Mes gins, in vient d'passer eune journée d'brin...
Hier, in a eu eune journée normale, eune bonne répétition d'orchestre et eune raclette chez des amis d'ù qu'in a mingé et ri jusqu'à deux heures au matin.
Vu l'heure qu'in s'a couqué et n'ayant rin de spécial à faire c'matin (à part l'ménache) in a pas mis l'rével à sonner et ch'est à partir d'là que tout à comminché !
Vos connaichez l'loi d'Murphy (pas Eddy l'acteur, hein !) ??? bin ch'est « Tout ce qui peut mal tourner, va mal tourner » .
A peine levé et arrivé dins l'cuijine, in intind un tiot bip bip venant du sous sol, qu'in a foque intindu in ouvrant l'porte qui va au sous sol pou faire intrer l'cat qui miaulot et voulot chés croquettes. Misère ! Ch'étot l'bip bip du congélateur qui étot à + 3°....
Min homme avot pris les tiotes briques qu'in met dins chés glacières et avot mal arfreumé l'porte hier au soir à 19 h avint d'partir pou l'musique, donc pus d'douze heures avint.
Bin après cha in étot bin réveillé !
J'ai passé l'matinée à cujiner tout cha que j'pouvos cuijiner, eune vraie intreprise d'cuijine.. Soupe, légueumes, quiches, tartes, et même in clafouti avec chés chériches du gardin qu'in avot récolté.
Faut dire que j'avos l'congélateur rimpli complètemint depis deux jours, in avot arfait l'plein... bin ouais ch'est toudis ainsi sinon cha s'rot nin drôle.
A midi et demi in avot presque tout géré, i restot foque queques légueumes et un cuissot d'sanglier que note neveu chasseur nos avot donné i a queques temps et que min homme a intrepris d'décoper pou qu'in puisse l'cuire in daube avint d'l'armette au congélateur et bin mes gins, cha c'est fini aux urgences.... Min homme s'a planté l'couteau dins l'main....
Arrivé aux urgences in nos dit à l'accueil qu'i avot au moins tros heures d'attinte... J'laisse min homme aux mains d'chés gintilles infreumières, j'arviens à l'majon, j'ralleume l'fu in d'sous d'chés castroles, j'armets l'four in route, j'infourne dins des botes et des sachets tout cha qui étot déjà prêt et j'attinds qu'min homme i m'rappelle pou aller l'arquerre... cha que j'ai pu faire vers 16 h, cha qui étot bin, car cha faisot pile tros heures comme annoncé...
Résultat des courses, 4 points d'suture dont 1 à l'intérieur de l'coupure d'sus l'muscle, mais nin d'nerf d'touché, Youppie !
In passe à l'pharmacie et in va chez nou chef d'orchestre d'ù que ch'étot prévu qu'in aille pou l'aider à préparer nou prochaine prestation qui a liu vindredi prochain...
In arvient à l'majon vers 18 h 00 et in est acceuilli par eune odeur d'guerzi... j'avos oblié un plat d'hachis parmentier dins l'four !!!!!!! Heureusemint qu'in est pas arvenu pus tard, in arot pu treuver chés pompiers dins l'rue ! Bilan, un plat dins l'poubelle et eune sale odeur...
Bin après tout cha mes gins, in a bu un bon tiot apéro ! in a pus qu'à aller s'couquer et si j'arrife nin à m'indormir au lieu d'compter chés maguettes j'compterai 1 courgette, 1 épinard, 1 côte de bette, 1 cheriche, 1 pichon, 1 sanglier... RRRRONNNNNNNNN RRRRRRONNNNNNNN, PFFFFFFFFFFF, PFFFFFFFFFF.....
allez hop hop hop au lit, in est d'jà demain et d't'à l'heure j'ai de l'daube d'sanglier à faire cuire (ouais min homme a fini l'découpache c'soir !)....