L’œil éteint, s’ vieill’ piau tout’ jonne,
I n’est point gai, l’ vieux mineur !
Eun’ fichelle artient s’ marronne,
Et cha n’annonc’ point l’ bonheur.
I démeure avec és fille ;
Ch’est li qui soign’ les infants,
Il touille el’ soupe éd’sus l’ grille,
In bertonnant d’ timps en temps.
I s’imbête, et cha l’ tracasse,
Il n’ peut pus sarcler s’ gardin.
Quand el’ pauv’ vieux i s’abasse,
S’ tiête all’ tourn’ comme un moulin.
Etr’ toudis dins s’ bac à chintes...
Incor s’il sarot marcher,
Il irot boir’ des bonn’s pintes !
Mais i pourrot s’écrouler...
I n’oubli’ foque és’ misère
Qu’ quand ses infants sont tertous,
L’ soir, à l’intour dé s’ kaïère,
Et qui lieu parl’ des grisous.
Il a tout vu dins les fosses :
Ses sauv’tag’s i sont curieux.
Leus cœurs palpit’nt, les tiots gosses,
In acoutant l’ pauver’ vieux.
In v’not l’ quère à chaqu’ minute
Quand arrivot d’ z’accidints.
Combin d’ cops i-a fait la lutte
Avec l’ grisou grign’-dints ?
Il a tell’mint des blessures,
Qu’in n’ sarot pus les compter.
Il est couvert ed’ coutures,
Pir’ qu’un ancien guernadier.
Si cha s’rot parmi l’ mitralle
Qui s’arot si bien conduit,
Il arot d’ pus d’eun’ médalle ;
Mais il s’est battu dins l’ nuit.
Va ! consol-té, brav’ Batisse :
Les rubans, t’ les a d’sus t’ piau.
In vot bien qu’ t’as du service :
T’ carcass’, ch’est un vieux drapeau !
Jules MOUSSERON (1868-1943)
Sujet: Le vieux mineur 
Sam 26 Déc 2009 - 15:30
