Je viens de faire eune découverte...

Depuis que je chus tiot, ou plutôt moyen, à m'mote que j'ai toudis eu deux sortes de tire jus: des avec des couleurs pour tous les jours ou pour ouvrer, et des blancs pour le diminche et les occasions à bieaux habits.

J'ai gardé l'habitude des coloriés tchand que je bricole et que j'ai des mains sales, et des blancs pour le reste du timps. Autint dire que je lave plus de tire jus blancs que de in couleurs, parce que j'ai plus souvint les mains dins les poques de min boudjine que dins celles de m'salopette. In puq, un nez ou n'importe quo d'autre qui saigne, chu du blanc cha fait des fos des tâches qu'in ne sait pus ravoir. Des tâches bleues... le premi qui m'appelle schrtroumpf i a eune margnouffe!

Bref, aujord'hu j'ai voulu acater des tire jus blancs pour renouveler min fond de stock. Je chus allé à min super marché de d'habitude. J'ai trouvé des tire jus, mais nin des blancs.

Du coup j'ai cachi chu internénette, à la redoute, à linvosges et pis tout cha. Eh ben ch'est un machin qu'is n'ont pus in tacalogue.

Ch'est étonnint énon?

Ah si, je n'd'ai trouvés des blancs, mais in lin.... Le lin ch'est bin mais i faut quelques années pour que cha s'assouplisse. T'as un rhume, tin nez comme eune pétrache, si que t'as que des tire jus in lin, cha a vite fait de virer à l'pétrache rouche qu'elle perd sin jus!

I a quind même eune adresse d'ùche que j'ai trouvé des blancs in coton: 8.5 roros pour 12. Cha irot. J'ai comminchi m'commande et j'ai vu qu'is demindottent 5.5 roros in puq pour l'expédition. Je vas incore cachi... à l'occasion je vas aller au marché, cha que je ne fais jamais, vu qu'i s'installe chu le parking!

I a que mi qui mouque dins du blanc?

Si c'est pour mètte su t'tiète avec des noeuds aux quat coins, ché mieux des blancs non ?

T'acates un drap blanc, cha s'troufe cor su les marqués (ou dins les brocantes ) pis té l'découpes in plein d'carrés, té fais l'diminsion qu'té veux, grinds, moyens, tiots et t'as plein d'tire jus pou aller au moins jusqu'in 2050...
Bon faut faire des ourlets bin sur sinon cha va filocher mais té vas bin treuver eune âme charitape qui va t'faire cha... mi j'ai eune machine à coude, mais, dommache (ouf !), j'sus loin

In v'là ène idée qu'elle est bonne Quo qu'il d'vindrot sins nos bons consels....(gratuits)...

ouais flersois, mais té vas vir que cha va pas cor d'aller...
pourtint si i reste du tissu i pourrot faire une grande berloufe pou faire briller s'mobylette...

Un drap... pis quo incore? Pourquo nin eune bâche pindint que vous y êtes?

Nan nan, mi mes tire jus blancs "du diminche" ch'est des bieaux, tout minces avec des effets de tissache dedins, nin de l'vulgaire toile.

Pfffft!

batisse a écrit:

mi mes tire jus blancs "du diminche" ch'est des bieaux, tout minces avec des effets de tissache dedins

Des inciens pichous alors, i avot des effets d'tissache ed dins !

Gnagnagna!

des pichous d'accord mais pas ch'gros du qu'in pliot ches bords et qu'in mettot eune grosse épingue derrière ches gambes !

te veux dire l'pichou fin in pointe, ah ouais là d'accord ch'étot tout douche.

vlà c'que j'avos mis sul site à Minloute y a un bon bout d'temps



Les mouchoirs de mineur

par LA CLO le, 27/08/2005

Pas question de petit mouchoir à jeter, où une fois suffit pour le remplir. Non, là c'était de la belle toile, à carreaux bleu marine et blanc ou marron beige et blanc, 45 cm de côté. Le vrai Tire Jus quoi ! (Pour la lessive , il fallait faire tremper, brosser et savonner à l'eau froide, rincer et seulement après mettre dans la lessive "normale") une autre époque ......

malheur jésus marie joseph, que lessife ! fallot mette les mains d'dins ! !

Te sais quo La Clo, monmère elle trimpot les mouchoirs dins l'iau à l'fin d'sin amidonnache....parait qu'i avot pus d'amidon à ch'momint là et qu'les mouchoirs is étotent plus biaux ! Véridique. Souvenirs souvenirs

Cha existe incore l'amidon?

Allez, sondache, qui qu'ch'est ichi qui amidone incore?

Ch'est vrai que dins le timps "in mettot ses mains dedins".

Nousautes tout jones mariés, ch'est suite à un gros rhume qu'in a acaté eune machine à laver! Toute eune époque...

ouais ch'est vrai, tout l'linche i étot amidonné et cha allot mieux pour arpasser et ch'étot un arpassache impeccabe. M'mère ale dijot même que amidonné, l'linche i s'salissot moins vite. Cha je l'cros moins.

la clo a écrit:

des pichous d'accord mais pas ch'gros du qu'in pliot ches bords et qu'in mettot eune grosse épingue derrière ches gambes !

te veux dire l'pichou fin in pointe, ah ouais là d'accord ch'étot tout douche.

Je mintiros si que je dijos que je chus un espécialisse du pichou. Cha dit, je ne me souviens nin d'un pichou in pointe, douche, qu'in mettot in contact avec l'pieau du pisseux ou de l'chieusse. Pourquo in pointe d'ailleurs? Et i tenot commint ch'ti-là?

Parel, j'ai aussi jamais vu mettre d'épingue derrière les guimpes des tiots. Chez nousautes les afants is avottent lu guimpes à l'air, à part évintuellemint, tchand qu'is étottent tout nouvieaux nés. Et incore...

Ch'est quind même terripe cha: je comminche un sujet sérieux destiné à min nez et in moins de deux in est dins le brun au tchul des mouflets. Z'êtes incroyapes vousautes...

ouais cha existe core, mais in a du mau à in trouver.

Dins des drogueries j'in trouffe ch'est d'l'amidon Remy - amidon de riz en cristaux.

Ch'est même bon pour l'pieau. In peut in mette dins l'ieau du bain.

J'amidonne pus beaucoup comme cha avec des cristaux. Ch'est pour amidonner très fort, des tiots travaux d'crochets, des doube-rideaux amidonnés pas trop fort cha donne eune belle tenue., mais j'fais comme beaucoup j'acate pour min tiot arpassache d'l'amidon in aérosol. Cha inlèffe ches plis du linche et l'repassache y est impecc ! In est du 62 ou 59 mais y a des z'habitudes qui restent d'mères in files. J'cros qu'après mi cha s'ra fini. Ches jones ale cachent surtout des cosses qui s'arpassetent pas - et ale z'ont bien raison -

dis donc Batisse ch'est ti qui oses dire cha ! y aurot eune dérife dins ches sujets, mais non ! ch'est la normale ichi.

In fait des statistiques, te vas vire qui ch'est qui dévie toudis !

Ch'est simpe pour les pichous j'peux t'dire qu'cha a queminché d'mette ches tiots in Babygros à partir 1967 - 1968

J'faisos scandale quanque j'ai eu min grand pace que j'l'immaillotos pas avec ses gambes immitouflées dins des gros pichous comme un saucisson.

In m'a dit qui allot avoir ses gambes arquées pauffe tiot - ch'étot mi vrai.

Les tissus in pointe chétot nin :les mouchoirs de cou qu'in dijot ?

mais non, in avot pour garnir leurs tiotes fesses :

eune couche soit in forme d' -T- ou bien in forme d'triangue.

Là dessus in mettot un pichou rectangulaire du qu'in "imballot" qu'in installot d'abord autour de leu taille l'ouverture devint in prenot chaque tiote gambe qu'in inroulot dins l'pichou sans trop serré bien sûr et après in mettot l'gros gros pichou autour de la taille et l'surplus d'tissu du bas, in l'dépliot et in l'attachot dins l'bas derrière leurs gambes avec eune grosse épingue d'nourrice.

Ch'étot des épingues avec un genre d'sécurité qui n'pouvotent pas s'ouvrir.



Et là in artrouffe l'sujet del l'lessife, vous vous rindez compte ch'qu'ale faisot comme traval nos manmans ! canger un tiot cha arvient souvint, pis y avot pas tout l'confort ! ch'étot énorme l'traval des femmes dins ch'temps là.

Flersois les mouchoirs ed cou ch'étot eune pièche d'linche qui n'servot qu'à cha.

Ch'étot un triangue plus petit souvint avec ches bords ourlés d'eune tiote dintelle.

J'ai l'impression d'faire partie des dinosaures in racontant tout cha, que ch'est loin.

Mi, m'fille elle est de 66, comme m'femme elle travaillot l'samedi après-midi, j'faijot la nounou. Cha n's'oublie nin cha...

la clo a écrit:

vous vous rindez compte ch'qu'ale faisot comme traval nos manmans ! canger un tiot cha arvient souvint, pis y avot pas tout l'confort ! ch'étot énorme l'traval des femmes dins ch'temps là.

Ouais, ch'est vrai! Tellemint vrai qu'elles les avottent à l'oeul lus
tiots. Un tiot qui poussot in mingint i avot vite fait de minger avec sin
tchul qui bouchot un tiot pot.

Bon, à part cha, je découvre ichi eune drôle de séquo... incore eune mais avec les 62 i faut s'attindre à tout...

Alors comme cha la clo, in 68 t'imballos incore tin tiot comme un bouquet de fleurs, fermé jusqu'in bas?
Mi
j'ai eune tiote soeur qu'elle est née in 62. Elle va bétôt avoir 50 ins
m'tiote soeur, mazette... Bref, à ch't'heure que te le dis, i me simble
que je vos incore les pichous in T qu'in li mettot sous sin tchul, les
ailes du T rabattues chu le nombril, et l'tcheue du T armontée vers le
nombril aussi, avec tout ch'bazar au nombril accrotchi avec eune épingue
à nourrice, in mettint bin sin dogt in dessous, pour piquer sin dogt
plutôt que le vinte à l'afant, sinon i brayot.
Pis après, i avot
incore un pichou qui se mettot par au-dessur, pour récupérer les
débordemints ou pour faire bieau, ou pour avoir des séquos in puq à
laver pour être sur de nin s'innuyer, je ne sais nin.

In tous les cas elle avot ses guimpes à l'air, même qu'elle passot sin timps à chucher sin gros ortel. Je me deminde si qu'elle sarot incore...

Mes premis
is ont eu un tiot peu le même système, à part qu'in comminchot avec le jetable: la
couche à ras le cucul - in matériau absorbint in papi et non tissé - et
un étinchéificateur in plastique, avec un noeud de chaque côté au
niveau des hanches. Ch'bazar in plastique i étot lavable, mais i étot
aussi déchirable... surtout tchand que ches noeuds de brun is ne
voulottent pus s'ouvrir!

A part cha, l'amidon ch'est foque pour le blanc? J'ai souvint des misères avec le repassache, alors je me rinseigne.

J'vous dis pas dins chés corons sur chés fils de fer à linge dins chés gardins!!!
Ch'est qui n'avot des tissus blancs qui pindotent, et tous les jours!!
sauf el diminche quand chétot concours ed coulons..
Que de souv'nirs....

I avot aussi des gaines et des soutifs énoooormes!

In tous cas, des mouchoirs de cou, cha ne me dit rin.

Des bavoirs ouais, des cagoules, des bonnets, des tours de cou tricotés, tout cha ouais, mais des mouchoirs de cou...

Comme les bandits dins les films de cow boys?