[size=32]Cafougnette à l' messe [/size]
J'arrive là, chétot comme à l'arc ed'Triomphe ? J'rinte là d'dins, et quo que j'vos ? A gauche inne cuvette avec de l'ieau et tous chés gins qui rintrotent, is trimpottent leus mains ed'dins. Is s'in mettottent sus leu front, et pis y s' essuyottent un tiot peu partout.
Ch'est bien, ej'continue d'avancher, chétot comme dins in théate ; i avot des cayelles tout partout, sans numéro, et chés gins s'asseyottent n'importe dû sans qu'in leu diche rien.
Pour mi i n'avot point d'électricité, ch'étot éclairé avec des candelles. Ej ravisos ed'tous mes yux, ej'veyos ches gins qui s'elvottent, pis qui s'asseyottent sans q'in leu diche rien. Mais mi, pus malin ques'auts, pous' attraper quand is s'sont assis, j'ai resté étampé ; car comme cha j'ai pu viretout ch'cirque.
Là bos pad'vant y avot in grand comptoir avec gramint d'candelles ed-sus, et y n'avot in, in grand, qui
étot habillé avec des rideaux, et pis chinq ou sisse p'tiots habillés aussi avec des rideaux. Y devot y avoir des mouques dins d' église pasque ch'grand y a pris es'pomp à flytox et i n'a j'té in tiot peu partout. Jel'veyos marcher d'min côté, et v'la ti pas qu'arrivé à m'n'hauteur, i m'ravisse et i m'dit : « Secudum Secula » ; cha n'm'ma point fait plaisi, mais ché rien, je l'rattraperai in jour.
Après cha i est arpati du côté d'sin comptoir et chés p'tits jones qui étotent là habillés in rideaux is li ont
fait inne farce ; sin tapis d'cartes qui étot à droite is li on porté à gauche, et sin roman qui étot à gauche, is li ont porté à droite. En véyant cha, ej'grand i allot pus du tout : i tapot et i tapot sus panche ; alors pour s'armette, i a pris inne clé pour ouvrir es'boîte à pharmacie et là d'dins i a pris inne pastille dins inne boîte in or. J'suppose qu'cha n'voulot point passé ; heureusement qui i a in p'tiot qui li a porté à boire. Après cha
été tout d'suite miu piss'qui s'a mis à canter. J'y comprins rien, cha doit ète du Grec ou d'l'Hébreux. Ouais,
mais v'la ti pas qu'à faire tous ché machins là i perd sin capiau. I s'a mis à cacher après sans l'artrouver ;
alors ech'jone i s'a mis à sonner et tout l'monde i s'a mis à cacher après ch'capiau, mais i a personne qui
l'a artrouvé.
Alors in a fait inne quéte pour in racater in aut' ; tout l'mont' i a mis des sous ; cha l'a rassuré un tiot peu
et i s'a mis à g'noux et i a raconté des histoires tout seu, comme in sot.
Quand i s'a relvé, in li a rapporté sin capiau, mais i n'a point rindu ches sous.