Cheule année j'sus pleine d'bonnes réolutions et j'ai décidé d'arprinde l'gymnastique... Seulement cha fait pus d'20 ans que j'in ai nin fait et j'vos avouerai que j'sus vraimoint rouillée !!! j'sus soupe comme eune branque d'arpe, si in m'plie trop fort j'cros que j'vas casser...
Mes copines m'ont dit : viens l'mardi soir, c'est du rinforcement musculaire, in douceur, pou eune arprise c'est l'cours qu'i t'faut !
Bin ouais mais l'prof a décidé c't'année d'démarrer fort, d'après les anciennes.... c'est bin ma veine, même mes copines in bavent... si après tout chés efforts j'artroufe pas m'souplesse j'minge l'tapis d'sol !
Par conte, min homme i est contint, j'sus tellemint mate in rintrant que j'parle presque nin (t'as vu Batisse j'l'ai dit avint ti, nananèèère)... hier au soir j'me sus indormie pindant min feuilleton que j'ai fort querre (paraitrot même que j'ai ronflé, mais cha, cha m'étonnerot gramint !)

Hé bin vlà miux ichi ! Not Tiote Bellotte nationale qui n'trouffe pus l'énergie ed babeller? hé bé , à m'mote que l'rinforcemint muxculaire , ch'étot nin in douceur.

Té dira à t'n'homme qui s'déméfie, qu'y ara aussi un cours ed rinforcemint muxculaire des zygomatiques , pour rigoler et babeller sins s'fatiguer.

Te fais gramin d'cosses, intre l'ouvrache, l'orchestre, l'chorale, le scrach poutine, l'forum , les rindonnées, l'cujine au bain marie, y minquot pus que l'gymnastique.
Bon courache à tertous.
Dins 3 mos, les jours y rallonchtent, ch'est cha que j'dis aux gins qui ravisstent tout in noir à l'ouvrache.

Mamère, l'cheftaine qui serre s'guiffe... saint Toni i a du mettre eune candelle à l'sainte vierche de Lourdes. Quo que je dis eune candelle, tout un fagot. Même le cat i a du être surpris.

In puq d'cha elle a ronflé pindint Derick. Armarque, cha je comprinds miux...

A tout hasard, ch'est quo l'arcette du moniteur de gunastique pour arriver à un tel résultat inimaginape???? I n'a que ti qui a tin biec serré ou ch'est parel pour toutes tes copines de souffrances?

Mamère....

J'pinse que Toni i va pouvoir s'arposer avec tout cha.

Mi j'ai arfait du sport aujordh'ui, j'ai fait voler min navion électrique (voir violons dingues) In a les pouches bien musculés in pratiquant un sport comme cha.  Bin cha a core été j'l'ai pas core foutu par tierre. 
.  D"main j'mettrai eune paire d'photos.