Duch'mint, duch'mint, chés feulles all' caitent,
In crorot vir chés apes qui braitent
All'z'étottent cor si vertes hier !
Vraimint, un printemps cha passe vite !
Nou vingt ans n'ont fait qu'un éclair
Et nou z'espoirs sont in fuite.
Dù qu'is sont nou premiers duos
Dins chés tiots quémins à l'avinture ?
Qu'i est long l'temps des licocos*
Qu'i est long l'temps des talibures* !
Duch'mint, duch'mint, chés feulles all' caitent,
In crorot vir chés apes qui braitent.
Après passés chés mos d'caleur,
All' ont cangé leu rhabillure.
Y in a eu d'toutes les couleurs.
Je n'n'ai vu des gaunes* comme du burre.
Mais all' mourottent, cha ch'est certain !
Et dins l'fond d'min coeur, j'ai cru même,
Qu'in veyant arriver l'Toussaint,
All' s'habillottent in chrysantème.
Duch'mint, duch'mint, chés feulles all' caitent
In crorot vir chés apes qui braitent.
Pis, v'la l'hiver, et près d'sin fu,
In fête Noël au son des cloques,
Et ch'est à ch'ti qui fêt'ra l'miux !
Mais n'y a pus qu'eun' feulle qui berloque
Tout in haut de ch'l'ape, in péril,
Seule dins ch'vint qui souffe in furie,
Comme eun' larme qu'all pind à un cil
A l'dernière minute ed' la vie.
Dich'mint, duch'mint, chés feules all' caitent,
In crorot vir chés apes qui braitent
André Laflutte
(extrait de son recueil "Atrébathies")
*licocos : primevères sauvages
*talibures : des gâteaux aux pommes
*gaunes : jaunes