Je n'sais nin si qu'cha fait parel à vous z'aut mais à forche ed buquer chu un clavier in n'sait pus aveuc quelle main qu'in tenot un crayon avint l'arrivée du manicraque.

J'devos écrire à quéqu'un qui avot nin l'infreumatique, alors j'm'a dit qui fallot faire cha à l'incienne. A part des tiots textes chu des cartes ou bin des tiots papis, cha dvint rare que j'ecriffe.

J'ai pris un papi, un crayon et j'ai saqué m'linque déhiors de m'bouque pour bin écrire tout cha comme y faut.

Hé bé tcheu dallache mes gins! figurez vous qu'j'a perdu l'habitute. Cmint qu'cha fait aveuc vous z'aut?

Avint, in faijot des lonques lettes aveuc des bielles majuscules et tout cha et tchin qu'in faijot eune faute , in mettot not papi dins l'bac à z'ordures et in arcominchot.
J'a connu les pleumes sergent Major et l'maitresse qui rimplichot nou incriers aveuc s'grinte boutele d'incre violette, et qu'in mettot s'main su l'buvard et qui fallot nin que l'pleume elle accroche au papi sinon cha faijot des taches tut partout.

Tout cha pour dire qu'à ch't'heure, in buque chu un clavier à Zerty, in arvient in arrière pour corriger les fautes ( ni vues ni connutes) et que tchin qu'in fait des fautes, y'a l'correcteur orthographique qui souligne tout cha in rouche ( comme l'maitresse avint) mais un clic ed sourite et cha nous met l'mot sins fautes... sauf sur acoute ichi que ça n'marche nin. In arvient in arrière et in surline nou cacoules et un fait '' suppr'' et tout y s'invole.

Je n'sais nin pourquo mais j'sus quand même inquiète de pus savoir écrire comme avint et que cha va plus vite chu un clavier.

Et vous z'aut, cmint qu'vous préférez écrire?

'correcteur orthographique qui souligne tout cha in rouche ( comme l'maitresse avint) mais un clic ed sourite et cha nous met l'mot sins fautes...
Cha l'maitresse elle faijot nin ! fallot qu'in cache tout seu pourquo qu'elle avot usé sin stylo rouche chu nou cahiers...

T'es nin incore à tin lit tisaute?

Eh ben je vas te dire: je chus un tiot peu comme tisaute, perdu tchand qu'i faut écrire à la main. A la main i faut avoir bon du premi cop, question fautes et question comprintitute de l'phrase.
In perd vite l'habitute de cheule gymnastique-là.

Des fos, tchand que je dos écrire à la main eune séquo d'importint et sérieux, i m'arrife de faire un brouillon à l'ordi, de l'imprimer et de l'arcopier.

Eh ben même comme cha je chus capape de nin écrire comme chu le brouillon et de devoir mettre m'bielle lettre manuscrite au bac à l'ordure.

Souvint aussi, je dos arcomminchi rapidemint parce que min stylo à pleume i n'a pus l'habitute d'écrire non pus. Du cop soit s'n'incre elle est toute sèque, sot i n'in coule de trop et cha fait des pâtés.

Tcheu jeu!

Nin étonnint que des fos les gartes champêtres et les flics is faijottent des procès verbaux comiques.

D'ailleurs pourquo qu'in dit un procès verbal et que ch'est par écrit?

Mi j'ai eune très très vilaine écriture, j'auros pus ête médecin car des fos j'arrife même pas à m'arlire ! alors dès qu'j'ai pu j'ai fait min courrier ou sur eune machine à écrire (au sièque dernier) ou su l'ordinateur.... et l'ordinateur ch'est quind même bin pratique, ch'est des pus bielles présintations que du timps d'ù qu'in buquot sur les touches d'eune machine à écrire et qu'in devot mette "du blanc" su les fautes de frappes et arbuquer comme eune malate su l'bonne touche pou corriger l'lette qui n'allot pas...
l'pire ch'est quind in avot à faire un doupe.... in d'mes premiers traval ch'étot dins un cabinet de radiologie et in devot faire des doupes d'tous les comptes rindus... in essayot d'incrinquer l'miux qu'in pouvot l'feulle d'papi blanc, l'feule d'carbone et l'feule in papi d'soie pou l'copie, tout cha insanne, eune fos su deux cha glichot... mais in avot de l'chance quind même car in avot eune machine à écrire éleuctrique, ch'étot d'jà eune révolution !.... min diu j'ai l'impression d'avoir 100 ins à écrire cha !!!!
Mais i a quind même eune cosse d'bon quind in écrit à l'main, in réfléchit d'pus à l'ortographe, sur l'manicraque cha va vite et in a vite tendance à invoïer et in s'apercoit après cop qu'in a fait eune grosse faute, qui nos aurot valu un moins 4 points in dictée (toudis au sièque dernier ).....

tiote bellotte a écrit:

... in essayot d'incrinquer l'miux qu'in pouvot l'feulle d'papi blanc, l'feule d'carbone et l'feule in papi d'soie pou l'copie, tout cha insanne, eune fos su deux cha glichot... ).....

mi dins un aute siècle, j'ai été imployé d'bureau dins un' filature. Et bin ch'étot des triples voire des 4 feulles qu'i' fallot incriquer. Fallot nin oblier d'mette el bouton "force +" pour qu'i ait quequecosse d'imprimer su' l'dernire feulle !

cha m' rappelle les punitions à l'école i fallo arcopier 50 cop je ne dois pas chahuter en classe ou siffler....té va m' deminder: "cha té arrivé nounours" excusez me ej sus obligé d'arréter d'écrire j'ai eune crampe à min dogt.ben ouais ej buque qu'avec un dogt.

pour faire el liste ed ches courses ,vousécrivez ou vous l' faites avec ech clavier??

Fallot mête aussi ch'carbone dins l'bon sens.

Pour réponte à Ch'duc, l'liste des courses ch'est cor aveuc un papi tchin y in pinche mais après in buque not code secret chu l'clavier de l'carte bleusse.. cha passe tut tut , in n'fait presque pus d'chèque mais cha revint au même: cha fait du maux sur l'compte in banque.

In parlint ed visses machines à écrire ( que les secrétaires belches elles inaugurent in copint l'ruban) ch'est pour que les marteaux aveuc les carractères y s'bloquent nin in buquint su l'papi qu'y z'ont disposé les lettes dins le sens A ZERTY pour que stastistiquemint ( j'cause beau hein?) les marteaux y s'croistent nin... hé bé ch'est nin clair m"n'histoire..
J'cros bin qui a des viux trucs que cha va disparaite ou aller dins des musées... comme el taille crayon...
Y'avot toudis des crayons qu'in cacho à faire des longues taillures ( cha sintot bon !) et pis l'mine elle piquot et souvint cha s'cassot et y fallot arcominchi.

Vous avez connu ches crayons qu'in taillot des 2 bouts? à la fin, ch'étot des tiots quéneques... y'avot nin d'gaspillache.

In avot un cousin de m'momère qui étot épicier laitier dins sin tub ( un camion) et y avot toudis sin crayon su s'n'oreile et des tickets d'caisse manuscrits.
Y comptot dins un sens, pis din l'aut sens à toute allure et l'compte y'étot bon.
L'aut jour, j'vos m'file qui pose un calcul tout simpe su l'calculette... cha m'a fait frémir!

Fin juin 1973, j'ai pas cor 17 ins et min BEP sténo-dactylo tout frais in poque... et j'troufe début juillet un rimplacemint d'deux mos dins un secrétariat.
L'premi jour min chef me donne un brouillon d'lette à buquer, in m'précisant bin qui n'voulot pas d'rafistolache mais eune bielle pache et qu'i veut cha au pus vite...
Me v'la devint m'machine à écrire, à faire cheule lette, assez fière d'mi car j'avos arcomminché que deux fos avint qu'cha seuche parfait. J'vas dins l'bureau du chef et avec un tiot peu d'appréhension quind même j'y donne l'lette.
I ravisse et tout d'suite, i deminde quoque qu'ch'est que c'te présintation su un ton très mécontint !! J'y réponds que j'ai présinté l'lette comme j'avos appris à l'école et là i prind l'lette, la déchire et me dit d'arcommincher avec l'présintation qui est la leur, que cha fait des années qui font ainsi et que ch'est pas mi qui allot tout canger !!! Ben in m'aurot donné un cop d'massue que j'auros pas été pus estourbie !!!
Eune fos arvenue dins min bureau j'ai brai in cachant dins les courriers archivés commint in devot faire leu présintation, pis j'ai arcomminché l'lette.... A à peine 15 jours de la fin d'l'école j'me sus rindue compte qu'i avot un rude fossé intre c'qu'in t'apprind à l'école et c'qui s'fait dins l'monte du traval...
Cha s'rot asteur, in deux ou tros clics l'lette s'rot arfaite in deux timps, tros mouvemints...

Cha srot à ch't'heure, l'patron y'arot été in justice pour harcelemint moral...Déchirer sin papi et faire braire eune pauff guernoule qui sort ed l'école in faijant d'sin miux!
Ch'étot comme cha que l'méti y rintrot à l'époque!

1949. J' étos à l' armèe. L' commandant de companie m' demante si que j' veux ète sin secrétaire. J' li réponds qu' j' aim'ros miux daller ouvrer aux garaches d' sur les moteurs d' camions. I m' répond, j' sus obligé d' vous printe comme secrétaire, jé n' ai pas d' autes que j' pourros mète à vous plache...in Français naturell'mint.....Pourquoi qu'i n' davot pas d' autes, pas que jé eu l' certif in 41 et qui n' da pas grandmint qu'is zont continué d' daller à l' école pindint la guerre......Mé vla donc secrétaire d' vant eune machine à écrire 14/18 aveuc un clavier QWERTI (j'cros) ! ! ! que malheur, mi qui n' avot jamais vu eune machine à écrire ni d' près ni d' loin ! ! ! J' peux dire qué j' in n' ai bavé avec cha ! ! ! Passer du clavier QWER à l' AZERTY n' m' a pas posé d' problème pusque j' savos pas buquer aussi bin aveuc l' un qu' aveuc l' aute......... Cha fait 60 ans que j' buque d'sur un clavier et j'buque core in ravisant mes dogts ! ! !
. Si qu' in apprind pas à l' école, in est mal barré ! ! ! !