Eune rude journée hier ! D'jà hier au matin cruaudache pour mi, in arot dit que mes rosiers étottent dins eune forêt vierche, pindant c'temps là min homme taillot les haies, pis hier après midi in avot l'livraison du bos d'cauffache, ben qu'in a eu caud à rintrer et ringer ché 6 stères, cha m'a paru interminape, pourtant i a des années d'ù qu'in in comminde d'pus !
Faut dire que l'solel i buquot sec hier après midi, capieau d'paille, leunettes d'solel et crème protectrice obligatoire. Cha cange des années d'ù qu'in a rintré l'bos avec les bottes et l'ciré !
Juste comme in finissot l'traval, à pus d'18 h, min pus jonne garchon qui travaille dins l'coin in c'momint est arrivé, cha li a rappelé l'temps d'ù que ch'étot corvée obligatoire pou tertous, infants et parints, comme ch'est un tiot blagueux (in s'deminde d'qui y tient !), in m'veyant dégoulinante d'suée i m'a fait armarquer qu'avec l'bos in avot caud aussi bin l'été que l'hiver... ouais c'est c'que j'disos à mes jonnes quind is nos aidottent....
Après cha, in a tertous mingé insonne, tomates et concombres du gardin, j'avos pas l'courache d'préparer aute cosse, mais comme cha nos avot bin "creusé" c'traval, min plateau d'fromaches in a pris un sacré cop !
Aujourd'hui, arpos, in va passer l'journée à Lyon et c'soir in est invité à un barbecue... alle est pas belle la vie ?