Cha y est, nos v'la in septempe, ch'est l'rintrée.
Armarquez in risque nin d'passer à côté vu l'battache qu'is in font d'partout, in peut nin alleumer l'télé, l'poste d'radio ou bin l'journal sins vire des gros titres qui nos l'annoncent (cha dot ête pou ceusses qui n'ont nin d'calendrier !) ou bin in a des pubs qui disent qu'i vaut miux acater s'canassière ou bin sin plumier (heu ! j'me cros in 1950 !) amon d'chez Edouard putôt qu'amont d'chez Tartanpion... mi cha m'saoule chés pubs sins avoir besoin d'boire un tiot verre d'blanc.
Mais mi j'ai querre l'rintrée quind même, cha veut dire qu'in va arvir des gins qu'in a nin vu pindant l'été, qu'in va arprinde chés activités, musique, sport ou + selon affinités (in dirot un slogan d'pub, min diu ! cha y est ! j'sus contaminée !!!!!!).

In tous les cas j'espère d'tout coeur qu'in va arvir certains d'sus ch'forum après ch'grind calme des vagances, et rin que pou cha, mi j'dis "VIFE L'RINTREE".

salut tiote bellote

bonne rintree pis a tous z'autes

ch;criniu

bienvenue ch'criniu et un tiot salut de m'part à Big Ben et Londres que ch'est eune très bielle ville à visiter mais que j'auros pas querre y vife...

bah !!tenn n'yest pu

j'habite mi londe mi....j'habite a livaire poule (liverpool i dissent comme no in inglais) 

ben mi j'vas tel dire ben j'lai quere ti forum:D 

ch'criniu

Ah ! Liverpool j'connos nin, mais pou mi cha évoque les Beatles (les bitlés comme i disot min grind père) et les Beatles, j'adoooooooore !!! cha n'vieillit nin cheule musique là. Faut vir l'nompe d'jonnes (dont mes infants) qui sont fans.

ichi ch'tin' institution quand k'te va quere a maquer dins che magazins t'enn n'y a toudis dros a tes oreles in poussant cariot j'ai cache apres du maroile che laguifs lo y n n'ont po

pi mi te sais biteulss che po min truc che roline stone non pu

mi mi che ch'lameric dez annees 50  t;sais lElvis pis zautes:D 

ch'criniu

Eh ben te peux le garder tin elvis et pis tout cha. Mi ch'est les charlots! Cha ch'est des paroles qu'in comprind et qu'elles ont du sins. Ah les nouilles ah les nouilles, nouilles au gratin nouilles au beurre, nouilles in boutons nouilles in fleurs etc. Jomais elvis i n'a canté eune séquo d'aussi fin que cha. Joooooooooomais!

Pour in arvénir au sujet - ch'est m'n'espécialité et min calvaire de mettre un tiot peu d'ordre dins ch'bouvaque - ouais, ch'est l'rintrée. Ch'est surtout l'automne qui se radine à grinds pas. Les feules elles tchettent à tout berzingue et pis les jours is devientent fénéints: is mont du timps à se lever et is s'in vont plus vite au soir. A m'mote que je deviens automme mi aussi.

Mais malgré que le solel i monte moins haut, i buque toudis dins mes carreaux à un certain momint de l'journée (à ch't'heure) et i insiste lourdemint pour me faire vir que mes carreaux is sont crades. Tcheu brun.... Fous le camp solel. Muche te!

Demain je pars in tournée et je m'in vas aller livrer eune séquo du côté de Dunkerque, dins le 59. J'ai jamais été aussi haut in France avec le caméon...

J'espère qu'is vont vite me laichi arpartir vu que je chus à l'presse de rintrer (nin forchémint pour laver mes vitres hein...). In va arcomminchi à rouler avec les phares....

j'arconneu qu't'as un grind sin d'lumour ti....er p'rin tin camion pi file dinl'nord

tenn sro po depayse la bo...che gins y parlent comme ti

n'resse po inrac ed sus l'route

ch'criniu

J'sus cholaille ed vous arlire tertous binde ed zouafes Bonne rintrée à tout l'monde ,l'temps i queur à eune vitesse qu'cha fout l'troulle

Bonjour Tertous,
mi l'rintrée alle va s'faire comme d'hab, j'sus coinché d'pis l'mois d'juin, d'pis m'dernière rando que j'auros pas dû faire et j'ai pas cor trouvé d'solution pour pus avoir d'maux dins l'bas d'min dos.
Alors j'sus pas prèt d'monter à ch'Pic, ni minme d'faire 10km dins la nature d'ichi, sans m'assire in route.
J'ai d'jà d'aut' rendez vous amon d'chez toubib mais j'in vos pas l'bout.
Ch'est du b... machin.
A part cha, cha va.

Bin ouais, cha y 'est ch'est l'rintrée.
Ce soir, y'a des afants qui z'ont du maux à leur vinte, y mont des cahiers tout props et nin cornés dins leur cartape, y z'ont tout plein d'résolutions d'garder tout cha intact, sins taches d'incre et sins fautes...aveuc l'moins d'rouche des corrections du maitre, ou d'ête toudis des bons comarates, d'aut y pinchent qu'y sront jomais in panne ed batterie aveuc leur calculette, d'aut y pinchent qui vont faire que des prouesses et toudis avir les félicitations des maîtes....et plein d'bons points....Faut avouer qu'aveuc cha comme projets, y'a d'quo avir du maux à sin vinte!

Pis y n'd'a qui muchent des pétards au fond de leur trousse, des qui saftent qu'avint l'soir les cahiers y seront cornés, que le carnet de liaison, y va nin rester gramind lommind tout vide chu l'pache '' comportement'' et qui faudra même rajouter des paches avint la Toussaint!

Y'a plein d'nouvieaux profs et des viux aussi qui z'ont du maux à leur vinte aussi, y saftent que les chinq premières mineutes, cha compte....

Hé bé que j'sus continte de pus aller à l'école des z'afants ! ( mê si j'ai nin été malheureusse à l'école)
Pour mi l'rintrée, cha m'fait pincher au brouillard, j'faijos plusieurs Kms à pid pour aller à l'école et à l'rintrée y'avot toudis eune brume dins les rues, cha sintot l'automne, les jours qui diminutent, cha sintot l'café torréfié dins l'épicerie du bas d'la rue, et pis l'drap d'laine calendré dins l'usine du haut de l'rue et pis le lino de l'école, les bureaux cirés à la cire d'abeille et térébenthine et pis l'cantine, que cha sintôt les peunnes tierres bouillites et les brocs in plastique qui donntent mauvais goût à l'ieau dins nos verres in Arcopal....et pis dins l'cour cha sint l'automne....les devoirs, les papis à faire rimplir par les parints, les liffs à arcouvrir.... les tabliers dins l'cartape, les tires jus amidonnés qui font du maux à nou nez enrhumés et qui sont ringés par l'momère dins l'poque des tabliers... et pis les couchages au lit d'bonne heure....beurk, in dit toudis qu'ch'est l'meilleur momint de l'vie, mi j'trouffe nin.... Rin qu'd'in parler, j'aros presque du maux à min vinte !

Man mère que ch'est bin raconté j'in ai l'chaire ed poule j'm'arvos étant tiote Merci Mérilou

In dirot qu'ch'est eune catastrophe  et qu'ch'est l'première fos qu'cha arrife......

Mérilou elle commindot un rhume pour comminchi l'école? Cha sait avoir des drôles d'idées les guernoules!

Nousautes in avot des jus de garchons: dins les pissotières que ch'étot eune sorte de mur in béton avec eune rigole in bas et que cha puot la rage, in juot à ch'ti qui pissot le plus haut.

Ch'est nin pour dire, mais ch'est le ginre de truc qu'i faut profiter de faire tchand qu'in est jones....

Hein ouais pépé?

T'as raison Batisse,
mi j'ai eu eun' baisse ed régime, après avoir picher l'pus haut possipe sus chés murs d'chés urinoirs, j'ai qu'mincher à picher sus mes pieds, après cha a été sus mes genoux et à ch't'heure ch'est sus mes mains, cha r'monte.
 

Min pauf Marcel !
Armarque tint qu'ch'est pas dins l'oel du vojin.....

Ouais, i a un chef de service à m'fabrique qui s'a eune fos pointé avec s'bistrouquette grinte ouverte. Alors j'i ai dit et i a ri in dijint que ch'étot le début des problèmes de mémoire.

Cha comminche qu'in oblie de l'fermer et cha finit qu'in oblie de l'ouvrir qu'i a dit.
Marcel i a incore un tiot peu de bon timps devint li....
Te n'd'es à combien de gouttes à l'mineute garchon?
Imagine le bouvaque si qu'in prime t'attrapes eune parkinson. Vinguette....
N'impêche qu'à ch't'heure te sais que ch'est pus l'première mais l'dernière goutte qui va le plus loin. Celle de tchand que te secoues tes dogts....

Bin si Tiote, un jour in rando, in s'couant mes dogts comme dit Batisse,  ch'est parti dins l'eule ed min Camarat qui, pas loin d'mi faisot sus un ape.
 

. Ch'est drôle, in avot tertoutes les mêmes jux à l'école, nous z'autes ch'est à ch'ti qui pichot l'pus loin.( J'ai pas d'photos)
........
.        Un viux quand qu'i piche d'sur ses génouilles ch'est pas core trop grafe, min visin i peut pus picher du tout, in a du li mète un tuyau la d'dins ! ! ! ! 
.        Li i rigole pus, i peut pus juer à ch'ti qui piche l'pus loin..
....... 

Ben cha dépind de l'longueur du tuyau.

Cha dépind.... ch'est eune expression qui dot in faire rêver quelques uns, et même à l'occasion quelques eunes.

In tous les cas, je ne sais nin si que vous avez armarqué, mais in partint d'un sujet sérieux de l'cheftaine chu l'rintrée des djones, in est arrivés in moins de deux à causer des problèmes d'évacuation des viux.

Vous êtes incorrigibles mes gins.

Nan: "Ben cha dépind de l'longueur du tuyau" nan du diamète du tuyau ! ! ! 

pépéPéBé a écrit:

. Ch'est drôle, in avot tertoutes les mêmes jux à l'école, nous z'autes ch'est à ch'ti qui pichot l'pus loin.
( J'ai pas d'photos)

Ouf !!!!!!!! in l'a échappé belle !

Meat coule pas, méat coule pas.. qui distent les viux in frapint chu leur vinte.

Quel rapport aveuc l'rintrée des classes?
Cmint qu'in va faire pour tcherre chu nou arpions?
J'laiche el plache à les ceuss qui sont inspirés et moins castratophiques que mi dins les souvenirs ed rintrée.

Cheule année j'sus pleine d'bonnes réolutions et j'ai décidé d'arprinde l'gymnastique... Seulement cha fait pus d'20 ans que j'in ai nin fait et j'vos avouerai que j'sus vraimoint rouillée !!! j'sus soupe comme eune branque d'arpe, si in m'plie trop fort j'cros que j'vas casser...
Mes copines m'ont dit : viens l'mardi soir, c'est du rinforcement musculaire, in douceur, pou eune arprise c'est l'cours qu'i t'faut !
Bin ouais mais l'prof a décidé c't'année d'démarrer fort, d'après les anciennes.... c'est bin ma veine, même mes copines in bavent... si après tout chés efforts j'artroufe pas m'souplesse j'minge l'tapis d'sol !
Par conte, min homme i est contint, j'sus tellemint mate in rintrant que j'parle presque nin (t'as vu Batisse j'l'ai dit avint ti, nananèèère)... hier au soir j'me sus indormie pindant min feuilleton que j'ai fort querre (paraitrot même que j'ai ronflé, mais cha, cha m'étonnerot gramint !)