D'une revue de travailleurs handicapés avec comme dossier "Le regard de l'autre" je vous livre ce qu'a écrit en patois un "travailleur" qui a signé d'un pseudo
Commint qu'te m'ravisse ?
Pourquo les gins qu'je croise i m'ravisse avec un air drôle ?
P'tet ben qu'j'ai mi min capiau à l'invers, ou qu'j'ai boutonné lundi à mardi,
mais si j' m'ravisse dins l'glace, ben non j'su bin fagotté.
Alors pourquo qui m'ravisse ainsi ? Ché nin facil d'comprint.
Quand j'étos incor qu'un tiot quinquin el première fo que quéqu'in m'ravisso ch'étot mes parints. Et mi j'voyos que des gins qui rigolent et qui sont fin bénache de m'vire.
Quand j'ai grindi j'voyos ben qu'des fo sur l'guiffe d'mes parints ch'étos nin facile d'avoir un tiot comme mi. Y z-étot parfois défoutus d'vire des gins m'zieuter.
Plus tard, j'ai comminché à comprind que ch'étot ben plus rute d'supporter l'regard des aut'es. Les gins qui t'ravisse soit is ont pitié, soit is ont peur et même des fos i'n'da qui font eun' graine. Mi cha m'rin triste d'vire cha, mi j'veux juste qu'in m'ravisse comme tout l'monte. Ch'est nin de m'faute si j'chus handicapé.
mais dins m'vie, j'ai aussi vu plein d'monte qui s'en fouto pas mal d'commint j'étos. Des gins qui m'dijot "bonjour" des gins qui m'écoutot même si j'ai nin un biau parlache, enfin des gins qui m'voyot comme j'étos. Et cha, j'ai compris qu'j'étos quequ'in de comme i faut.
Alors si ch'est dur pour ti quand les autes i t'ravisse,n vindious saque d'dins, ch'est nin ti qui est drôle, ch'est l'regard des autes qui est handicapé.
Tiot quinquin.
Extrait de Sillage revue trimestrielle
Les Papillons Blancs de Roubaix-Tourcoing
Avril 2011