Je vas vous dire un secret: le fouteballe je m'in fous à un point que vous ne pouvez probablemint nin imaginer.
Mais j'observe eune drôle de séquo... Tchand que des fos j'armonte dins ch'nord, je passe à Villeneuve d'Ascq à côté d'un imminse chantier pour un stade de fouteball. I paraitrot même que cha sera un des plus grinds d'Europe.
Tout cha cha a été mis in route tchand que l'équipe locale elle n'étot nin célèbre et, comme par hasard, l'inauguration du bazar va tcherre tchand que l'équipe locale elle est chimpionne de tout cha qui est possipe de chimpioner.
Pour mi ch'est un hasard qui sint la magouille. Cha fait que je m'intéresse incore moins qu'avint au fouteballe, que vus les salaires payés aux acteurs, je ne comprinds nin qu'i aiche des supporters smicards qui crittent "allez les riches". M'étonnerot qu'is fastent parel vis à vis de lus patrons, qui ont eune vie grammint moins inviape.
Qu'is crittent d'espoir de vir gagner un gva au tiercé, je peux incore comprinte, vu qu'i a des doupes à gagner pour ch'ti qui braille - et surtout pour ch'ti qui organisse - mais ou fouteballe, frinchemint, in se crorot du timps des cirques romains...
Vive les amateurs!