J’viens d’faire eune découverte in ringeant des vieux disques ed mes parints.Y avot un disque d’Edmond Tanière que j’ai pas artrouvé dins ches discographies sur internet.
Dins l’pache du milieu y avot un texte d’José Ambre j’vous l’arcopie.
A min camarat’ Edmond Tanière
Ti qu’as connu ché fosses, du qu’la vie et la mort
Font souvint voisinache, du qu’tous ché cœurs y batt’nt
Tertous à l’même mesure, tertous su’l’même accord
Tant qu’ch’est vrai qu’ale existe, l’intente des camarat’s
Ti qui, toudis joyeux, as montré t’vraie nature
Tout au long d’ches bowettes et jusqu’à ches fronts d’tall’,
Quind y avot du danger, quand ch’l’ouvrache étot dur,
Té n’voudros surtout pas, pour tout cha eun’ médall’ Té m’as dit, je l’répète : « In n’est pos des héros,
Et s’il a fallu s’batt’ pour arracher ch’carbon,
Ch’est parc’qu’in est mineur …Dis-te ben que ch’mat’lot
N’la pas pus belle equ’nous pour pêquer sin pichon ! »
In attindant l’armonte té t’as quéq’fos langui,
Pressé qu’t’étos d’aller feumer eun’ cigarette,
Pressé qu’t’étos d’arvir l’solel, t’journée finie,
Pressé qu’t’étos d’rintrer à t’maison, à l’coyette.
Aujourd’hui l’mine al’meurt, mais ti et tes semblabl’s
Gardez au fond d’vous otes l’fierté d’y avoir œuvré !
Oh, r’grettez, cha ch’est sûr, l’amitié véritabl’
Qui vous a tous unis… et p’t’êt’ ben, asseuré
Qu’ch’est pour cha qu’in t’acout’ quind té cant’s les mineurs.
Continue, camarat’, ches gins y z’ont b’soin d’ti
Té rappelles leu jeunesse, té leu donn’s du bonheur,
Eun’bonn’ pinte ed bon sang, avant qu’tout seuche fini !
José AMBRE
Sujet: A min camarate Edmond Tanière 
Lun 30 Jan 2012 - 14:28
