juot't à l'marelle. ln n'état pont gênés pa l'circulation.
Dins ches rues l'sam'di, à l'belle saison, in pouvot vire ches coulonneux qui am'not't au sièche leus coulons dins des paniers in osier. L'diminche matin ches coulons i'z étot't lâchés fort long ed Billy. Et i'z étot't attindus pas ches coulonneux qui guettot't' au gardin, leu nez in l'air, l'artour d'leus champions. Pour nous ches infants, y avot taudis quettcosse à vir dins ches rues.
Les jours d'ducasse y avot du monte qui v'not ou arvénot de l'grante plache. Ches rues i étot't fort animées. Et pi aussi ches jours d'marqués, tous chés diminches matin et chés jours d'quinzainne. Grand'min d'gins v'not't d'chés alintours pace qu'au marqué d'Billy in trouvot d'tout'. Ch'tot l'occasion pou ches gins d'mette leus pu belles affaires. A ch'temps là, in s'mettot in diminche. Comme cha, minme ches rues i avot't l'air d'savoir misses in diminche.
J'peux pas manquer d'vous parler d'eul sache-femme. ln v'not au monte à l'mason d'ses parints.
L'sage-femme al allot à vélo taudis pressée, pace qu'al avot d'l'ouvrache, souvint d'mandée qu'al état. Al d'a mis au monte des garchons et des files! Ceusses qui rimpliront ches rues d'leus amus'mints et d'leus cris in allant ou arvénant d'l'école.
Grand'mint i'z iront pu tard à l'fosse. Ches files au triache ou à lampistrie. Ches garchons comminnch'ront comme galibots avant d'aller au carbon dins ches talles. Tout ch'monte là mettra d'l'animation dins chés rues in allant ou arvénant de s'n ouvrache.
Ch'est dins l'z années 30 qu'in a c'minché à vire d'z autos dins chés rues d'Billy. Pas grand'min; i n'y avot qu'chés pu riches qui pouvot't' s'in païer ein'. l Y avot quéques camionnettes d'livraison et pi ein autobus. Ch'est su l'route nationale qu'i y avot l'pu d'passache. Après 1936, grand'min d'gins ont pu acater des vélos ou ben des tandems pou ches jonnes ménaches. Après cha, y a eu pu d'passache dins chés rues. Chés gins i s'déplachot't' pu vite et pu souvint. ..
"Mes gins, si j'ai ben tout dit, v'là c'qu'in pouvot vir dins chés rues d'Billy dins l'z années 30. Mais j'vas pas vous arténir ed puque. M'pipe s'a éteinte et ch'café i est frod. Tiens, j'vas m'faire ein' tiote rinchette. Eh ben achteur, vou'z autes tertouss, j'vas vous laicher pou mi faire ein tiot somme ... "
Arthur Darras Billy Montigny (62)
Sujet: Ches rues d'Billy-Montigny dins I'z annees 30 
Mer 20 Jan 2010 - 11:06
