Roger
Sexe : 
Date d'inscription : 17/12/2009
Messages : 1281
 Henin Beaumont
 |  Sujet: Maman "d'Edmond DEVEMY"  Dim 3 Juin 2012 - 21:25 | |
|
Maman Ch't'eun' chose sacrée quand in arrive sur tierre.
Ch'est elle qui vous console et qu'in appelle es'mère
Quand in fait s'premier pas et alors qu'in culbute,
Ch'est elle qui vous arlève et qui vous donne el tutte.
Alle vous arlave dix cops pour canger vos pissioux
Et treuve que de s'n'ouvrache alle n'in vient pus à bout.
Si vous l'laissez tranquille in dormant gentimint
Ch'est elle qu'alle vous révelle in dijant : « cha va bin ? ».
I faudrot pour y plaire toudis y faire risette
Alle caresse vot' minton et fait guili guili
Pinsant d'y faire plaisi vous froncez vot' faussette
Et cujissez l'momint pour faire un gros pipi.
Après ch'est à l'école qu'in vous mène plein d'espoir
Et pour el peu qu'in brait, ch 'est elle qu'alle print l'mouchoir:
Alle arvient à l'mason, mais faut pas y parler,
Alle voudrot que l'journée alle fuche déjà terminée.
Après ch'est l'communion, et là, vous êtes un homme:
Alle acate el costume avec eine longue maronne.
Ch't'eine belle journée pour elle car vous êtes el pus biau,
Alle voudrot que c'jour-là i dure au moins six mos.
Et ch'est l'certificat et les autes examens
Mais dins l'tiête ed vot mère y n' n' a pas d'pus malin
Et si vous arvénez d'avoir loupé quet'cosse
Ben ch'n'est point d'vot' faute, mais ch'est à cause des autes.
Vous v'là bon pou l'service, in vous appelle soldat
Chà fait bin longtemps qu'alle craignot ch'momint-Ià.
Alle vous donne des consels : « fais attention à ti ! »
Alors qu'jamais d'sa vie alle n'a vu un fusil.
Et pis quand in n' n'arvient, qu'in a fait eine conquête
Alle s'ravisse dins eine glace et treuve que ch 'est bin biête,
A force d'avoir voulu bin vous amicloter
Alle n'a même pas eu l'temps ed vir la vie passer.
Après vlà qu'alle s'artreuve avec un tiot infant
Alle voudrot tout arfaire comme par auparavant
Mais les jeunes d'aujourd'hui i ont pas l'même caractère
I crottent qu'avec leur mote i vont arfaire el tierre.
Et un jour, sans rien dire, aIle a fermé ses yeux :
Alors les jeunes bin tristes s'ravis'tent tous les deux;
Les tiots sont là saisis, cessent ed braire un instant,
Alors que les parints i ditent : « au revoir maman! ».
Edmond DEVEMY |
|
