J'chus fin bénaiche, j'cachais après ch'qu'ma mère elle disot quind elle avot du mau à ses pids, cha parlait d'baudet et d'ches pids mais j'étos nin sure d'el formule. Bin ch'que j'pinsos ch'étot bon : "Un baudet cha périt toudis par ses pattes !" j'a artrouvé ch'dicton dins l'life d'Guy Dubois. Par conte i a pas "Un cat qui waine, i waine lomint" In l'disot quind quiqu'in i s'plainiot toudis.

T'as du mau à tes pids? T'as trop marché?

Cha que t'mère - et l'mienne - elle dijot aussi souvint ch'est "i a que de l'veine pour les crapules".

Et sin père i dijot "in vot toudis tchand que j'ai bu et jamais tchand que j'ai soif".

Tcheue famile...

Elle aimot dire aussi Un pourchau qui fait à s'mote ch'est l'mitan de s'nourriture !

ch'est marrant Casimir, avec l'nouvielle photo de tin avatar, in dirot que ch'est tin quien qui dit cha

Kazimierz a écrit:

Chez nou z'autes dins ches corrons in disot souvint ...
" Miux vaut parler d'cul , qu'dire du mal su sin voisin"

j'aime

Kazimierz a écrit:

Miux vaut un tchien qu' deux tu l'auras ....
qui m'a dit ....

.......qu'deux té l' aras pas ! ! ! !

pépéPéBé a écrit:

Kazimierz a écrit:

Miux vaut un tchien qu' deux tu l'auras pas....
qui m'a dit ....

.......qu'deux té l' aras pas ! ! ! !

a



Ch'est ben cha pépéPébé,



mais des cop in va plus vite qu' l'musique ....

Conjuque cha au futur simpe Kazimierz.

..... J'aros....ou...j'éros
..... t'aros....ou t'éros ...etc...
.... I ou alle arot ou in arot
....nous ar? ? ?...omes ? ? ? rarement imployé ? ? ? tak ou niet ? ? ?
....vous arotes
....iis ou alles arotent ! ! !
...
Arguette un peu si qu'in avot eu cha à conjuguer aux 16 temps dins l' classe quand qu'in prénot pour cipe l' cate aveuc Jésus qui ténot sin tchoeur dins s'main au d'zeur du bureau de ch'maîte, in l'mitraillant aveuc des boulettes d'buvard machucrées et propulsées aveu eune baleine d' corset.
...... Jé l'sais ch' est pas chrétien d'faire des trucs comme cha.(vrai).
......Ch'étot moins grafe d' coller au plafond de l'classe un tiot pantin accroché d'zous eune boulette d'buvard machucrée elle aussi' catapultée aveuc eune fourchette, in buquant un cop sec sur les dints.(vrai)
.......... In avot l' diape dins l'vinte.............
Si ch'maîte i arot été méquant.....In arot été fusillés par ch' directeur qui li, n'arot pas rigolé du tout..mais in a eu du pot, ch'maîte i nous a pas dénonchés, ch'étot core un brafe type...in argrette même d' li avoir dégonflé sin vélo pour avoir l' plaiji de l' vire s"mète in rache..

Bin cha alors pépéPéBé ch'étot un zouafe à l'école alors !Ch'est pour cha qu'té dev'nu clerc?

"Bof ! In rigolot toudis ! ! ! "

Sans ète un proverpe, connaichez vous l'espresson:

..........."Avoir l'cop d'cotron " ? ?

Bin non. Quo qu'cha veut dire ? Dis-nous !

quand qu'i n'da un qui vient de s'marier et qui li a été un peu fort in faijant des excés "d'oeuvre de chaire", donc qu'i est "louloute", in dijot d'l'i "Qui avot "'cop d'cotron".

Cha m' étonne qu'té connaichos pas cha. Ch'étot dit courammint dins min coron.

J'allos dire eune bêtisse mais je vas m'artenir, autremint i n'd'a des qui pourottent croire que je le fais exprès...

In fait j'allos dire que si qu'in ne dijot nin cha ailleurs que dins vous coins à vousautes, ch'est que l'oeuvre de chair, comme i dit pépé, cha vous épuise plus vite que les autres.

Mais je ne le dis nin...

...Ouais "d'chair]" comme rectifie Batisse ! ! ! et i n'da tant qui "queurtent aveuc "leu quémiche dins leus dints"
In vla core un aute ! ! !

Ch'est des cautes lapettes

Té pâs loin, cha s'dijot pour les ceusses qui sont toudis intrain "d' courir à l'gueusse"...après les gonzesses ! ! ! !

Dins le 59 les cautes lapettes cha marche pour les 2 sexes...

In n'd'a de l'chance nousautes énon?

Cha dit, i me simble qu'hier j'ai tché chu eune caute lapette fumelle ichi in Alsace mais je ne m'in chus rindu compte qu'àprès qu'i se soche passé eune séquo qui m'a surprisse et que j'étos déjà loin.

Si que cha vous intéresse, je vous raconte. Mais faut insister et, surtout, nin rire de mi....

Té laiche pas faire Batisse
........raconte Batisse, raconte Batisse , raconte Batisse , j'insisse ! ! ! ! n'oblie pas d'nous dire eude qui ch' est qui faut rire ! ! !

Bon, ben puisqu'i n'd'a des curieux qui insistent.... valà quo qu'i s'a passé:

Hier i faijot bieau et, comme je vous l'ai dit ailleurs, j'ai sorti m'mobylette. Cha faijot longtimps que j'avos nin été dins le Doubs d'ùche que j'acate de l'crême fraiche et du fromache. Tchand que l'drôle de séquo elle a arrivée, je rintros de là-bas et j'étos à eune quinzaine de km de m'majon. I faijot caud, j'étos bénaiche. Je traversos un villache. A m'mote que ch'étot Wattwiller, ch'ti de l'ieau sins phosphates.

In tous les cas, si que des fos je roule un tiot peu au dessur des limites in rase campagne - cha m'a déjà coûté des points - in ville je respecte l'limitation. Donc je roulos peinard, d'autint que dins ch'coin-là is ont mis des rampes un tiot peu tout partout. In mobylette ch'est nin gênint, in se met debout chu les repose pids et in passe l'obstacle comme si qu'in étot à gva. Par contre les gins in auto, pour nin aller s'écraser au plafond, is y vont duchemint.

Devint mi i avot eune auto.

Valà, le décor i est planté. In s'y crorot énon?

Dins l'auto i avot eune guernoule in va dire d'eune quarintaine d'ans. J'aros été précoce, cha arot pouvu être m'file.... J'ai vu ses ys dins ses rétros, qui m'arwettottent. J'étos rassuré: elle m'avot vu. Elle ne risquot nin de tourner à gauche sin mettre sin grignoteau. J'ai nin cachi plus loin. In puq, elle avot des bieaux ys...

Et vlà qu'elle sort un bras par s'vitre et qu'elle fait des menoules avec s' main. Mi qui ne chus nin tordu pour un sou, je pinse qu'elle a caud, qu'elle n'a nin de clim et qu'elle jue avec l'air pour vintiler sin dessous de bras.

Vu qu'i a grammint de rampes, in s'a suivis un momint, nin vite. Je chus resté derrière, surtout qu'elle passot sin timps à m'arwetchi dins sin rétro, avec un air nullemint inquiet comme is ont des fos les conducteurs tchand qu'is sont suivis par eune mob. In fait, in s'amusot tous les deux à épier l'autre. Elle ne risquot nin d'écraser sin chignon au plafond. D'abord parce qu'elle n'avot nin de chignon et surtout parce qu'elle se traînot à 30.

Toudis in faijint des menoules avec s'main par la portière...

Arrivée à l'sortie du villache, tchand que l'limitation elle est prête à voler, elle met sin grignoteau à droite, elle m'arwette incore eune fos dins sin rétro et elle tourne à droite. Ouais, elle a tourné du même côté qu'elle a mis sin grignoteau, comme quo des fos in est médisints au sujet des guernoules au volint... Je m'ai dit qu'elle étot arrivée à s'majon.

Vu que j'étos prêt pour l'accélération, j'ai doublé et gaaaz.

Sauf qu'in doublint j'ai vu qu'elle m'arwettot toudis et, in puq, que là d'ùche qu'elle avot tourné ch'étot nin eune rue. Ch'étot le début d'un chemin avec des hautes herpes, bordé par des arpes. Impossipe qu'i aiche eune majon là au bout...

Et ch'est alors que j'ai arpinsé à tout cha qui venot de se passer, que ch'étot effectivemint bizarre. Je me chus peut-être fait du cinoche mais après cop j'ai pinsé que ses menoules avec s'main ch'étot pour me moutrer qu'elle n'avot nin d'alliince (ch'est un fait qu'à s'main i n'avot que des dogts, je l'ai bin arwetchie pindint qu'elle faijot ses espèces de dinse thaïlindaisse) et qu'elle n'avot nin invie de finir l'journée toute seule.

Bon, ben elle n'avot nin queusi le bon dragué. A m'fabrique je traînos eune réputation d'indraguable. Cha dot être vrai... je chus bin trop timite!

....Et té t'as pas laiché faire ? ? ? Té li a pas d'mindé sin tarif ? ? ?
. A 100 ans cha s"comprind, mais 'si qu' t"avos incore 90 ans alle t"arot imballé sec ! ! ! alle t'érot fait un prix


......

Batisse a écrit :

Citation :

In mobylette ch'est nin gênint, in se met debout chu les repose pids et in passe l'obstacle comme si qu'in étot à gva.

quint i fait caud, te roules toudis avec t'braguette ouverte ???

Elle arot accéléré à tout berzingue, voyou!