I m'a arrivé eune drôle de séquo qui me conforte dins l'idée que l'technique à gadgets elle va trop loin à ch't'heure.
Min sèche linge i a rindu l'âme. Un viux problème au niveau de l'porte, qu'elle avot déjà été rafistolée et que là elle a dit du brun!
Du coup, vu que j'avos eune lessife fraique, j'ai été acater un nouvieau sèche linche. Ch'est nin vraimint un nouvieau. Ch'est un d'occase arconditionné.
Jusque là, tout va bin. J'installe le bazar à s'plache, dins l'guerni, d'ùche qu'i peut souffler de l'air caud et fraique autint qu'i veut, vu qu'i a eune masse de volume au-dessur, et qu'in puq ch'est vintilé par eune partie à claire vo.
Le tableau de bord i étot plus copliqué que chu min incien (ch'est nin dur, i avot au moins 20 ins et l'simplicité de l'époque!). Eune fos l'bazar rimpli de linge fraique, je queusis un programme qu'i m'a l'air de convenir, et roule ma poule, ch'bazar i s'met in route. Pour combien de timps? Mystère. Ch'est li qui décite.
Au bout d'eune heure je me dis que cha dot être bon (eune heure ch'est le timps qu'i fallot à ch'ti qui est cassé) et je tinds eune orelle... cha tourne toudis. Vinguette tcheue longue pronne que je pinse in mi-même. Eune heure après cha tournot toudis. Du coup j'ai été vir et... ch'bazar i soufflot de l'air frod et min linche i étot aussi fraique que tchand que je l'avos mis dedins.
Après avoir dit un gros mot, j'ai téléphoné le lindemain au marchand pour expliquer m'misère. I me suggère d'amener l'ingin, qu'un technicien i arwettra tout de suite et que si qu'i faut plus d'un quart d'heure pour réparer - suremint eune bricole d'après li - i me donnera un autre apparel. Ch'est corrèque énon?
Donc je vas chez l'marchind avec m'machine qui sèque à frod. Et effectivemint, le technicien i est là tout de suite, i écoute cha qu'i m'a arrivé et i part avec ch'bazar. I arvient d'abord avec un café, histoire de me faire patiinter. Chinq mineutes après i me deminte de l'suife dins l'atelier et i me montre que sins avoir rin fait eh ben min sèche linge i chufèle du caud.
Tous les deux in se dit que ch'est bizarre et qu'i dot y avoir un fil qui fait contact tchand qu'i i pinse. I décide donc d'ouvère pour accéder aux tripes et au final i me dit qu'i a bieau cachi tout partout, tout a l'air bon.
J'arviens à m'majon avec min sèche linche à mystère. Je l'installe à s'plache et tout de sute je le fais tourner - vide - pour vir quo qu'i in sort. Et, comme chez le marchind, i sort de l'air caud.
Bon que je me dis, incore un mystère de puq. J'ai passé pour un neuneu mais bon, à ch't'heure cha marche. J'arlinche eune buée, je mets cha dins min sèche linche pindint les réclames à la fin des infos et parel, roule ma poule.
Bin après le flim, je vas pour récupérer min linche propre et... rebelotte, ch'bazar i chuflot frod et min linche i étot aussi fraique que 2 heures avint.
Cha m'a perturbé min sommel ch't'affaire... Au matin je m'ai dit que je le chargeos peut-être de trop. Du coup je l'ai vudé, je l'ai mis in route à vide pour vérifier qu'à vide i cauffot toudis et... i cauffot frod!
I a de l'funquée qu'elle comminchot à sortir par mes orelles et min nez.... et pis je me chus dit que ch'est peut-être parce qu'i avot frod qu'i ne voulot nin cauffer ch't'annochint. Alors, avint de le ramener chez sin marchind, je l'ai deschindu dins m'salle à minger et j'ai attindu un tiot peu. Je l'ai mis in route et... i cauffot caud!
Quo qu'ch'est que ch'brun? que je m'ai dit dins m'tiête.
Du coup je chus artourné chez le marchind in expliquint qu'i m'avot vindu un sèche linge frileux, qui ne marchot qu'au caud et nin dins min guerni d'ùche qu'in cheule saison i fait frisquet. I m'a arwetchi tout drôle et i a dit qu'i fallot qu'i in parle à un technicien. Comme ch'ti de l'veille i n'étot nin là, ch'est un autre qui a venu, qui a arwetchi l'marque du bazar et qui a dit "i a là-dessur eune carte éleuctronique qui vérifie tout avint l'démarrache. Parmi les vérifications i a l'timpérature qu'i fait. Si qu'i fait trop caud ou trop frod à sin goût, cha ne marche nin comme i faut. J'ai eu le tour avec un frigo, parel que vousaute, installé dins eune pièce trop froide, i ne voulot nin démarrer". L'technicien i m'a alors gintimint dirigé vers un modèle d'intréé de gamme d'ùche que, comme i a dit, i a rin d'autre qu'un moteur, eune résistince et eune mineuterie mécanique. J'ai suivi sin consel et à ch't'heure j'ai un apparel qui fonctionne. Et in puq, facile à s'in servir.
Et j'ai aussi un bon d'achat!
Je me deminte si dins cheule course à des gadgets et sécurités dins tous les sins i a un jour un ingénieur qui va décider qu'i faudrot aussi eune carte éleuctronique chu les chauffaches, qui impêcherot de cauffer si qu'i fait frod...
In vit dins un drôle de monte énon?
Sujet: Commint que l'technique moderne elle peut rinte zinzin 
Mer 15 Fév 2017 - 19:03
