Presque toute l'famile étot prise c'ouiquende par l'musique et vu l'timps magnifique qu'in a, in peu dire qu'in s'in est bin sorti, infin presque tous...
Min aîné devot juer in plein air hier au soir avec l'big band d'jazz, comme i a plu à yux d'vaque jusqu'in fin d'après midi, tout l'matériel a été installé dins un gymnase, pas terripe pou l'son mais ch'est toudis miux que d'annuler comme cha leu est arrivé i a tros semaines à 1/2 h d'monter su scène car là i avot pas d'solution d'repli...
Min pus jonne i devot, avec sin groupe participer à un tremplin (important pou eusses car i a des jornées d'inregistremint in studio à gagner), i avot aussi 8 autes groupes et des tas d'animations, bin tout a été annulé et ch'est arporté à jeudi, c'qui pose quind même des problèmes pou ceusses qui traval'tent car ch'est à 40 kms d'ichi...
infin, min homme et mi avommes nou derni concert d'l'année (in fonctionne in année scolaire), in plein air, in ouverture de l'kermesse des écoles, tertous étottent à l'heure à 9 h 30 avec parka, grosses cauchettes et pull par d'sus l'quemiche d'l'orchestre au cas d'ù que l'solel i voudrot bin s'décider à moutrer l'bout d'sin nez et qu'in pourrot juer in quemiche... ch'étot utopique d'pinser cha !
In s'est vite rindu à l'évidence, in frod d'leu' (9°) un vint à décorner chés vaques, alors in s'est installé à l'salle des fiête (merci Mr le Maire), dins l'urgence car i a fallu tout installer... du cop in avot trop caud avec nou grosses cauchettes..
Infin l'concert s'est bin passé (in étot presque à l'heure) un programme d'musique américaine avec intre autres l'participation du clup d'country de l'commune qui a dinsé su tros morcieaux (jvos dis pas l'traval de coordination que cha a demindé !!!)...
Après, les parents d'élèves d'l'école avottent préparé un repas, eune bonne partie d'l'orchestre a acaté des parts et in a tertous mingé insonne dins l'préau d'lécole primaire pace que bin sur i a quéu des gouttes
Bin sur, avint d'minger, i a fallu tout ardémonter c'qu'in avot installé, mais tout cha dins eune bonne ambianche... comme j'm'occupe de l'gestion des quemiches d'l'orchestre j'ai du aussi cueurrir après les jonnes n'arvenant pas à l'orchestre l'année prochaine pou récupérer l'vêtemint
In est rintré à 16 h 30 bin mates, mais ch'est de l'bonne fatigue
Asteur i a pu qu'à attinde l'mos d'septimpe pou artreuver l'orchestre, mais avint réunion bilan d'l'année et pot l'semaine prochaine

pou mi j'in ai par cor terminé avec l'musique car j'ai cor l'concert de l'chorale samedi prochain avec deux repétitions cheule semaine, pis des repet eune partie d'lété avec l'quintette d'clarinettes.... mais quind in a quer in compte pas !!

j'vos dijos au d'sus qu'min pus jonne i participot à un tremplin d'musique hier au soir, bin ch'est eusses qui ont gagné, alors avec chés jornées de studio qu'is ont gagné is vont pouvoir inregistrer leu deuxième album
l'maman que j'sus alle est continte pou sin pouchin d'23 ins, même si cha m'inquiète un tiot peu car j'espère qu'is vont garder les pids su tierre et l'tiête frode.... (mais comptez su mi et min homme pou veiller à tout cha !)
in attindant is arjuent c'soir, comme in a pas pu y aller hier car j'avos répet in va aller les vir c'soir

J'imagine cha d'ichi... dins un concert de hard rock d'ùche qu'i faut aller avec des boules quiès, i a eune tiote madone avec ses mains jointes chu sin tchoeur, et ses ys dins le vague in train de se dire que ch'est elle qui a fait cha, et qu'i a nin si longtimps elle li lavot incore sin derrière.

Des mères i n'd'a nin grammint de sortes...

comme ch'étot in plein air, au niveau des orelles cha a été
bonne ambianche, tous leu' copains et parints pou les soutenir, de bonnes cosses aussi dins les autes groupes même chi asteur in acouterot pus cha du matin au soir, mais in a pris un bain d'jonnesse et cha m'a rappelé quind j'acoutos Alice Cooper à fond et que m'maman dijot "arrête t'musique d'sauvache !"
à un momint i avot tros tiotes minettes d'inviron 15 ins d'vint nousautes qui dijottent "ah ils sont trop beaux, surtout l'bassiste !", l'maman que j'sus ch'est artenue d'leu dire que l'bassiste ch'étot min garchon !!!(mais ch'est vrai qu'i est bieau min garchon !) in s'est ravisé avec les autes parints et in a souri - ch'est bieau d'ête jonne !
bref avec tout cha in s'a couqué à deux heures du matin et cha a été dur de s'lever à 7 h hier, un copain venot aider min homme à faire des travaux dins l'majon...
pis pou mi incore eune longue soirée avec l'concert de l'chorale, ambianche nettemint pus calme avec des canchons des Frères Jacques, Brassens ou Bobbie Lapointe... mais incor couquée à 1 h du matin après avoir tout ringé
aussi inutile d'vos dire qu'aujord'hui ch'étot dogts d'pid in évintal... infin après les deux heures d'nettoyache des travaux d'hier
j'cros que c'soir j'vas pas faire d'viux oches !!!

mais j'ai vraimint passé un bon ouiquende, in pus sous l'solel