Comme tertous j'ai visionné l'émission à Léon et Gérard chu l'vaccination et, in ce qui me concerne, ch'est l'meilleure de toutes. Bravo à vousautes deux et continuez comme cha! J'espère que vous avez incore grammint de stock de prénoms et de villaches pour les Martinache!

Tout cha pour dire que j'ai intindu ch't'au matin dins le poste qu'à cause de cheule vaccination gratuite les cotisations des mutuelles elles vont augminter et qu'i a bétôt 7 (ou 4?) millions de français qui ont déjà été vaccinés.

Ouais, i reste donc plus de 80 millions de doses, d'aidjules et tout cha in stock. Tout cha ch'est gratuit, mais qui qu'ch'est qui va payer? Nousautes. Nin la sécu, que ch'est l'état et qu'elle n'a pus de sous, mais les mutuelles, que ch'est privé, donc directemint nousautes.

Tchand que nous politiques is nous espliqtent qu'i faut absolumint faire des économies pour réduire le déficit de l'état, à m'mote qu'is arottent plutôt miux fait de comminder de l'vaseline plutôt que des vaccins.

Ouais Batisse j'a lu cha aussi ch'matin , mutuelles plus 5 % pour intre autre éponger el cout des vaccinations à leu charge mais surtout el pus pire pour payer les millions d'doses qui s'ront pas utilisées et qui partiront à l'poubelle
enfin sans vouloir paul et mickey là d'sus , cheux qui les ont fabriqués in tout cas i s'ront payés ...

Mi je seros curieux de savoir combien de timps qu'i faut pour faire quelques milliards de vaccins. Ben ouais, si que tous les pays is font comme le notre, in in commindant deux fos plus qu'i a d'habitints, in arrrife vite à des milliards... Et les milliards, i n'd'a qui ont l'air de jongler avec, mais ch'est vraimint grammint. 1 milliard, in supposint qu'in fait des pas d'1 mètre de long, ch'est le nombre de pas qu'i faut pour parcourir 25 fos le tour de l'tierre. Ch'est le nombre de tours qu'un moteur d'auto qui tourne à 3000 trs i fait in 200 heures.

Bref, l'fabrication de vaccins ch'est eune fabrication comme eune autre: comme pour tout cha qui est fabriqué, i a un délai de fabrication. Avint de les printe chu eune étagère pour les imballer et les invoyer, i faut les faire! Et cha, ch'est des fos très long. Armarquez, cha dépind si qu'i a des sous à gagner in faijint croire le contraire. Je dis cha je ne dis rin, mais tchand que le pétrole i augminte in Iran, deux jours après cha augminte à l'pompe. Tchand qu'i baisse, i faut déjà écouler les stocks qu'in avot et cha, cha prind des mos.

I faut nin croire que parce que des frinçais is ont commindé 93 millions de vaccins les laboratoires is ne vont produire que pour les français... In fait, is pourrottent dire aux frinçais: à la queue comme tertous! (cha in n'aime nin in France), i a d'abord les suisses, les alleminds et les espingoins, qui ont commindé avint.

In vrai is ne font nin comme cha, tertous qui a ouvré dins l'industrie i le sait. Is distent, ok, in va vous livrer des vaccins, mais par lots de 500 000, vu qu'i faut servir tertous in même timps et, comme in vient tout juste de trouver l'bonne formule, in n'a nin de stock.

Mi je ne comprinds nin qu'in confie des commintes ainsi à des fonctionnaires... in dirot qu'i n'a nin assez d'acateux professionnels dins nous pays. Commint qu'is font les acateux d'Auchan, Carrouf, Leclerc et tout cha? Is distent in vous comminte 2 millions de télés. Ch'est grammint hein? Vous allez nous faire un bon prix hein? Sinon je vas chez le concurrint hein... et eune fos que le fournisseur i a été bin étringlé, si jamais is découvtent que les télés cha ne se vind nin aussi bin qu'is ont prévu, is distent au fournisseur que ch'est pus la peine qu'i expédie. Donc li i arrête de fabriquer. Le pouvoir i est dins les mains de ch'ti qui paye, et cha m'étonnerot qu'un acateux professionnel i paye d'avinche 100% d'eune séquo. A la limite un tiot acompte... à la limite!

A nousautes in veut nous faire croire qu'in va payer tous les vaccins qu'in a commindés, même si que ch'est pour les mettre au bac à l'ordure au fur et à mesure qu'is arrivtent. Cha friserot la faute professionnelle grave de l'acateux...

In tous les cas j'ai toudis nin archu m'n'invitation. Et vousautes?

Ben té sais Batisse mi j'cros que ch'est l'cas , que tous chés vaccins ont été payés à chés labos, même ceux qui vont finir ale poubelle , enfin ch'est m' n'idée
Sinon mi non plus j'a pas eu m' n'invitation , mais cha m'manque pas du tout
:x