I n'avot nin que du carbon dins le nord... i avot aussi grammint de textile, même que cha faijot un rute défilé d'autobus pour trinsporter des guernoules boyaux rouches vers Roubaix Tourcoing. I n'd'avot même des bielles et des nin complexées...

Mi j'ai fait m'carrière dins les machines textiles, donc je connos un tiot peu. In particulier le textile lainier.

I faut savoir que dins l'nature, i a in gros deux sortes de fibres: les courtes et les longues. In met à part l'soie qui est très très très longue! I a aussi le lin, le chanvre, le jute etc. que ch'est espécial parce qu'i peut y avoir des fibres aussi longues que l'plant (un tiot mètre pour le lin) mais in fait ches longs bazars ch'est des agglomérats de fibres prises dins eune espèce de gomme. In filature "fine" de lin, in finit par passer tout cha dins de l'ieau caute in saquint dessur, du coup l'gomme elle ramollit et laisse écaper les vraies fibres individuelles de lin, qui font moins de 5 cm de long et sont donc des fibres plutôt courtes.

La fibre courte type ch'est le coton. Longueur 25 à 45mm, avec un diagramme assez carré, cha qui veut dire qu'i n'y a nin grammint d'écart intre les plus longues et les plus courtes d'un lot.
La fibre longue type ch'est la laine. Longueur:1 à 120 mm, avec un diagramme très oblique, cha qui veut dire qu'i a de tout dins un lot: des longues, des courtes, et des moyennes, à peu près autint des eunes que des autres.
I a des races de moutons qui dontent des laines plus longues que 120 mm. In général ch'est alors des poils assez gros et peu frisés, utilisés pour faire des tapis ou des séquos ainsi.

Les fibres longues et les fibres courtes se travaillent sur des machines très différentes. Ce sont deux industries totalement différentes.

I a aussi des fibres courtes animales, le cachemire en particulier, qui se travaillent sur machines pour fibres longues sinon ça ne marche pas. Mais comme elles sont travaillées sur des machines pas prévues pour ça, il faut ruser et c'est un peu le brun. Mais c'est tellemint cher que cha vaut le coup!

La "bielle" laine, très travaillée dins le Nord, ch'étot l'laine mérinos, avec des poils qui ont un diamètre de 18 à 22 microns (ch'est fin...). Ches poils is venottent principalemint d'Australie. Là-bas is tondottent les moutons, mettotent tout in vrac dins des sacs bin pressés pour printe le minimum de volume et tout cha ch'étot invoyé vers chez nousautes (ou in Ingleterre, Allemagne, Italie, Belgique, Espagne, Portugal etc.) pour être trinsformé in fil, tissu ou tricot.

Tchand qu'in tond un mouton, in récolte:
- de l'laine (ouais, quind même....)
- toute eune masse de saloperies qui sont prisonnières de l'laine: des déchets d'herbes, de chardons, de l'tierre, du brun et de l'pisse de mouton, des résidus de transpiration et eune masse de surprises auxquelles in ne pinse nin.
- In puq les moutons, pour nin avoir lu dos fraique tchand qu'i pleut, is produistent du gras qui se met chu lu poils. Ch'est du gras de laine, ou de l'lanoline.
- In repuq, selon l'indrot d'ùche que les poils is ont poussé (dos, cou, vintre, guimpes, tiête), les poils is n'ont nin l'même qualité.

Le but du peignage ch'est de faire le tri dins tout cha.

In général, les peignages avottent aussi lu propre lavage (propre ch'est eune façon de causer....).

D'abord i avot le triache, comme pour le carbon: après que les balles de laines elles aichtent été mises à cauffer plusieurs heures pour les ramollir (le gras i fait colle) in triot les toisons, in mettint dins des bacs différints les différintes qualités, état de saleté, couleurs, pour avoir un début de simblint d'uniformité de lot. Bref, avec un lot in faijot plusieurs sous lots.

Eune fos qu'un sous lot i étot assez gros, in l'invoyot au lavache. Là, avint de mettre l'laine à l'ieau, in faijot passer des grosses pointes dedins, pour l'désépaissir un tiot peu, et récupérer par l'même occasion, tous les bouts de tierre, de bos et tout cha qui voulot bin tcherre tout seu.

Après ch'étot le lavache propremint dit. In plusieurs bacs. Généralemint 5 ou 6. Des machines au moins aussi longues qu'eune piscine olympique. In mettot l'iau propre et tiède au derni bac et in pompot l'ieau du derni bac pour aliminter l'avint derni et ainsi de suite. Dins certains bacs in mettot du savon ou du détergint, dins d'autres in ne faijot que de rincer. Autint dire que l'ieau du premi bac elle n'étot nin d'eune propreté irréprochape....

L'ieau du premi bac ch'étot pour dissoudre l'pisse, ramollir l'brun, faire tcherre le sable et l'tierre au fond. I avot des systèmes de vis sins fin qui saquottent tout cha déhiors. I ne restot pus qu'à sécher et trier ches premis déchets.

Insuite, eune fos que l'plus gros de l'crasse facile à inlever ou à dissoute i étot parti, in s'attaquot au reste, et in particulier au gras, l'fameusse lanoline. Pour cha i fallot du détergint, comme tchand que vous faites l'vaisselle ou que vous lavez vous cavux gras.

Sauf que l'lanoline in question, cha ne se met nin à l'égout comme in fait avec le gras dissout dins l'ieau de vaisselle. La lanoline ch'est très recherché par les marchinds de produits de bieauté, vu que ch'est très bon pour l'pieau des guernoules, des bébés et tout cha, et que ch'est naturel.

Du coup, l'ieau qui sort des bacs à détergint, elle est cintrifugée, pour pouvoir récupérer l'lanoline in question, et in rimplir des barrils. Après cha, ch'étot affiné par les espécialisses qui l'acatottent.

Avec l'arrivée des produits chimiques, les fabriquints de produits de bieauté is ont des fos boudé l'lanoline, trop cherte. Donc les lainiers is avottent le choix: si l'lanoline elle se vindot plus cher que l'prix du fioul, is la vindottent, sinon, is la passottent à l'caufferie, in rimplachemint du fioul.

Bref, à l'fin du lavache, in se retrouvot avec
- des fibres de laine sins pisse et sins gras dessur (in fait i fallot qu'i in reste un tiot peu quind même du gras....)
- des tiots morcieaux d'herpe ou de chardons incriqués dins les fibres.
- de l'ieau. I fallot donc séquer tout cha, incore eune fos in cauffint, ch'étot eune industrie assez grosse consommatrice d'énergie. I n'a qu'à vir l'talle des quéminées pour se faire eune idée de l'talle des caufferies!

Cha va? Z'êtes nin incore mats? Sinon, allez boire un jus ou eune bière et arvénez tchand que vous êtes dispos...

Eune fos que l'laine elle est propre mais avec des corps extérieurs dedins, le but du peignache ch'est de séparer:
- les corps étrangers et l'laine
- les fibres de laine courtes (moins de 25 mm) des autres

Pour cha, l'première opération ch'est le cardage. Ch'est des grosses machines, à l'fos énormes et très précises. Lu but ch'est de trinsformer des touffes de poils in quelque chose qu'in appelle un ruban, dins lequel les fibres elles sont parallèles les unes aux autres. Pour faire cha i faut individualiser les fibres, in les cardint précautionneusemint, pour nin les casser. Disons pour un casser un minimum... Pindint ce processus, i arrive que les fibres elles s'artrouvent très isolées les eunes des autres, bin parallèles, in couches très fines. A ch'momint-là in les fait passer intre des séquos que je vas appeler des lames impilées côte à côte (comme dins les machines à coper les nouilles). Ch'est des lames très près les eunes des autres. Tellemint près que si les fibres de laine elle arrivtent à y intrer, l'plupart des bouts d'herpe et de chardons is n'y arrivtent nin. Du cop ches saletés elles s'artrouvtent comme des babaches à l'extérieur et là i a des cylindres cannelés qui lu font des chiquenaudes et qui les invottent voler dins eune rigole, d'ùche qu'i a des raclettes qui les amèntent vers des poubelles. Ch'est nin jeté... i a des espécialistes qui récupertent et in rassaquent les quelques fibres qui sont parties avec.

Roubaix Tourcoing s'étot spécialisé dins le traval des laines assez chargées in impuretés végétales. Ches saloperies sont difficiles à éliminer aux cardes. Mais ches saloperies dins l'laine faijottent que l'laine elle étot moins chère à acater. Roubaix Tourcoing s'est spécialisé dins l'fabrication de cardes d'eune précision bin supérieure à l'concurrince.

Bon, i ne faut nin rêver, eune fos sortie des cardes i restot incore des saloperies végétales dins l'laine. Des tiotes, bin durtes à dessaquer.

Pour les avoir jus déhiors, i fallot peigner, comme in fait avec les poux dins les cavux. Avec des peignes tellemint fins que si que ch'étot plus gros qu'un cavux, cha restot de l'autre côté des peignes. Forchémint, i fallot continuellemint netchi les peignes, pour éliminer les saloperies qu'is avottent bloquées.

Intre l'carde et l'peigneusse, i avot 3 machines, des étireusses, qui préparottent le travail des peigneusses. Pour qu'eune peigneusse elle travale bin, i faut li présinter des fibres hyper bin ringées les eunes à côté des autres, in couche bin régulière. Les étirages is font cha. I n'd'a même un qui calibre le ruban. I mesure le volume de cha qui rintre dins s'mécanique et selon ch'volume, pile au momint d'ùche que cha qui a été mesuré i arrive à l'sortie, i saque in puq ou in moins, pour qu'au final i a toudis le même nombre de fibres l'eune à côté de l'autre. A ch'niveau-là, des fibres i n'd'a inviron 75 000 l'eune à côté de l'autre dins un ruban. A l'intrée de l'peigneusse in in met inviron 1 200 000 l'eune à côté de l'autre, à plat.

Ch'bon million de fibres i est étalé chu eune largeur d'inviron 40 cm, comme qui dirot intre les mâchoires d'eune pince plate super large.

I a toute eune mécanique pour faire avinci ch'million de fibres de l'longueur qu'i faut, in les contrôlint comme i faut.

A un momint l'pince plate super large elle se ferme. Elle laisse déhuter eune touffe d'inviron 25mm de long. Un tiot peu après, in même timps, l'pince elle s'abaisse un tiot peu pour présinter la touffe qui déhute à eune série d'eune vingtaine de peignes, de plus in plus fins, qui passtent au travers de l'touffe les uns après les autres.

Et comme les peignes à poux dont je causos plus haut, ches peignes is immèntent avec eux tout cha qui ne sait nin passer au travers de lus dints (les tiotes saloperies végétales qui restent) et toutes les fibres dont l'tcheue n'est nin chopée par l'pince plate. Ch'est les fibres courtes, qu'i faut éliminer pour faire du bon fil.

Eune fos que les 20 peignes sont passés, l'pince elle s'arlève, elle s'ouvre et i a eune autre pince (in fait ch'est plus copliqué qu'eune pince) qui vient choper les tiêtes des fibres qui ont été peignées, et qui les saque au travers d'un autre peigne, tout seu ch'ti-là, qui va arténir toutes les saloperies qui vientent avec les tcheues des fibres.

Voilà. L'machine qui fait cha elle pèse 4 tonnes et elle traite inviron 3 grammes de fibres à chaque cycle. Un cyle i dure un peu puq qu'un quart de seconde. Tchand que je dis que ch'est de l'mécanique de précision, je n'exagère nin...

Après l'peigneusse, i a deux machines qui servtent à désaligner les tiêtes des fibres (l'pince qui vient choper la touffe elle chope les tiêtes de fibres, du coup tout y est aligné et ch'est nin bon pour l'suite, vu qu'i faut pour un bon fil que les fibres sochtent réparties dins un ordre le plus aléatoire possipe).

Les déchets éliminés par l'peigneusse sont eux aussi récupérés par des espécialistes, qui les valoristent.

Valà. Cha vous a plu? In est là au tout début du processus. Ch'étot eune bielle industrie l'industrie lainière, mais le marché i a grammint fondu. Les synthétiques is ont pris eune grinte plache, les non tissés aussi.

A m'mote que ch'est min plus long message. Cha a bin tché: je voulos sortir l'mobylette et le timps i s'a mis à l'pleufe....

Citation :

I a aussi des fibres courtes animales, le cachemire en particulier

Ha! ch'est pour cha qu't'inl'vos ches poils à des tchiens à poils longs.

Citation :

Eune fos qu'un sous lot i étot assez gros, in l'invoyot au lavache

eune question, i avot gramint d'sous lots dins t'fabrique? et j'supposse qu'au lavach' ch'étot d'l'iau froite.

j'ai cor eune aut' question : i vous arrivos d'carder aussi des poils ed girafes?

Pffff

Les quéminées étotent hautes pour raison de santé publique afin que l'vint i pusse pas rabattre les fumées sur les majons !

Elles avottent quind même un diamètre intérieur calculé in mètres. I n'a nin beso de cha pour un tiot fu. Ch'est juste à l'échelle: petit fu petit tuyau, gros fu gros tuyau.

Infin, je dis cha, je ne dis rin. Cha m'étonnerot que tous les industriels du monte is se sochtent inquiétés pour l'sinté de lus voisins depuis le 18ème siècle, que les gins is vivotent dins l'funquée dins lus propres majons.

Merci pour chés explications Batisse,ch'est vraimint instructif.
Mi et m'fimme avons travaillé dins eun' filature de lin dins l'Nord, mi à Agache à la Madeleine et m'fimme à Roncq chez Désiré Laurent,elle in préparation et mi au bobinoir.
J'prenos ch'bus à 3h du matin et j'arvenos à 14h30, cha été min premier traval,l'1er Avril 1969, l'jour d'mes 16 ans.

Vlà chi eun' video après l'fermeture de lainière de Roubaix

Ch'est un' fos les murs disparus qu'in s'rind compte qu'un' fabrique ch'étot vraimint très très grind ! L'lainière, qu'in s'passe ed'vint ch'est plin d'vite avec un grind batimint (qui fait tout p'tit !) au milieu d'nulpart !

Dins l'famile ch'est l'soeur d'min homme qui a travallé à l'lainière dès l'âche d'14 ans. Après alle a cangé pusieurs fois d'traval mais toudis dins l'tissu, pou finir formatrice confection à l'AFPA.

In tous les cas ch'est fort intéressant tout cha Batisse.
Y a pas à dire in rigole bin ichi d'sus ch'forum mais in "s'instructionne" aussi...

Comme j'le disos dins un aute sujet, dins m'famile finalemint, in a aussi travallé dins l'tissu, j'viens d'artreuver dins min arpe généalogiqes, des fileuses, des tisserands et un tailleur, dins les années 1800-1830, après leu descendants cha a été principalemint des journaliers ou des mineurs pou les pus recents....

ches filatures du nord et ches fosses ch'est là qui à eu el plus d'imbauche in franceasteur in nous laissent tomber , ch'est pareil que ches fonderies ed dunkerque et d'ailleurs in lorraine moselle et j'in passe.....

chétot min coup ed gueule, escusez me !!

[quote="Loumarcel"]

Citation :

j'ai cor eune aut' question : i vous arrivos d'carder aussi des poils ed girafes?

Bonne question Loumarcel, les poils d'girafe, cha s'peigne...

Et tcheue machine i fallot pour les poils que la p'tite Emilie nous avait promis ?

Quo qu'ch'est qu'i raconte li? Ch'est quo ch't'affaire d'Emilie?

Te pourros signer "le chimpion des sous intindus qu'in n'intind nin..."

In a tiré un gros lot avec ch'ti-là!

Cha a pet ête un rapport avec l'spectaque pou infants des années 80 "Emilie jolie" qu'avot écrit Philippe Chatel ???? mais j'dis cha vraimint au hasard pace qu'à part l'canchon qu'in a tertous intendue, j'connos pas d'trop l'histoire du spectaque... j'sais foque qu'i avot gramint d'animaux, alors i pouvot pet ête bin y avoir eune girafe ?

batisse a écrit:

Quo qu'ch'est qu'i raconte li? Ch'est quo ch't'affaire d'Emilie?

Te pourros signer "le chimpion des sous intindus qu'in n'intind nin..."

In a tiré un gros lot avec ch'ti-là!

Va vir cha :Un grand momint d'radio ...


https://youtu.be/Rh9s3jDsqx8

Ch'est bin cha que je dijos.... à part ti i n'a personne qui peut savoir de quo que te causes!

Sacré gaillard...

batisse a écrit:

Ch'est bin cha que je dijos.... à part ti i n'a personne qui peut savoir de quo que te causes!

Sacré gaillard...

Ah ouiais , i'avot foque que mi qui écoutot les grosses têtes !!!

Peut-être que les autres is ouvrottent....

Et toc!

batisse a écrit:

Peut-être que les autres is ouvrottent....

Et toc!

T'écoutes nin les grosses têtes dins tin camion, te préfères France Culture ?

Je trouve que cha devient soyeux les grosses tiêtes à ch't'heure. I a bouvard qui cause et les autres qui font tapisserie. Ch'est trop prout prout à min goût.

I faut dire que je chus difficile...

Ouf avec l'tapisserie, in est presque arvénu dins l'sujet...