Au four et au moulin,
Du soir au matin,
M'man Lucette fait s'n'ouvrache,
Sins archignier à l'tâche.

L'mason a cor fermé ses yux.
A peine l'vée, m'man dégroche* ch'fu,
Avant de l'ralleumer aveuc du bos cassé.
Eun' pelle d'carbon, ch'l'étuffe* c'minche à ronfler.

Moud' ch'café pindant qu'l'iau all bout,
Ajouter l'chicorée, passer ch'jus
A l'louche dins ch'marabout.
I va bétot faire bon pou app'ler chés fius.

Assis près de ch'fu bin caud,
Chés éfants boiv'nt eun' gobe* d'café
Aveuc du chuque in morcieaux,
Avant daller s'débarbouiller.

In rintrant d'l'école,
I fallot faire ses d'voirs.
Et pour éviter l'torgnolle,
In avot intérêt à savoir.

Em'mère, all savot tout :
Ecrire chés mots compliqués,
Calculer et raisonner.
Pour lire, all avot gramint d'goût.

Lundi, ch'étot l'jour de l'buée.
Ch'linche, i fallot l'ébrouer,
L'frotter aveuc eun' brosse et du Monsavon,
L'rincer, l'essorer. I avot l'iau plein l'mason.

Insuite, all accrochot chés patalons,
Chés quémiches et chés cotrons,
D'sus chés fils de fier
Dins l'gardin d'min père.

L'samedi, all artournot tout.
Inl'vot l'pourrette pour nettier,
Passot l'wassingue à croucrou.
El' sol, i devot briller !

All acatot d'sus ch'marqué
Ed quoi nous s'arboter*.
All cousot nou neu' rhabillures
Pou qu'in euche bielle allure.

Aveuc eune quinzaine ed péqueux,
All faisot des heureux.
In avot pont tout, mais in n'minquot de rien.
All comptot ses doupes et all gérot bien.

Eh ouais, quind j'étos gosse
J'restos avenue de l'fosse.
Oh ! In roulot pont sus l'or.
Mais m'man Lucette, ch'étot nou trésor.



* dégrocher : enlever le mâche fer
* étuffe : cuisinière
* gobe : bol
* s'arboter : s'habiller

Bel hommache à toutes ches femmes d'mineurs ! à s'maman ch'est core mieux.
In pourrot donner comme tite man, Simone, Georgette, Léocadie, Voltaira, Hélène, Sophie, Marie, et toutes les autes.

Vraimint un biau poème, que du vécu...
Ch'est un bon poète aussi Alain Lempens,hier,j'ai passé m'n'après midi avec li,j'y ai filmé trois sketchs qui sera prochain'mint sur min site.

la clo a écrit:

Bel hommache à toutes ches femmes d'mineurs ! à s'maman ch'est core mieux.
In pourrot donner comme tite man, Simone, Georgette, Léocadie, Voltaira, Hélène, Sophie, Marie, et toutes les autes.

Vinguette, i a là-dedins des prénoms que je ne savos même nin que cha pouvot exister....

Je vas ouvère un sujet à ch'sujet (si j'ose dire)