Mindier, ch'est eune séquo que je ne sauros nin faire.
A m'mote que je préfèreros mourir dins min repaire.
Infin bon, i n'd'a des qui ont moins de fierté
Et qu'avec lu air triste comptent sur vou charité.

Mais vlà que cette semaine j'ai tché chu eune mindiinte
Vraimint nin comme les autres. Eune reine in quelque sorte.
Ch'étot nin eune mindiinte, mais plutôt eune âme forte.
Faijint mine d'arien malgré sa faim au vinte.

Cha se passot un soir, chu un parking camions.
Afin d'aller dormir je saquos les rideaux
Tchand que j'ai vu devint mi, un cat qui se pourmenot
Avec s'tiête bin haute, comme un cat de patron.

Mi les cats cha m'attire, du coup je l'ai appelé
Et à ma grinte surprisse i a duchemint marché
Vers mi qui l'attindos pour li faire eune caresse.
Mais i s'a arrêté de peur que je l'agresse.

Tchand qu'i marchot j'ai vu sin vinte qui berloquot
Ch'étot donc que ce cat ch'étot eune minette
Un tiot peu esquintée par eune portée de tiots
Qu'elle avot du choyer comme le font toutes les biêtes.

J'étos assis par tierre et duchemint li parlos.
Elle faijot des manières in se frottint chu les pierres.
Et petit à petit tous deux in s'approchot
Jusqu'au momint magique du contact qui libère.

Tchand que j'ai sinti ses oches j'ai vite réalisé
Que cette tiote biête si digne étot dins la misère.
J'ai été li choisir au resto d'à côté
Un bon sandwich pour cat, au jambon et gruyère.

Et tchand qu'elle a mingé, elle est restée très classe.
Elle attindot que cha vienche, sins se jeter chu l'paquet.
Elle a même mingé le pain, et l'salate toute mollasse
Toudis in m'arwettint d'un regard comme inquiet.

Tchand qu'elle a eu fini, elle arprit ses distinces
Elle a fait s'tiote toilette et pis elle est partie.
Comme si tout cha pour elle, ch'étot pour me faire plaiji.
In fait j'étos ravi qu'elle m'aiche laissé ma chince!

Comme dijot le grand Simons, ch'est bin à ch'ti qui donne
Bin puq qu'à ch'ti qui archot, que vient la plus bielle part.
I faudrot pour le bien ichi un vers in onne
Mais j'in ai nin trouvé et pis là i est tard!

Comme dijot le grand Simons, ch'est bin à ch'ti qui donne
Bin puq qu'à ch'ti qui archot, que vient la plus bielle part.
Et pour avoir dit tout cha y faut bien quin t'pardonne
Ed' dev'nir camionneu, au lieu d'rester motard!

Tcheu artisse André!

I s'appelle André
I est trop occupé
In devrot l'appeler
Mononque Désiré

Ch'étot nin pou m'moquer !
Et ch'est par là que je vos, qu'mes vers interminabes
Ne font que t'inciter
A ne me rétorquer qu'in vers pentasyllabes

Bin vlà core chi un biau poème que té nous as fait Batisse.
In peut nin dire que t'as nin querre chés cats...

T'as même dessaqué mononque d'ses occupations,pour li printe el temps de t'mette eun' flat'rie...