Bon, i faut bin déflorer le sujet des histoires d'adon, alors je me linche avec l'histoire véridique d'adon et ève...
Le paradis terresse, ne le cachis nin dins un pays exotique loin de tout, le paradis terresse, i étot à l'frontire franco belche.
I étot pile poil à Tourcoing. Dins le 59. Ch'est incore rudemint bieau aujord'hu, mais à l'époque ch'étot vraimint paradisiaque, ch'est le cas de le dire. Tout plein d'arpes, des à gauques, des à preunes, des à chériches, toutes sortes, même des à pommes. I n'd'a incore à ch't'heure, ch'est dire si que ch'étot de l'qualité.
A l'ombre de tout cha, i avot des moutons, avec de l'bonne laine qui a donné des idées à certains, longtimps après.
Et Adon et Eve i étottent là binheureux. Is parlottent patos intre eux, que ch'est l'lingue du pays, qu'elle est arrivée là in même timps que tout cha qui avot été créé pour faire le paradis. Véridique.
Comme is étottent tout seus chu tierre, et que les juets, les vélos, les bistrots et tout cha cha n'avot nin incore été invinté, is passottent lu timps à des jux simples. Bien qu'is n'étottent jomais malates - forchémint, ch'étot le paradis, et pis de toutes manières le climat de là-bas ch'est un des plus sains qui existe chu tierre - is juottent surtout au docteur. I faut dire que lus matériels is avottent été livrés sins mode d'impo...
Bref, ch'étot des jux qu'is aimottent bin. Foque pour juer, in faijint bin attintion de nin détraquer les bazars. Mais un jour i a le patron qui a deschindu du ciel et qui s'est posé au mont à leux, dins un grind nuache de funquée, un tiot peu comme tchand que l'navette espaciale elle décolle, mais li ch'étot dins l'autre sins. In tous les cas i étot sur qu'in le verrot et cha n'a nin loupé, les jones is sont allés à s'rincontre
Et i lu a dit:
- Eh là les jones, ch'est bin bieau de passer vous journées à essayer tous les boutons et tous les réglaches, mais vous veyez alintour de vousautes?
- Ben tins bin sur qu'in vot alintour de nousautes. Sauf tchand que t'éteinds le gros bazar djaune et caud qui brile dins le ciel - tiot rappel, cha se passot à Tourcoing...
- Ouais, ch'est exprès que j'éteinds pindint l'nut, pour que vous pinsiez à dormir. Autremint vous auriottes des cernes incore pires alintour de vous ys...
- Dormir? In est obligis? Parce que ch'est rigolo aussi dins le noir te sais...
- Bon, allez, j'ai été jone avint vousautes hein. Vous n'armarquez rin de spécial avec les biêtes alintour de vousautes?
- Ben, i n'd'a des qui sont rudemint bonnes à minger!
- Ouais, et alors, eune fos que vous n'd'avez mingé eune, quo qu'i se passe?
- Après qu'elle a mingé de l'viante, Eve elle fait des pets qui puttent. Cha la fait rire qu'i a dit Adon. Oh, elle peut faire des menoules, ch'est eune rute péteusse que vous m'avez arfilé là.
- Nin non, ch'est nin de cha que je cause. Mais vous ne pinsez qu'à vous amuser vousautes in dirot! Deux amusettes que j'ai fait...
- Ben ouais, in est au paradis énon?
- Si. Mais vous n'avez nin incore armarqué que tchand que vous avez mingé eune biête bonne à minger, i n'd'in reste tout plein des autres à minger après. Des mêmes?
- Ah ouais... ch'est vrai cha, à ch't'heure que te le dis...
- Ouais, eh ben ch'est parce que ces biêtes, i croistent et is se multiplitent. Et vousautes, vous devriez faire parel.
- I faut qu'in se croise? qu'elle a demindé Eve.
- Ben ouais, au moins vous guimpes. Ne va nin me faire croire que te ne sais nin quo que cha veut dire, je vous intinds de là-haut.
- Bon, qu'i a dit Adon, in va faire comme les lapins alors...
- Hein??? qu'elle a dit Eve. Mi je ne marche nin dins la combine. Déjà je ne chus nin surte que l'lapine elle in profite, et in puq, après, elle a tout plein de tiots lapins qui li font des misères. Nin non nin non, mi je préfère continuer comme in fait. Je me vos mal avec 8 ou 12 tiots dins nous guimpes!
- Qui qu'ch'est qui te parle de douzaines à l'fos? Pour vous, le manicraque i est réglé que ch'est un à l'fos.
- Bon, Eve, le chef i a dit qu'in devot faire un tiot. A m'mote qu'i ne va nin abindonner s'n'idée. I va donc falloir qu'in s'y mette et tint qu'à faire, in devrot s'y mette avint que nous matériels is sochtent usés, surtout les tiens. Quo que t'in pinses?
- Allez, je veux bin, mais nin ichi.
Et ch'est comme cha qu'is sont allés à Neuville in Ferrain.
Véridique!
Sujet: Adon et Eve 
Sam 26 Déc 2009 - 23:34
