J'ai acaté un four pour m'nouvielle majon. Un bieau, moderne et tout. Tout plein d'éleuctronique. I n'a aucun bouton; foque un écran tactile avec des tiots dessins. Je veux être un papy moderne pour que mes afants et tiots afants is ne rittent nin trop de mi. Surtout qu'is aimtent cha... ch'est un tiot peu de m'faute: je les ai mal éduqués in riint des fos d'eux!!!!

Ouais, eh ben je chus tout défoutu à cause de ch'bazar. In crot que ch'est moderne et in fait ch'est un modernisse qui ne sert à rin et, pire, qui gêne in prenint l'plache de séquos qu'in comprind et qu'in a beso.

Ch'four i me fait pinser à nous hommes et guernoules politiques. A les acouter ou lire, tout est simple et is distent tertous qu'avec eusautes l'vie va être plus bielle et tout va aller jus sins savon. Jusqu'à ce qu'in se rinde compte que ch'est incore eune fos des cacoules.

Alors valà, j'ai un four que si te li mets eune pizza congelée, i sait de li-même quo qu'i dot in faire. Si te ne cros nin cheule-là, i t'in raconte eune autre. Déjà i ne te deminte  nin l'talle de t'pizza. Donc, 150g ou 1kg, ch'est parel. I sait quo qu'i faut faire mais à un momint i deminte quind même de vérifier si que ch'est cuit! Parel pour décongeler du pain. I a un programme exprès. Waouh qu'in se dit, cha ch'est moderne! Ouais, ben  comme j'avos un pain congelé, je m'ai dit que j'allos essayer ch'programme-là pour vir. Et j'ai vu... Déjà i faut arriver au programme, insuite i dit "ch'est mi qui règle l'timpérature, ti te t'occupes de combien de timps i faut programmer. In sachint qu'in part d'un four frod qu'in ne sait nin à quelle vutesse i cauffe, t'as belle mine!

Et cha qui me fait bouillir de rache, ch'est que chu ch'bazar hyper moderne, i n'a nin moyen de savoir quelle timpérature i fait dins le four, et i a nin moyen d'alleumer l'lumière autremint qu'in ouvrint l'porte. Je ne chus nin là de faire un soufflé...

J'étos déjà fâché avec les autos modernes. A ch't'heure ch'est avec l'électroménager moderne! In puq je chus à peu près sur qu'i ne va nin durer 10 ins sins tcherre in panne. In panne éleuctronique bin sur, que personne i comprind et qu'i vaut mieux chinger tout le bazar!

Salut Batisse
ch'té plein d'tout min coeur
Donne l'marque qu'in fasse pas l'même erreur j'dos faire m'cuisine ch't'été
Bon courach' avec t'n'usine à gaz seulemint électrique
@D Cauchette

Je ne vas nin dire l'marque pour nin avoir d'histoires, mais cha comminche par un W et ch'est hyper connu

. Cha fait deux messaches qu'j'écris et qu'is veultent pas partir...........armets tin four dins sin carton et rinvoye le au vindeux......fais te rimbourser.....T'as l'drot....
pépéPéBé
Cha comminche par un W et cha s'termine par un l...j'ai gagné ? ? ?

Houla ouais, in vit eune drôle d'époque dins laquelle l'technique elle nous dépasse des fos, et que de toute évidinche cha fait un momint que l'bon sins i a été foutu à luche...

In ch'momint, après que j'ai déménagé, j'ai des misères pour avoir eune ligne de téléphone/internet. Je m'ai inscrit chez un fournisseux d'accès qui utilise les réseaux oranche pour aliminter ses cliints. Et i me dit "in a un problème avec vousaute: i n'a nin de ligne de libre dins vou secteur, alors - et ch'est là qu'i fait se tenir à les branques - in vous deminte de contacter oranche pour qu'is vous instaltent eune ligne. Eune fos que cha sera fait, vous nous le direz et in pourra se brincher dessur. Pour l'instint, rindez nous l'box qu'in vous a invoyée".

Mi, cha qui m'étonne, ch'est qui distent cha sins simbler se rinte compte du ridicule de l'situation. Commint que mi qui ne suis nin cliint chez oranche je pourros avoir plus de poids qu'un fournisseux d'accès, qui loue les lignes à oranche in pagaille? Pourquo ch'est à mi de faire lu boulot? D'autint qu'après is vont me l'faire payer tous les mos l'ligne que j'arai ouverte pour eux!

Alors mi je vais aller vir oranche et je vas leur dire que si qu'is arrivtent à me donner eune ligne is auront prouvé qu'is sont meilleux que les autres et que pour les féliciter je vas lu confier à eusautes min contrat de téléphone/internet filaire, même si ch'est plus cher, et qu'in prime is vont aussi récupérer l'contrat "mobile" que j'ai actuellemint chez l'autre incapape!

Pour l'instint pour internet je me débroule avec min mobile que j'utilisse in guisse de modem, mais je ne vous raconte nin le brun vu qu'i faut s'arconnecter de timps in timps et qu'à chaque cop ch'est du long jus. Et in puq, cha bouffe les batteries à l'vutesse grind v!

Mais i parait qu'in est plus heureux à ch't'heure......

Salut Batisse
J'sus in peu comm' ti, j'viens faire construire et pas de ligne non plus, j'ai été obligé de prinde Oranche pour faire installer ligne et après j'ai arbasculé ché Fregratuit
Pendant trois mois j'ai gardé l'ancienne ligne chez Fr... et ensuite j'ai rebasculé cha m'a coûté les trois mois de locations à Oranche
j'auro put faire dès le ledemain mais j'ai estimé que trois mois cha leur payot les frais lol et comme j'avot gardé l'ancienne ligne la bascule m'a rien coûté
Bon courache

Avec tin nouveau four, t'as nin incore tout treuvé quo qu'te peux faire !

Par exemple, t'invoie un mèle à un poulet,et y va v'nir s'mette à cuire , t'a foque à dire à quelle heure te veux l'minger 

t'es devrot p'tèt essayé cha comme cha

I mettrot p'tèt lumière
j'ose pas dir l'reste lol

T'es eune rute bante de rieux de gins tisautes.

Depuis d't'à l'heure j'ai été chez Oranche - histoire aussi de sortir m'mobylette avint l'pleufe - et là cha a été vite réglé. I a effectivemint un ptroblème chu l'ligne, pour l'instint nin compatible avec l'adsl, mais après un cop de téléphone au bon service par quelqu'un qui sait de quo qu'i cause, min affaire elle devrot être réparée assez vite. Is s'in occuptent. In me rappelle samedi au matin pour dire si que cha a été fait. 

Même sins être sur du résultat, je chus contint parce que je connos infin le fin mot de l'histoire et que j'ai l'impression d'avoir à ch't'heure à faire à des gins compétints.

Pour min four, j'ai exposé mes désillusions au fabriquint. I m'a déjà répondu eune séquo dins le ginre "ch'est eune machine qui vous parle, n'essayez nin de réponte. In tous les cas, vous messache i est bin arrivé et dès que possipe i a un humain qui vous répondra". Je chus curieux de vir si que cha va vraimint arriver. J'ai comme qui dirot un doute

Batisse, t'es sûr qui fallot pas printe des suppléments ou des accessoires pour avoir l'température et pis tout l'reste?
In s'qui concerne tin téléphone et Internénet mi j'ai oranch' et d'pis des lustres et j'touche du bos mais j'ai toudis eu des réponses à mes questions (peut ête que j'les posos bien) par des gins compétants sans accent, et jamais eu trop d'problinmes avec el ligne. Mais ch'est pus chèr d'accord.
Alors Batisse t'as déménagé? t'es pas v'nu dins l'62? Dins l'62 is ont tous l'ADSL té sais.

Ben ouais, i faut bin qu'is s'consoltent!

Ch'est ti qui a comminchi, voyou de boyau rouche.....

Mi j'treufe cha bien les timps modernes, j'ai même akaté ène auto auto matique qu'in peut aussi changer d'vitesses si qu'in veut, qui peut faire des créneaux toute seule et incore toutes sortes d'autes bazars qui serf'tent  jomais...

Pour tin machin d'internet, te d'vros aller d'minder l'mot d'passe d'sin réseau à un vigin in n'sait jomais.....Si t'es client du même FAI cha d'vrot aller non ?

vous m'connaissez, j'sus nin réfractaire à chés cosses modernes, j'me débroulle putôt bin avec chés bazars là, des fos pas tout d'suite, mais j'sus têtue et j'finis toudis par comprinde au moins à 75 % .....
N'impêche que j'sus un tiot peu comme ti Batisse avec min four micro onde tout neuf qu'a cha qui paraitrot i arrife à savoir combin tin bazar congelé i pèse et qui sait combin de temps qu'i faut pou qui seuche tout décongelé.... ce dont j'me fous complètemint pace que j'préfère me fier à min espérience, et pis que j'ai raremint des cosses à faire décongeler in vitesse, j'préfère anticiper et sortir l'bazar in avinche.
Sur c'four là j'ai des puissance de cauffache pré-inregistrées cha comminche à 90 watt pis 180 pis 360 pis 600 et là cha passe d'un cop à 900, sauf que souvint dins les cosses que t'as à faire cuire i faut l'faire à 750 watt, bin 750 avec min four j'peux nin, ch'est 600 ou 900 et là j'ai beau ête têtue i veut nin m'acouter.
Donc si j'mets 600 watt i faut que j'rajoute du temps sins in mette d'trop et si j'mets 900 i faut diminuer l'temps d'cauffache... comme cha m'énerfe un tiot peu j'ai arlu l'notice et i paraitrot que j'ai une fonction qu'in faisant je ne sais pus combin de manipulations min four i pourrot déterminer combin m'préparation elle pèse et combin de temps qu'i faut pou l'cauffache, sauf que ch'est des préparations à eusses in exempe et que ch'est pas forcémint chelles que mi j'fais, donc faut quind même juer à l'apprinti sorcier, alors j'essaie même nin, jusqu'à présint j'me sus bin débrouillée toute seule et j'ai rin fait trop cuire...
Infin tout cha cha n'vaut nin l'bain marie ou l'clair de lune à Maubeuge

Salut Tertous
J'ai deul' chance min four à mini-micro-ontes il a 25 ans puissance faible moyen ou fort  pas imbêyé
Mais j'vas avoir peur l'jour ou il faudra l'canger j'pinserai à vous'autes
Cha vas pas être triste
surtout quand j'arpinserai à tous ché messaches si y a in vindeu dins l'coin y vas pas comprind
tant pis pou li pace que vas pas tout rééxpliqué l'jus
Bonne fête à vous tous 

Cauchette

tiote bellotte a écrit:

vous m'connaissez, j'préfère anticiper et sortir l'bazar in avinche à Maubeuge

 Ch'est rigolo comme in peut faire dire n'importe quo in citint quelqu'un

In tous les cas, je chus rassuré de vir qu'eune guernoule, même têtue et même du 59 elle peut aussi avoir des misères avec des séquos électroménagers qui sont pinsés par des ingénieurs plutôt que par des utilisateurs....
In puq, si que je comprinds bin, i a aussi eune bascule chu tin microonte. D'ichi bétôt cha va aussi équeuter les pos de chuc ou épleucher les pennes tierre!

I a nin longtimps i a un garagisse qui m'a dit "si elle marche, gardez vou vielle bagnole le plus longtimps possipe. Les nouvielles ch'est que ennuis et compagnie dès qu'i a eune tiote séquo qui se met à déconner". Ch'est vrai qu'à ch't'heure, pour chinger eune impoule de phare, i faut démonter toute l'calandre, avec des otiles spéciaux bin sur. Ch'est moderne. I n'd'a des qui s'ébaubistent. Mi cha m'hérisse. Et tchand qu'in intind le prix des intretiens ou réparations, in attrape de l'urticaire. Infin, mi ouais!

Je profite de m'réponse pour réponte au flamind au sujet d'un évintuel piratache d'un réseau internénette de vijin.... L'cas i est vite réglé: aucun signal capté par min lordi! Ch'est l'campagne ichi et in n'est nin les uns chu les autres avec des murs in papi mâché.

Allez, un bon 1°mai, à l'pleufe!

Et ainsi, t'as envisagé ?

http://www.tooway.fr/


BON Premier Mai !           
                                    

Ouais, j'y ai pinsé. J'ai lu les avis et je m'ai artenu.... Tout cha que j'ai par satellite ch'est l'télé, via francesat.

J'ai treuvé su min téléphone ène séquo qui est bon pou ceusses qui ont pu grammin de mémoire,in peut vir tout partout d'où qu'in a été et à quelle heure....Ché bieau l'progrés !

Mi i me reste 755 Go. Cha va, nin beso d'être surveillé!

Sacré flamind

batisse a écrit:

Mi i me reste 755 Go. Cha va, nin beso d'être surveillé!

Sacré flamind

Mi j'mets mes photos chez "l'Cloud" Ti qui a grammin  voyagé, te sais d'où qu'cha s'treuf?
I parait qu'in pourra jomais pu perte ses photos ainsi !