In c'jour de rintrée des classes, j'me sus ramintuvée m'rintrée in 6ème...
D'ja ch'étot quette cosse d'faire sin intrée au collèche-lycée d'Denain, in étot parti pou d'nouvielles avintures ! j'avos pris l'car d'ramassache avec min frère qui li étot in grind d'3ème ! in arrivant dins l'cour du collèche i fallot attinte l'appel d'sin nom et s'mette in rang dins les grinds carrés dessinés au sol à l'craie, in carré pou chaque classe d'6ème (j'cros que l'appel étot fait que pou les "tiots" 6ème, les "pus viux" cachottent leu nom su des listes)
A la fin d'l'appel j'étos continte pace que le hasard avot fait que j'm'artrouvos dins l'même classe qu'in tiot cousin à mi, que j'savos même pas qui s'rot dins l'même collèche que mi... in étot donc tertous bin in rang à acouter l'proviseur, très impressionnant, qui nos donnot des détals su l'organisation, tout cha avec sérieux, in intendot les mouques voler, et là d'un cop, min cousin, voulant sins doute faire l'malin, m'pousse un grind cop et v'la ti pas que j'sors du rang comme eune fusée juste au momint d'ù que l'proviseur s'trouvot devint nou carré
Là j'ai connu un grind momint d'solitude, l'proviseur me disant "eh bien mademoiselle ça commence bien, on se distingue !!" mi rouche de honte j'babouillos des escusez me, j'me veyos déjà convoquée et marquée au rouche dins sin carnet "spécial perturbateur"... mais ouf ! i avot d'autes cats à fouetter in c'jour de rintrée

Queques timps pus tard, j'avos été convoquée dins sin bureau pace j'avos cassé eune assiette à la cantine, in voulant faire comme dins l'pub arcopal "jolie à table, solide au four" j'avos buqué l'assiette contre l'tape, mais mi elle étot pas solide min assiette ! et crac !, bin in attindant dins l'couloir devint l'porte du bureau de ch'proviseur j'avos la troulle qu'i m'arconnaiche mais incor heureusemint pou mi, m'binette alle i rappelot rin... et j'ai foque écopé d'eune remontrance