Je ne sais nin vousautes, mais mi j'ai mis eune mingeoire pour les mouchons, in puq des boules de tiotes graines incriquées dins du gras, que j'accroche aux arpes que je vos de m'cuisine. Comme cha j'ai du pestaque pindint que je fais l'vaisselle. Le premi ou ire qui dit que cha fait eune fos pas mos i ou elle a eune margnouffe!
Dins l'mingeoire, suspindue et que je vos aussi de m'cuisine in clénint un tiot peu m'tiête, je mets des graines de tournesol.
Au début cha se passot normalemint: ch'étot surtout des mésanges qui pluquottent à graines de tournesol. Des charbonnières, des bleues et quelques nonnettes. Ch'est rigolo de les vir in printe eune, l'coinchi intre lus pattes et buquer du bec dessur pour atteinte l'intérieur. Souvint elles font cha sins quitter l'mingeoire, surtout les bleues. Bante de goulaffes! Tchand qu'elles ont récupéré cha qu'elles veultent dins les graines, elles laissent tcherre l'reste, ch'est à dire l'coque avec, probablemint, des tiotes séquos à minger incore attachées dedins. In tous les cas, les monnieaux is joqtent par tierre in attindint que cha quette et is mingtent les restes.
Et j'ai eu confirmation que ch'est malin un monnieau....
I a nin longtimps, j'arwette m'mingeoire et je vos qu'elle est vide. Par contre i avot un tas de graines intières à tierre. Eh beh que je me dis, quo qu'ch'est qu'i s'a passé. Qui ch'est qui m'a mis ch'bouvaque? J'ai cru qu'i avot eu eune deschinte de gros mouchons.
Du coup j'ai armis des graines et j'ai surveillé.... Eh ben ch'est les monnieaux qui mont ch'bouvaque! I n'd'a un ou deux qui se dévoutent pour s'installer à l'mingeoire et tout foute à luche. Vinguette, i faut vir comme cha vole! Les copains is sont in dessous et is se régaltent avec tout cha qui tchet.
Et les mésanges ne vientent presque pus.... Ch'est dommache pour les couleurs. I a des chinces qu'i pousse des tournesols dins min gardin l'an prochain, parce qu'is gaspiltent et ne passtent nin le ramon pour laichi place nette!
Comme quo, même si que cha a eune tiote tiête, i a des monnieaux qui réfléchistent. Ch'est vraimint des malins ceux-là! Toudis in groupe. Cha m'émervelle.