Je ne savos même nin que minitel cha existot incore. Je n'd'ai jamais eu à m'majon, pourtint à m'mote que ch'étot gratuit ou presque.
I me simble qu'à la poste ou des séquos ainsi, ch'étot in libre service, gratis, débroulte avec ch'bazar...
Bref, ch'est des affaires du siècle passé. In a tourné l'page.
Eh ben non! I a quelque timps, je cache après des horaires de train chu internénette, avec min manicraque qui va bin (cha va Marcel?). A un momint je m'ai artrouvé chu un site qui rinseignot chu les horaires via un interface minitel.
Vinguette que je me dis, cha existe incore cha? Et me vlà parti à me battre avec ch'bazar, buquer chu invoi etc. Ch'est d'eune linteur à rinte maboule. I a nin intérêt à se tromper sinon t'es perdu. Le brun. A m'mote qu'à la fin j'ai nin eu min rinseignemint et que j'ai été vir ailleurs... Pour mi cha s'arrêtot là.
Et récemmint j'archos m'facture de fournisseur internénette et in l'lisint - cha m'arrife des fos....- je vos qu'i a eune ligne pour 1 consultation minitel. Durée 4 minutes 14 secondes. Tarif 5.01 HT, cha qui fait 5.99 TTC.
Mi j'ai appris eune leçon. Je ne m'approcherai pus du minitel à moins de chinq kilomètres.
Je vous le dis pour que nin que cha vous arrive à vousautes, in ne sait jamais.... infin bon, vous faites comme vous voulez, ch'est foque pour rinte service hein. Vous avez le choix intre internénette gratuit, in couleurs et rapide ou alors minitel, à presque 1.50 roro la minute (10 francs l'minute, cha fait 600 de l'heure, ch'est des tarifs de quo cha? Pour eune machine in puq...), et qu'à ch'prix là ch'est lint, à peine in couleurs, laid et d'un maniemint lourdingue au point qu'au bout de 4 minutes t'as toudis nin le rinseignemint que te caches.
Comme arot dit Georges Marchais, ch'est un scandole!