Mes gins, j'comminche à avoir de l'funquée qui sort par mes orelles et mes tros d'nez, tellemint cha cogite dins m'tiote tiête !!!
A la fin de cheule semaine in arçoit un groupe de 35 musiciens qui vienn'tent de l'région de Limoges pou faire un concert in commun avec nou orchestre. In est pus ou moins jumelé avec cheule harmonie.
Alors bin sur, i faut de l'logistique et d'l'organisation et d'pis pus d'eune semaine in travalle à pusieurs à cha. J'peux vos dire que min homme et mi in n's'ennuie pas l'soir et que l'ordinateur i cauffe !
Comme j'sus l'secrétaire de nou orchestre j'ai donc fait des papiers pou savoir qui pouvot héberger, qui venot au repas qu'in a in commun l'samedi soir et pis l'diminche midi, qui pouvot aider etc, etc... avec bin sur des dates butoir pou chés réponses pou qu'in ait l'timps d'bin tout organiser.
Si j'vos dis que j'cueure cor après des réponses cha va pas vos étonner, i n'd'a toudis qui plann'tent à 15000 sins avoir b'soin d'grimper dins un aéroplane !!!
Infin hier au soir 20 h tout étot à peu près bouclé, surtout au niveau des répartitions des musiciens dins les familes qui voulottent bin héberger (pace que bin sur ch'est pas tout l'monte qui peut ou bin qui veut !)
Pis patatra, 20 h 30, émile d'un musicien ayant des soucis familiaux et qui de ce fait ne pouvot pus loger les tros personnes qui devot prinde. A 22 h, solution treuvée, après pusieurs cops d'fil intre nou chef d'orchestre et mi....
J'sus allée m'couquer continte de ch'traval finalemint rondemint mené !
Infin toute l'nuit j'ai trinsporté des gins dins m'carette à droite ou à gauche, avec leu sacs et leu instrumints et in finissot par ête in r'tard au concert !!!
C'matin j'me lèfe l'tiête dins l'séau, et ne travaillant pas aujourd'hui j'me plonge dins l'liste des courses pou vir si in a rin oblié..... et ch'étot putôt positif
MAIS, cop d'fil à midi de min chef, nouvieau problème, faut arcaser chés tros musiciens pace que l'solution trouvée n'étot pus possipe !!!!

Alors j'm'arrache les caveux pace que pou l'instant je n'd'ai pas d'solution.... in invoie des émiles à des amis pou vir quoque y s'rot possipe ! mi j'in couque déjà 4 (min chef aussi) et ch'est pas trop l'époque d'mette eune tente dins l'gardin....
Asteur j'crose les dogts car l'nompe des musiciens attindus étot susceptipe de canger, reste à espérer qui va pas y in avoir d'pus !!!!....

Et vos savez l'pire dins tout cha, bin j'ai pus gramint d'timps pou travaller mes partitions...... in pus j'viens babeller avec vosautes !!!
Allez j'm'in vas installer min pupitre !

Cha i est, t'as répété in faisant quelque canards pa'c'que t'portée elle étot pleine d'musiciens in vadroulle plutôt que d'notes ? J'voudros bin t'aidée mais l'champe que j'avos d'libe elle est occupée astheure par min fieu....et j'crèche trop loin surtout avec les problèmes d'carburant..... mais j'chus sure que t'as trouvé t'solution et que t'tiète elle cauffe moinssss

Et te te plains?

Pinse qu'i n'd'a qui aimerottent tellemint pouvoir s'arracher lus cavux....

I a personne qui a un camping car dins tin groupe?

y a pon eune salle d'patronnache dins tin coin? aveuc un bon matelas pneumatique qui s'gonféle tout seu, cha pourrot pon faire l'affaire?

ch'est pas qu'in aurot pas eune salle municipale pou les mette couquer mais comme ch'est eune semaine culturelle dins l'villache, toutes les salles potapes sont "prises" pour les différints spectaques....
pis quind in va chez eux vers Limoges in est toudis super bin reçu dins les familes....

MAIS MAIS ! roulemint d'timbour rrrrrrrrrrrrrrrr, cha y est j'ai treuvé l'solution !!!!
c'soir in est allé vir l'canteuse Jeanne Chérhal in concert (j'vos la conselle, ch'est eune tiote bonne femme toute mignonne, pleine de talent et très pétillante, i a fallu que j'freume l'bouque de min homme qui bafellot d'vint l'tiote mini jupe !)....
bref, au concert j'ai rincontré quequ'un de l'orchestre et bin sur in a parlé du logemint des musiciens et là, alle me dit qu'elle peut s'arringer pou loger deux personnes d'pus si in a pas d'aute solution....... j'ai sauté su l'occasion et tout d'suite dit qu'in prenot cheule solution !!!
Finalemint cha sert d'aller au concert... in pus d'passer un bon momint in troufe à régler chés problèmes !

j'connos jeanne cherhal...ché vrai qu'ché frais cha qu'elle cante, all a eune belle tiote voix
tant miux si que t'as pu treuver eune solution, cha arot été dommache d'passer des nuits blanques là d'sur pis d'tindormir su t'clarinette au momint ce ch'concert!!

Un momint j'ai cru que saint Toni i étot parti avec mimi jupe et que du cop cha libérot eune plache ou deux à t'majon.

Bon, l'autre solution cha marche aussi.

Elle étot commint l'mimi jupe?

Du cop t'in mets eune aussi à ch't'heure?

batisse a écrit:

Du cop t'in mets eune aussi à ch't'heure?

pou conduire eune poussette ch'est pas pratique ! surtout que chez mi pou d'aller au villache, l'route alle grimpe, donc i faut avoir un tiot peu l'cul in busse et les bras tindus pou arriver à pousser jusqu'in haut, alors forcemint l'tissu li aussi armonterot.... j'voudros pas ête à l'origine d'carambolaches intre ceusses qui jetterottent un cop d'oel au tableau !

pis dis donc quoque t'incinère ? j'ai pas b'soin d'cha pou séduire min homme

sinon pisque chés hommes cha a l'air d'les intéresser, l'tiot rope de Jeanne Chérhal, alle étot in tissu brillant or, avec les épaules découvertes et pou fin du spectaque et l'rappel alle avot mis un short (mini li aussi) avec un bustier, brillant or aussi.....
valà d'quo vos faire rêver !!! z'avez vu que j'pinse à vos faire plaiji

bin dit donc; t'est obligée ed mette tin cul in buse pour pour pousser el poussette, cha s'appelle del provocation cha!!!

Ch'est nin de là que cha viendrot "la raie de busse"?

Cha ne se vot nin, mais j'ai honte....

tiote bellotte a écrit:

pis dis donc quoque t'incinère ? j'ai pas b'soin d'cha pou séduire min homme

Ah ouais ch'est vrai, ti t'as t'babelle, l'histoire de l'vie de tin quien tchand que t'étos gamine et pis tout cha....

Saint Toni? Ouais, assurémint... te m'étonnes qui arluque in bafilint sin tiot tchul à eune jone guernoule qui fait tout pour qu'in le voiche

j'y pinse,pour loger ches gins faut les invoyer dins einne since,dins ches étapes à pailles y dormiront là et is auront pas frod,ch'est faisap nan !

on m' a dit que ré n' pouvo pus arracher tes caveux tiote belote parce que té porte eune perruque on m'a meme raconté que des fos té l'perd in route quand t'amène les tiots à l'école.

nounours-94 a écrit:

on m' a dit que ré n' pouvo pus arracher tes caveux tiote belote parce que té porte eune perruque on m'a meme raconté que des fos té l'perd in route quand t'amène les tiots à l'école.

surtout quind i a du vint.......

batisse a écrit:

Ch'est nin de là que cha viendrot "la raie de busse"?
Cha ne se vot nin, mais j'ai honte....

t'as honte ? j'sais pas pourquo mais j'y cros pas....

vos pinsez qu'ch'est possipe que d'ichi diminche, j'perde un tiot peu d'boudinette ???
pace que cha pourrot bin ête à c'concert ci que mes boutons d'quemiche is pètent et partent comme eune fusée su l'tiete de ch'ti qui sera d'vint mi...
j'viens d'arpasser m'quemiche, j'viens d'l'infiler .... mais pouquo j'ai mingé de l'fondue et de l'tartiflette cet été in montane !!!

quequ'un aurot un corset à m'prêter ???

Te sais tiote, si te comprime avec un corset, cha arsort aud'sur ou ind'sous .....à ti d'choisir !

in copant ech corset in deux , cha sortira des deux cotés , cha équilibra

Bin, vos savez pas quo mes gins ? finalemint in a eu trop d'plache !!!! i a eu tros désistemints d'dernière minute dins l'orchestre limougeot...
In a passé un super ouiquende, rimpli de rire et de musique.
Le concert s'est bin passé (mes boutons ont tenu !), i avot gramint d'monte, c'qui n'étot pas gagné d'avinche pou un diminche matin, in a du rajeuter des cayelles.
L'timps a passé à l'vitesse grind V et in est arrivé à l'heure de l'séparation sins s'in rinde compte... des amitiés nouvielles se sont créées parmi chez jones qui n'faisottent pas cor partie des deux orchestres à nou derni écange...
Pis j'ai eu eune drôle d'surprise, nou chef d'orchestre m'a armercié devint tertous et in m'offrant un bieau bouquet d'fleurs pou tout l'ouvrache que j'avos fait, bin vos pouvez m'croire j'ai versé eune tiote larme, j'savos pus quo dire !

Bref, quoque qu'cha fait du bin d'passer des momints ainsi !

C'matin cha a été un aute momint d'musique mais pas pou les mêmes circonstances, eune amie du quintette de clarinettes a perdu sa grind mère et in est allé juer à l'églisse pou la messe.
Ch'étot évident pou nosautes d'aller la soutenir car alle étot très proche de sa grind mère, qu'in avot eu l'occasion d'rincontrer, pis les amis ch'est pas fait que pou partager les momints festifs...
Heureusemint tous les membres du quintette étottent disponipes, 2 artraités, nou jonesse qui est prof (donc in vagances scolaires) et mi qui travalle pas les mercredi.
In a jué tros adagio de Mozart.

Cha devot ête poignant dins l'églisse !

Ouais Matante, surtout que les 13 arrières tiots infints ont tertous participé à leu manière, in lisant un texte, in déposant des fleurs... Cheule vielle dame étot très aimée et intourée par sa famille et par les gins du villache d'ù qu'in étot.