l'année dernière au mos d'Aout j'ai fait des visites patoisantes à ch'beffroi d'Arras, ch't'année ché au musée qu'cha va s'passer(à partir du 13 aout,les venderdis et sam'dis soir)
et dins ché textes que j'ai à apprinte,in v'là chi un qui m'a bin plu....
par contre,j'ai treuvé l'orthographe compliquée et pon toudis logique...mais bon....


édu qu'alle est seigneur,el familièr' cité
qu'all' conservaut sitant ech l'impreinte ed nou pères?
n'iavaut pon d'grands boul'vards,ni d'électrichité
mais chétaut,réell'mint ein' pétiot vill' pépére!

in n'voeïaut pon ,adon,des mass' d'autos filer
tout au long d'eine journée,in quatriém' vitesse
et ch'piéton n'avaut pon l'craint' dé s'vir rétalé
dins l'ru; ses oche',à m'sur' réduits in boullabaisse!

bien du contrair',ché gosse' i' pouvautt,sans dinger
au mitan de ch'pavé,d'meurer des heure' intières,
n'ayant,el pus souvin', d'leus jux,à s'déringer
qu'pour ech marchand d'carbon,ou bien qu'pour el laitière

sur ech trottoir, l'été,in attindant l'momint
dé s'couquer,des voësins s'accordautt ech bien être
ed printe insonne el frais, in édvisant long'mint,
assis sur leus caïell's,vis à vis leu fernette

et dins ché réunions,dù qu' chaquein ,à sin tour
déballaut,ché l'cas d'dir', des nouvell' à l'fournée,
in apprindaut pu vit' qu'par el gazett' du jour
chou qui s'passaut dins l'ville;tout au long d'einne année

in prenautt not' plaisi à sauter à l'ognon
à juer à l'chavatte,aux barre' ou à l'tiquette
adon qu'chés fill's,tout in cantant,tournautt in rond,
sautautt à l'corde et pis s"amusautt à l'raquette

mais grand Diu equ c'est lon tout cha! faut des cavieux
tout blancs edsur és têt,pou' n'n'avoir el souv'nance
et pouvoir argretter,qu'dins ch'pat'lin d'nou z'aïeux
qu'in euche laiché sombrer si bell's accoutumances!

dins tous les cas, j'prétinds,mi,qu'à l'heur' d'aujourd'hui
nous gins n'profit'nt-té pu d'agrémints in série,
ech football' qui ,l'diminche atténu' leu innui,
n'contint' pon,dins l'semain',batiche et ni marie!

ché voësins n'os'n-té pu, au bon temps, s'installer
par devant leu mason, assis sur leu caïelle,
et ché group'mints jïoeux,que j'sus t'hureux d'rapp'ler
i z'ont fondu,tertous,comm' du burre in païelle

v'là pourquoë,quand qu'j'arpinse à l'familièr' cité
qu'all 'conservaut si bien ech l'impreinte ed nou pères
j'ai moins cair ché boul'vards d'achteur,in vérité
aqu nou viell's rue' dù qu'in vivaut si pépères!!

Ch'est vrai que l'orthographe elle est discutape...

Et te vas apprinte tout cha par tchoeur? Eh ben t'as du mérite! Combien de timps que te mets pour apprinte eune tirate parelle?

Dis me, pour m'culture générale, chu quel ton que te vas déclamer cha? L'air d'avoir le moral dins tes cauchettes ou l'air plutôt injué d'eune visse femme qu'elle évolue avec sin timps?

edvine.....

Mi je devine que ch'est l'deuxième solution. Si que j'ai bon, j'applaudis des deux mains.

Ouais, je sais, applaudir avec foque eune main, cha fait moins de brut...

Ch'est vrai que ch'est un long texte, i a du boulot à apprinte tout cha et té dis que ch'est un des textes, t'in a combien à apprinte comme cha?
Té va cor t'ardéguiser alors, té nous inverra des photos hein!

que j'ai querre lire des poèmes ainsi!
cha dot core ête plus biau d'l'attinte dire.
j'pourros nin apprinte cha nan pus mi...
d'jà qu'à l'école j'arrivos nin à apprinte eun' récitation.
in tout cas ch'est in biau poème,et du vécu.

J'parie aussi qu'cha sera l'deuxième solution.
Ch'est bien bieau, pas facile à apprinde.
ch'est bien dit :d'belles accoutumances.