In mettot eune bonne partie d'l'après-midi pour s'préparer.

In avot 17-18 ans mi pis m'copine.

In queminchot par nos mises en plis, des bigoudis, bien serrés et pour faire des coiffures bien crépées, bien gonflantes ben in avot un vaporisateur avec un mélanche d'ieau et d'bière, ouais, vous avez bien lu.

J'peux vous dire qu'ch'a ténot nos boucles ! l'vint i pouvot souffler, ch'étot l'lendemain matin qu'in rigolot moins pour s'arcoiffer ....

Après cha in s'faisot un masque (man mère, j'n'ai honte) d'beauté, alors là tout y a passé, du concombe in purée, des masques avec del farine, des jus d'citron avec jaune d'oeuf et pis d'autes que j'ai complètemint oubliés. Parlez me d'cha à 18 ans in a core eune peau de jone file, pas eune ride, mais ch'étot comme cha fallot s'faire belle.

Pis après cha y avot l'séance manucure. bains pour ches cuticules, séance vernis et après in arpassot nos jupons et jupes et ouais ch'étot dins ches années 60 avec ches jupes et robes bien juponnées.

Pis quanque l'heure arrivot, ben, in s'in allot à pieds par n'importe quel temps alors, ches caveux, ches soins d'beauté ils in prenottent un sacré cop, in arrivot pas toudis dins un état impeccape ! ch'étot mi graffe, nous in savot c'qu'in avot fait avant pour ête belles. Après cha polkas à la Kubiak et rock and roll in n'veyot pus trop nos efforts.

Cha m'fait rire quanque je me rappelle tout cha, in étot jones et in étot pas les seules files à faire cha, et j'l'argrette pas.

De l'bière dins des cheveux? Cha fait un parfum espécial énon? Et cha n'attirot nin les mouques? Armarque, ch'est probablemint aussi de l'bière que vous buviottes. Du coup cha devot passer dins le sintimint général.

Et ch'est au bal que t'as trouvé t'n'homme?

A part cha, j'ai du aller vir dins le dico pour savoir quo qu'ch'est que des cuticules.... je suppose que dins tin cas ch'est nin l'couche superficielle du tégumint des invertébrés, ni l'couche vernissée externe des coquilles de mollusques, qu'in douce j'aros plutôt située à l'intérieur. Alors j'seule définition qui irot ch'est "tiote pieau".

J'aime miux rin dire au sujet des tiotes pieaux qu'i fallot pinser à laver avint d'aller au bal....

Et pis je vas te dire un secret, i a grammint d'autres séquos que les garchons is arwettent avint l'jonction intre les ongles et les dogts. Par contre, dins cuticule, i a cu, i a cuti, i a ticu. Cha ouais....

Sacrée la clo, te resteras toudis un phénomène.

T'aros par hasard nin eune photo d'époque de tin groupe de guernoules? Comme cha in ne saura laquelle que t'es mais in ara eune idée du look que t'avos...

In tous les cas, in n'arot jamais risqué de se croiser au bal, vu que cha ne m'a jamais attiré ch'bazar.

t'es vraimint un fouteux d'gins, ch'est pas vrai, j'raconte quemint qu'in faisot pour ête belles et t'es fout tout in l'air ti.

Ch'est rien, j'aurai l'dernier mot un jour.

Ouais monsieur Batisse j'ai rincontré m'n'homme au bal, ravise bien, -min premier bal - min premier cavalier - ch'étot li.

Ch'est bieau comme dins un conte de fées, sauf que ........

j'sus eune erreur !

et ouais y a cru arconnaite une jone file avec qui y avot dansé l'semaine d'avant, et i s'a trompé .... ch'étot mi.

Après cha in a fait note route chacun d'note côté pis in s'a artrouvés. et cha fait 48 ans qu'in est mariés.

Pas mal hein ?

Magnifique! In verrot cha au cinoche in dirot que ch'est exagéré.

Ch'est des fos rigolo la vie énon?

48 ins de mariache? Te t'as mariée jone alors...

Et te chantos :La plus belle pour aller danser surmint aussi !

M'grind mère disot que pou faire briller les caveux i fallot les rincer à l'ieau d'pleuf mélingée avec de l'bière...
Ch'étot de l'bière acatée in boutelle d'1 litre, alle n'étot nin forte et n'avot pas trop d'odeur.
Les garchons eusses mettottent de l'brillantine.

Quind j'avos vers les 10 ans, in 66, j'me rappelle d'une fos ù j'étos chez m'copine un samedi, i avot là s'grinde soeur qui devot avoir dins les 17-18 ans qui s'préparot pou d'aller au bal, m'copine et mi in la ravisot s'crêper chés caveux avec des yux tout ronds, cha y faisot eune sacrée choucroute d'sus l'tiête !.... agrémintée d'une barette avec un noeud in velours !!!! heureusemint quind cha a été nou tour d'aller au bal, in crêpot pus les caveux, cha devot quind même faire sacrémint d'maux quind in devot déméler tout cha !

Et les coiffures des mariées? Te ne cros nin que ch'est eune invintion de diape cha?

Tcheu timps qu'in passe chu l'tiête....