Ah ouais, ch'est le printimps. In cauffe grammint moins et les guernoules elles vont moutrer qu'elles ne sont carrémint nin frileusses.

Cha fait des mos que je me dis que je devros planter des rosiers (même mes rosiers is crèvtent, z'avez qu'à vir comme j'ai l'main verte....) mais rassurez me: ch'est trop tard à ch't'heure hein?

Bon, allez, in va sortir, vu qu'i fait bieau et que min frigo i sonne archi creux...

Eune bonne journée à tertous et sin quien ou sin cat ou n'importe quo.

in peutcore planter des rosiers..

Citation :

mais rassurez me: ch'est trop tard à ch't'heure hein?

té in plein d'dins Batisse,profites de t'sortie pour acater des rosiers ...
j'viens d'avoir eun' partie d'plaigir...
j'arviens d'aller conduire m'belle soeur au marché d'Henin,dins l'auto, elle me dit, j'te prinds des culs d'poules!
des culs d'poules,j'y réponds!! ch'est quoi cha..
bin des échalotes à planter....
Nan!!! cha s'appelle des cuisses de poulet...
m'journée comminche bien...ch'est l'printemps...

Bin valà ch'duc et Roger vos avez fait un cop au moral d'Batisse....
(pis y peut cor planter des dahlias, des glaïeuls, du muguet, arpiquer des pinsées ou bin des primevères... j'diros bin d'autes noms d'fleurs ou d'arbustes mais in va rester dins l'simple)

ch'duc a écrit:

in peutcore planter des rosiers..

In peut core mett' des rosiers pis des arpes fruitiers ,



eul tout ch'est ben les mouiller ,

si i a pas ed terre su les racines te les trimpes dins un séaux aveuc d'l'boue

batisse a écrit:

Cha fait des mos que je me dis que je devros planter des rosiers (même mes rosiers is crèvtent, z'avez qu'à vir comme j'ai l'main verte....) mais rassurez me: ch'est trop tard à ch't'heure hein?

Mais non, t'es nin incore si vieux, t'in profitera incore ène paire d'ans...

Faut nin attinte la fin des haricots pou planter des rosiers !

T'as nin pinsé à des plantes in plastique !

Vlà chi eun' video qui t'explique commint faire pour les planter!
t'as nin plus d'excuse maint'nint

Brun! J'ai compris qu'i faut que je m'y mette alors... bande de soyeux!

Bon, pour comminchi j'ai été vir d'ùche qu'in in trouve et combien que cha coûte. Pour l'instint je n'd'ai trouvé qu'à Truffaut et cha coûte au moins 15 roros par pid. Comme i m'in faudrot eune tiote dizaine, je vas aller vir ailleurs, in particulier dins m'poubelle vu qu'i me simble que j'avos archu de l'réclame d'un magasin d'ùche que ch'étot grammint moins cher.

Sinon, cheftaine et tous les autres, ailleurs qu'à ras devint l'majon, cha sera jachère fleurie, in espérint que ch't'année-ichi elle ne sera nin aussi catastrophique que l'an passé pour ch'ginre de séquo.

A m'mote que j'ai aussi des dahlias quelque part à l'cafe. Des que j'ai sauvés ch't'automne d'eune mort de frod certaine sous un tas de grouaches, comme eune fos suggéré par des "copains à l'main verte". Et qui vivtent dins des pays cauds....

T'imprimes cha su ène grante feulle et te l'colles su l'mur d'tin garache :

[quote="batisse"]Brun! J'ai compris qu'i faut que je m'y mette alors... bande de soyeux!

Bon, pour comminchi j'ai été vir d'ùche qu'in in trouve et combien que cha coûte. Pour l'instint je n'd'ai trouvé qu'à Truffaut et cha coûte au moins 15 roros par pid. Comme i m'in faudrot eune tiote dizaine, je vas aller vir ailleurs, in particulier dins m'poubelle vu qu'i me simble que j'avos archu de l'réclame d'un magasin d'ùche que ch'étot grammint moins cher.

quote]



Va vire dins les LIDL ach momint in da à 1,99 el pid ,

j'n'ai mis l'semaine dernière & i sont ben arparti

J'ai trouvé incore miux, sins le faire exprès!

Comme dit, j'ai été dins m'poubelle et j'ai artrouvé l'réclame. Ch'étot chez Leclerc et ch'est jusqu'au 24.

Cha que j'ai surtout vu, ch'est que ch'étot 3.60 roros...

Du coup je chus allez chez Leclerc et i avot déjà du y avoir eune razzia vu qu'i ne restot pus grind cosse à min goût, niveau couleur et surtout niveau invahissemint. Pour mi des arpes qui montent à 2 mètres, non merci. J'ai trouvé du 40/80 cm. I n'd'avot incore 4, j'ai pris les 4. Et un tiot sac de terreau.

Arrivé à m'majon, je fais mes 4 tros, je répartis tout le terreau bin au fond, j'arrose pour faire de l'bedoule (je m'ai étonné d'être aussi appliqué) et j'ai comminchi à planter. J'ai mis un pid, avec arrosache, bedoulache, vibrache de l'bedoule, recouvremint et tout et tout comme le chef i a dit. Je n'd'ai mis un deuxième et, je ne sais nin pourquo, j'ai vu que chu le papi d'imballache du deuxième ch'étot écrit "3X". Mi je chus habitué au XXL, mais XXX sins L, moins.

Du coup j'ai arwetchi le trosième et ch'étot aussi écrit 3X comme chu tous. Ben mes gins, pour 3.60 roros i n'd'avot 3 pids par paquet!

Les racines étottent bin imberlificotées insonne et i fallot le savoir....

Du coup j'ai arfait tout plein de trous, j'ai déterré mes bazars imbedoulés, j'ai séparé et j'ai arpiqué 12 pieds au lieu de 4. J'ai même arrachi un plan nin incore tout à fait mort pour un mettre un tout jone - mais rouche - à s'plache! J'étos déchaîné. Chu tout cha j'ai versé eune chintaine de litres d'ieau. Je vous garintis que cha a fait de l'bedoule de première qualité, de l'vraie bouse de vaque!

Bon, i n'a que 4 pids qui aront archu lu dose de terreau fraique au fond du trou.

Mais je sins que cha va pousser quind même!

Sinon, cha sera comme d'habitude: l'misère!

J'pinse que ch'coup chi ch'est l'bon coup, tout va pousser, cha y est t'as l'main verte achtheure.

ah ouais, de l'jachère fleurie.....j'vas n'in r'mettre ch't'année
j'ai voulu tondre hier vu que m'dernière tonte all armontot au moins à septembre dernier et que j'trouvos qu'cha comminchot à faire haut.....bin qué malheur, chéto cor tout humite, pourtant j'ai tondu vers 4 h d'l'après midi.....cha bourrot, cha bourrot, cha faisot des gros paquets d'hierpe, j'ai eu du mau à mes biceps tout l'soirée
que brin!!!

Ah cha, si te tonds eune fos tous les six mos!

Acate eune faux... cha fera comme tchand que faijos du twist.

Cha bourrot, cha bourrot... ch'est normal, te sais à ch't'heure pourquo que l'bourrée ch't'eune dinse de sincier.

T'in fais gramin Batisse pour tes rosiers, ché commint qu'elle s'appelle celle à qui qu'te veux offrir des roses....

Félicie ou Berthe, j'hésite incore.

batisse a écrit:

Félicie ou Berthe, j'hésite incore.

Pas Fernande alors !

T'as bin fait attintion à nin interrer l'point d'greffe bin sur .....

Citation :

J'étos déchaîné. Chu tout cha j'ai versé eune chintaine de litres d'ieau. Je vous garintis que cha a fait de l'bedoule de première qualité, de l'vraie bouse de vaque!

Si y fait gramin d'solel, cha f'ra l'recette de l'racine de rosier cuite au bain-marie

Cheftaine! I se moque...

A mi in a offert des roses et dins nouvielle majon qui est nin trop caute ni trop sec bin elles sont incore fin bielles mes roses.
Dins l'gardin j'ai été vire, j'ai 2 rosiers tout biscornus, j'va vire c'que cha donne ch't'année, j'prindrai m'décision à l'automne.
Pour l'instint, j'chus bonne à ete mise au four : nouveau parfum : laurier sauce ! J'viens d'taper dins un Enorme laurier-sauce. J'ai un gros tas d'branques et j'ai nin l'impression qui a beaucoup diminué ch'n'arpe ! L'porier i a l'air d'arprinte, l'pommier aussi mais cha dos ete un "tardif".... Comme in est dins L'Nord (comme in disot dins l'film) in est nin in avince pour l'végétation, les feulles elles sortent tout juste....et incore par chur tous ches arpes !

Bienvenue au clup des forçats du gardin!

A m'mote qu'in ara un sujet de puq à rire in discutint intre nousautes...

Mi, ch't'aprème, j'arprinds le démoussache, dins un autre coin du terrain! J'étos plein de courache pour finir cha avint le ouaiquenne mais je viens d'apprinte que je vas ouvrer demain après midi et vindredi.

Et samedi i a eune autre séquo au programme...

Tcheu brun ch'gardin!

Citation :

A mi in a offert des roses et dins nouvielle majon qui est nin trop caute ni trop sec bin elles sont incore fin bielles mes roses.

Ah ouais !!!

Nosautes in a inlevé des séquos dins un massif, notammint eune espèce de lierre qui invahissot tout et étouffot les autes plantes, à l'plache in a mis tros rosiers mais j'me rappelle pus que couleur in a cuji, in a hésité intre pusieurs choix et du cop j'sais pus avec lesquels in est arvenu, comme cha sins réfléchir j'diros oranche ? cha s'ra l'surprise dins queques temps...

Des rosiers au bain marie, in ara tout intindu ichi !!!
Armarque in pourrot appeler eune variété "rose bain marie", y a bin eune variété qui s'appelle "cuisse de nymphe émue", si si, j'raconte pas d'cacoules, même si j'sus morte de rire in l'écrivant !
v'la chi l'photo de "cuisse de nymphe émue"

Si cha cha arsonnne à eune cuisse, j'aime autint nin vir l'reste de l'nymphe in question....

I n'd'a des qui ont du faire du fu avec des plantes étringes ch'jour-là! Ou mingé des chimpignons qui font planer.