A ch't'heure te feros cha, y'arot pu personne dins les majons pour s'mette à l'ouvrache et passer l'ramon su l'pavé.
Y'a qu'à vir el dalache autour des bacs à z'ordures d'ù ch'est qu'in trie les déchets....
Je n'savos nin qu'cha existot cha qu'pistouille et loumarcel y partachent . Merci .
Je m'souviens foque que l'vendredi in Gelbique ( in habitot à l'frontière) j'ai des souvenirs ed sieaux d'eau évités.
Y fallot faire gramint attintion , parce que les flaminques ( que ch'étot des wallons mais in dijot respectueusemint les flaminques) elles faijottent l'grind ménache dins lu majon et y jettotent des sieaux d'eau su l'pavé sins regarder si y'avot quelqu'in qui arrivot.
L'vendredi elles faijottent à minger du pichon et des frites dins l'arrière arrière cujine et pis après ch'étot l'grind ménache au savon noir et à la brosse ed chiendent et aveuc des grinds sieaux d'eau et un racle eau....dins les piches d'ù qu'in n'va jomais ( aveuc des berlouffes et des housses sur les fauteuils et les meubles).
J'cros bin qu dins ces majons, l'piche de devint elle servot foque à exposer des bibelots intre les rideaux et le carreau.. et pis aussi à exposer les morts pour les vijins ( heureusemint ch'étot pas trop souvint... les visites cha salit ).
In général, l'samedi, ches guernoules elles allottent au coiffeur pour armonter leur caveux aveuc des crépaches à la barbapapa et pis l'diminche elles allottent minger des glaces géantes dins les vases sur la place ed Mouscron par exemple....
J'caricature un tiot peu tut d'même, mais j'imagine si eune vijine elle jetot nins sin sieau su l'pavé un vendredi, les camanettes elles aurottent trouvé facilemint l'sujet du potin...in mingint l'glache du diminche !