Je deminde cha parce qu'i m'a arrivé eune drôle de séquo avint hier au soir.

A l'fin d'eune tournée que j'avos du faire dins le quart nord-est, et alors que j'avos rin bu d'alcoolisé de l'journée, forchémint, j'ai intindu un gros bruit dins m'caméonette, comme si eune séquo avait tché par tierre, et l'écran de min gps s'est artrouvé tout cron, comme si qu'i avot pris eune margnouffe chu s'guiffe.

I étot 21h30, i faijot noir, je roulos drot, mes carreaux is étotent fermés. Du coup j'ai mis de l'leumière dins l'cabine, histoire de vir quo qu'i avot tché et..... rin! Je ne sais nin pourquo que min gps is s'a artrouvé de traviole.

Pour mi cha restera un mystère.

I n'a qu'à mi que cha arrife des séquos ainsi, ou ch'est déjà arrivé à des gins que vous connaichis et qui sont de bonne fo? 

Hoooou, hoooou.....

Bin cha ch'est eune bonne histoire pour halloween nan ! J'sus cholaille à pinsser à l'tiête que t'as du faire mais bon vaut miux qu'cha seuche arrivé à ti qu'à mi eune affaire parelle. Amitieus'mint

Batisse t'es sur d'pas ète passé d'sur eune poubelle importée par l'vint.... un bari d'200 lites
.         un pot d"échapp'mint perdu d'sur l'route.
.         un gros quien perdu
.         un chinglier égaré...
.         eune grand mère habillée tout in noir qut'aros pas vue ? ? 
In sait jamais? ? ?
  "Mi j'dis cha j'dis rin ch'est pour rinte service...bin sur"

Ch'est vrai que des fos i a des cosses bizarres....
Mi une fos j'ai rêvé d'un ami qui m'appelot au s'cours avec un bruit d'fond d'verres, j'me sus réveillée in sursaut, pis j'me sus rindormie... l'lendemain au matin dins min bufet, j'avos 4 verres d'cassés, alors que l'étagère et les autes verres étottent bin in plache ! bin j'peux vos dire que j'étos vraimint fort mal à l'aise tout l'jornée... même incore maintenaint quind j'y arpinse pus d'30 ans pus tard.

In tous les cas, y a queques années, in avot des vojins qui faisottent teurner les tapes. Is nos ont proposé pusieurs fos d'assister à eune séance, in a toudis arfusé. J'voulos nin mourir d'peur ! Chés gins là ont déménagé et je n'sais nin c'qui sont devenus...
Batisse ! is sont pet ête dins l'quart Nord Est asteur !

.    Chez min grand père ch'étot l'cinéma permanint tous les soirs après souper, du timps qu'i avot pas l'télévision. Mes mononques avotent truqué  l'tape d'cuisine et li posotent des questions du ginre: "Combin qu' i a bu d'verres pépère à l' Oasis(un tiot bistrot) et l'tape boum! boum! boum!" Nous les gosses in ouvrot des yux comme des soucoupes......I faijotent monter les escaïers par l'tape..
.....In parlot d'eusses dins tout l'cité (à Mante la Jolie)..à tel point que l'Directeur d'l'usine CIMT a d'mandé un jour, à min grand père in riant  " Que faites vous,les T..... on n'entend parler que d'vous dans toute la cité ?"  Il est vrai qu'les mononques ch'étot des cas ! ! ! 
....................
J'cros pas aux fantomes bin sur mais i y a des cas troublants....par conte j'cros aux soucoupes volantes, ou plutot aux OVNI pas que j'in ai vu eune demi douzaine in même timps, in pleine nuit, et j'étos pas tout seu... ..J'vous racontrai cha pus tard.......
  "Boum! Boum! Boum!" mes chers mononques ! ! ! ! 
.........

T'as ravisé ches journaux du coin? T'auros pas écrasé qui qu'un, is cach' tent té pas après ti?

J'ai eu l'même pinsé qu'ti Marcel!!!
Ch'est eun' télé tin GPS pour avoir intindu un gros bruit comme cha?

Grand père i est arvénu.
Grand père étot décédé. Par nuit deux chéchettes veillotent ch'mort quand tot à cop, is votent l'drap s'soulièver, grand père i pliot eune gampe.......Affolée, les deux vièles finmes, s'précipitent pour sortir in criant: "Grand père i arvit ! grand père i arvit! et les vala cionchées tous les deusses dins l'intrèe de l'porte...ou plutot de l'sortie....."
Esplication: Ch'étot l'gros cat à grand père qui avot l'habitute d' dormir inter ses gampes et qui faijot l'gros dos.....
Vos parlez d'eune histoire.......fantomatique  ! ! ! ! 
   

Eune pétite histoire racontée par min comarate  Tit Louis d’ Peuplingues un soir dins les coulisses d’un théâte.
 
A Calais, avint la guerre , quand un manoqueux mourot sans famile et sans gramint d’sous , il étot pas rare d’louer les services d’un affligé qui passot s’nuit à veiller ch’mort contre un pétit billet.
In faijot alors souvint appel à  « ch’ buif » , un homme qui avot un « pied-bot » et qui rindot service in parelle circonstance .
Il étot connu que , pour pas s’innuyer pindint l’nuit qui passot à veiller un mort que souvint i n’connaichot  « ni des lèfes n i des dints » , ch’ buif i n’in profitot pour archemeler eune paire d’ bottines sur sin pied d’fer qu’il aménot avec li.
 
Un jour, Tit Louis et ses comarates font courir l’bruit qu’un des leurs est mort et i font appel à « ch’buif » qui accepte d’vénir veiller ch’mort contre eune pétite dringuelle.
 
In installe donc che tintures mortuaires et ch’faux mort i s’couche sur ch’lit avec un capelet dins ses mains , les candelles et tout l’tralala autour d’li .
 
Tit Louis et ses comarates s’étotent camuchés derrière l’ tenture et quand ch’buif a comminché à sortir ses bottines , ses clos, sin martieau et sin pied d’fer…d’eune voix venue d’outre-tompe Tit Louis i s’écrie : « Quand in velle un mort , in n’archemelle pon ses bottines ! »…
 
Chu que Tit Louis et ses comarates n’savettent pas..ch’est que « ch’ buif » il a vot été mis au courant d’ l’affaire par eune indiscrétion…alors i donne un grand cop d’martieau sur ch’mort et avec l’ même voix effrayante i crie…
 
« ..et quand in est mort..in ferme s’guiffe ! »
 
Baisses à vous z’autes…Léon

......un buif ? ch'est pas un cordonnier in argot ?
......

Cha faisot un sacré bout d'temps qu'in t'avos pas vu, j'sus toudis contint de t'lire Léon.
Qu'mint qu'cha va tin ju avec tin camarat'?

.         Quand que j'vos Léon arsém'ler ses bottines j'arvos min père....ch'est du vécu....
.         Min père m'invoyot caire 150ou 200 grammes d' séminches et un morcieau d' cuir chez l'bourrelier au fond de l'plache à Billy......du qu'i est ch'timps la ! ! ! ! i a pus....70 ans  ! ! ! !  au moyen ache....
.           

Bonjour Loumarcel,

Cha va fin bien...bien qu'in euche perdu note ami André BOURDON qui étot d' toutes nos fantaisies.

André a filmé tous nos décodaches et pourléquaches et a été l'comarate qui nous a accompagnés avec Simon Colliez dins l'avinture " Simon et Bertrand vont vous dire quoi".

André s'est battu courageusemint conte eune sale maladie ,mais in l'a porté in terre i va bétôt y avoir 15 jours.

Dins  les jours qui viennent , j'va poster l'dernier décodache qu'il avot filmé , comme un hommache à la mémoire d'un homme d'grande valeur de coeur et d'esprit.

L' venderdi  15 novempe prochain , in donne core eune fos "Léon et Gérard tout seuls à deux" au Théâte d' Béthune , à 20.00...et la totalité des intrées séra  arversée à l' Association des bénévoles de Soins Palliatifs...

Si vous pouvez in parler autour d'vous..j' sus sur qu' André i aurot été fin bénaches.

Adé.
Léon.

......Ch'est bin trisse tout cha.......
......................

1979 à la Revue de Boulogne.
L'p'tit Louis de Peuplingue...

Bonjour tertous
J'ai rectifié l'tir Léon,j'ai mis l'annonce de tin pestaque à Béthune dins l'catégorie "théâtre patoisant"
j'l'avos mis sur l'page d'accueil de min site www.videochti.fr et non sr ch'forum.
J'pinse bien que t'as là perdu un grand comarate,in ne l'connaissot nin,mais grâce à li,in aura eu des rutes parties plaigir in arvétiant toutes chés vidéos qui avot fait...à nous aussi i va nous manquer.
Vlà chi eun' tiote séquence vidéo de FR3,  in vot  André interviewé par l'journaliste.
Ch'est min tiot hommage à mi...

In lisant qu'l'André d'Léon i étot mort, j'm'a suis dit :"S'caméra elle va pu dinser !" D'où que j'savos cha ? Bin Roger te m'as donné l'réponse : avec el télé ! Baisses à vous

Ch'est vrai qu'in connaîchot pas André Bourdon, ch'étot un travailleur dins l'ombre d'Léon, Gérard, Simon et pis d'gramint patoisants, mais i a fait un sacré boulot et i faisot partie d'vou équipe.
Merci à li aussi pour toutes ches vidéos.

Ch'est toudis triste quind in perd in ami. I a toudis un vide. Heureusemint i reste chés souvenirs que personne n'peut effacer.
Alors quind nosautes spectateurs in ravisera eune incienne vidéo ou bin quind Léon et Gérard inregistreront des nouvielles vidéos bin tertous ara eune tiote pinsée pou André, qui a fait du si bon traval, pace que filmer et bin filmer ch'est un sacré boulot, suffit pas d'tenir l'caméra, incor faut-il savoir bin cujir les plans, les bons profils, l'bonne esposition, savoir mette in valeur l'pus important, etc..... Ch'est l'meilleu' hommache qu'in puche li rinde d'avoir cheule tiote pinsée.

ouai ch'est trisse ...

Pour in arvénir au sujet, hier j'ai failli écraser un fantôme: Chétot eune grosse poubelle noirte classique aveuc des reules. Alle atot couquée jusse au mitant de l'route dins l'noir. Cha arot fait BOUM ! et j'm'aros posé des questions ? ? ? Ch'est pétète mi qu'i aros quéu in bas d'min sièche     !!!
  

Un tiot bonjour à lechtidorly in passant.....soit l'bienvenu camarate.....n'hésite pas à vénir nous dire un tiot mot in chti, in Français, in Javanais, cha nous féra plaiji....
  

T'as cru qu'alle avot des reulles.

Poubelle fantôme à reulles. 
 Si qu'Batisse i avot écrasé sans l'faire esprès eune vièle finme, i arot intindu les oches craquer ! bin sur !