Des fos in a des cerveaux - des cervelles pour les guernoules - qui font des rapprochemints rigolos.
D't'à l'heure je cachos eune photo pour faire indever un pote et me vlà parti dins min stock, pourtint limité par rapport à grammint, de photos numériques chu disque dur.
I a belle lurette que je ringe - si si ch'est possible, que ceux qui m'ont connu plus jone sertent lus guiffes - les photos par grinds sujets, pour avir eune meilleure chince de les artrouver.
Et ch'est là que min cerveau - je ne vous arfais nin le coup de l'cervelle, cha ferot récauffé - i s'a souvenu des scéinces de diaporamas d'artour de vacinches ou de voyache ichi ou là.
Tcheue corvée... "alors te vos, là ch'est d'ùche qu'i avot un guichet qu'in pouvot acater des tickets pour un tour in batieau et blablabla et blablabla".
Alors valà. Cha ch'est typique des festivités que j'évite si que je n'd'ai l'occasion.
Est-ce que je chus le seul intisocial ou est-ce qu'i n'd'a des autres pour me soutenir ichi dins le tiot groupe des guerriers du chef énino?
Et vousautes, ch'est quo les festivités que vous aimez et celles que vous n'aimez nin?
Finalemint, j'ai nin artrouvé l'photo que je cachos. Je me deminte si que je l'avos inregistrée...