EL MASON
El mason, si qu'al povot parler, a' n'in dirot gramint !
Ch'est point foque ein tot, des briques, du bos, pi du chimint,
Al a intindu des gins rire et pi braire, a' n'érot à dire.
Em mason, el perte, én pu l'vir, pour mi, cha sérot cha l'pire ...
J'arvos cor min père dins l'cuisine qui lijot sin jornal,
J'intinds cor ém mère qui, in li parlant, finichot sin traval,
J'acoutos dins min lit chés bruits dé l'mason qu'al s'indormot,
J'oblios ein molé qu'dins l'jour, j'avos'té ein téjarmau !
Rassennés à l'intour dé l'tape au soir, chacun contot s'jornée,
Pad'zous dé l'lampe, qu'i téjot bon à ch'cuin dé l'quéminée !
Ein' mason ch'est comme ein' gins, cha sint si qu'té l'a quer,
Et mes parints, pour cha, i'l'avot't é vraimint quer !
ln arvé'iant tout cha, jé m'dis qu'in a té chi bénache
Té vos toudis pu clair quand qu't'avanches in ache!
ln sait qu'pour èt' contint, i n'tallot point grand cosse.
Ej busie à min jon.ne temps et tout cha pour mi, ch'est quet'cosse !
Ein' mason cha vit, eq té faiches bin ou mau, al té l'rindra.
Min père souvint i l'dijot : "té vérras fiu, ti aussi, té l'compardras.
A chaque fos qu'j'arvénos chi, al attindot après mi,
Ech l'éfant d'Artois qué j'sus, i n'peut mie oblier sin biau païs.
Ches meupes, ches tapes, ches amares, ches caïelles,
Si qu'i parlot't cha sérot pour dire: "ét' mère ch'étot ein'bonne vielle".
A nuit quéqu'fos, j'essaie d'rintinte ches bruits qu'j'avos si quer :
Ein' castrole qu'in bouche, ein' séquoi qu'in fait querre.
Quand qué l'momint qu'i arrife ed s'arnaller lon d'ichi, .
Ej dis toudis, ch'est sùr, j'arvé.nrai morir par chi,
Tous ches ramintuv'ries i armont't, al danst't é d'vant mes yux,
Ma pinse, ch'est pétète cha, ev'nir viux ?
Nou mason, tous ches tos qué j't'arvos,jé m'sins cor jon.ne,
Comme dé ch'temp qué j'montos dins nou ape à pron.nes !
Nou mason, pu qué j'viuzis, puqué j'té dos gramint,
Pas'que dins tous ches pièches, ch'est cor ti qui m'pales el miux ed mes parints!
Guy Penet
Sujet: EL MASON 
Mar 19 Jan 2010 - 23:51
