I m'in arrife incore eune bonne ichi...

Je fais des travaux d'électrique à l'majon. Intre autres je dos faire des trous dins des murs d'ùche que je sais qu'i passe du courint mais je ne connos nin l'indrot précis.

Alors j'ai acaté un détecteur de toutes sortes de séquos: fils électriques, tuyaux d'ieau, fiers à bétons. Ch'est sinsé détecter les fils électriques jusqu'à 75mm de profond.

Fier comme un bar tabac, je fais un essai dins l'zone qui m'a décidé à acater ch'bazar. Brun, cha ne marche nin! In fait cha marche trop bin: déjà à 40 cm du mur le bazar i comminche à faire bip bip. In puq i fait bip bip dins des indrots d'ùche qu'i a nin de raison de la faire (chu un mur trinsparint in briques de vierre, que si qu'i aurot des fils électriques là-dedins cha se verrot. Pis comme ch'est mi qui l'a monté ch'mur, je sais qu'i a nin d'électrique dedins).

Du coup je cache les morcieaux de l'imballache dins l'poubelle, je récupère min ticket de caisse et me vlà arparti chez le marchind... J'explique mes misères et i me dit que je chus le deuxième in deux jours. Du coup cha l'intrigue et in fait des essais poussés insonne. Chez li cha marche au poil.

Etonné mais contint de vir que cha marche, que j'avos peut-être loupé eune séquo au mode d'impo - pourtint simple - je m'excuse de l'avoir déringé pour rin et j'arviens à m'majon.

Eh ben à m'majon cha ne marche toudis nin! Ch'bazar i continue à détecter des conduites là d'ùche qu'i n'd'a nin.

Alors je me dis que ch'est peut-être mi qui suis magnétique. Vous croyez que ch'est possible? J'ai essayé in inlevint m'montre, ch'est toudis parel.

Tcheu brun! Z'avez déjà intindu causer de cas comme cha?

.Sans blaguer ! ! !
. Batisse, as-tu essayé aveu eune boussole ? ? ?
. D'vant l'indrot du qui i a des fils, l'aiguile alle devrot s'affoler ! ! !
. Achteur, si les fils is sont dins un tuyau métallique, cha fait cache ed Farardey, les rayons magnétiques is rayonnent pas hors du tupe ! ! !
.

Batisse, eune question qui peut paraîte tout con: Quand qu'té caches du qui sont les fils, i faut qu'el courant i circule dins les fils, qu'les lampes alles sont alleumées et d'sur eune prisse ed courant qui i a quet'cosse ed branché et...alleumé ! ! ! ! !

Et si que te mettos des bottes ed caoutchouc à te pids ou des gants à tes mains peut'ete que cha marcherait, in sait jamais......si ch'est ti qui est électrique !

Ch'est pas eune connerie l'histoire d'el boussole. Bin sur i faut pas coller l'cul d'el boussole conte el mur, il faut placher "normal'mint" à l'horizontal conte el mur, l'aiguile alle va s'affoler si qui i a du courant à proximité.
. Autour d'ins fil parcouru par un courant électrique i s'produit un champ magnétique comme quand qu'in jechte un caillot dins l'ieau.
( Vous pouvez printe des notes ! !)

pépéPéBé a écrit:

( Vous pouvez printe des notes ! !)

Ch'est ch'in qu'in fait te sais pépéPéBé.....j'aime beaucoup t'lire (désolée dins not' patos in implot pas "ker")

Tchand qu'in jette un caillou din l'ieau cha fait des champs magnifiques?

Mi je diros que cha fait des ronds, même tchand qu'in fait des ricochets!

Pour mes fils, j'ai trouvé eune astuce: je détecte l'gaine qui a alintour (ch'est eune visse majon, avec incore des gainaches in ferrale). I n'd'a d'ailleurs des qui vont rester in plache (ceux qui sont dins les plafonds). Pour cheux-là, je ne chingerai foque que les fils.

Là ch't'aprèm j'ai installé un tableau électrique. Cha fait moderne dins l'majon. Pour l'instint je chus in train de me battre contre des fils de 10mm², que ch'est sacrémint raide!

Citation :

Pour l'instint je chus in train de me battre contre des fils de 10mm²,
que ch'est sacrémint raide!

Ch'est un transformateur t'mason batisse?
té dos avoir des sacrés fusibles avec des cables comme cha!

Matante, j'ai pas bin compris tin messache ? ? ? J' ai imployé l'mot "ker "? ? ? . mal t'à propos ? ? ? J'ai pas du l' faire esprès, ou alors j' l' ai pas dit fort ! ! !
...
Aimer, avoir caire ? ? ? I a des cops jé n'sais pas commint écrire ches mots. ! ! !
...

Ben te sais, je suis les normes... Normalemint, vu l'puissince possipe du compteur (60A) edf i devrot aliminter in 16mm². Mais comme ch'est aliminté in 10, je ne vas nin faire eune installation pour des courints qui ne peuttent nin être alimintés, ou alors avec tellemint de marge que même edf i le fait nin... De toutes manières j'ai un contrat pour du 30A.

I a des normes un tiot peu maboules aussi... à ch't'heure toute installation elle dot être protégée par des interrupteurs ou des disjoncteurs "différintiels". Si qu'i a eune fuite de courint de 30mA, cha coupe. Ch'est bin, j'applaudis à deux mains - à eune seule ch'est plus dur, je sais... - mais pour amener 30mA à la tierre, i ne faut nin un fil de tierre de 10 ou 16 mm²... eh ben si, ch'est la norme.

J'ai aussi fait des découvertes au sujet des prix de tout ch'matériel... Un interrupteur différintiel, cha coûte dins les 60 roros et un disjoncteur différintiel cha coûte dins les 15 roros.

Mais cha ne vaut nin le cop de les acater. Mieux vaut acater un tableau complet: t'as ainsi 2 interrupteurs différintiels et eune dizaine de disjoncteurs différintiels pour eune bonne chintaine de roros... plus un coffret, des étiquettes et tout cha!

Ch'est nin rare cha comme situation. Pour acater du fil électrique, ch'est souvint plus intéressint d'acater des rallonges toutes faites et de coper les prises que de printe du fil au mètre. Si qu'un transfo d'installation de spots 12V i lache, ch'est moins cher de racater un kit avec le transfo et les spots...

Ch'est les timps modernes! Bétôt cha sera plus intéressint d'acater eune auto neuve que de réparer le moteur.

pépéPéBé a écrit:

...
Aimer, avoir caire ? ? ? I a des cops jé n'sais pas commint écrire ches mots. ! ! !
...

Mi non pu je n'sais commint les écrire car ch'est un terme "boyaurouche" et min patos ch'est c'ti des fabriques ed fils, j'chus Tourco ! et chez nous in dit "aimer" mais t'as fait aucune faute et t'as nin imployé el mot maltapropos !

Bon mi j'ai bien voulu essayer avec em boussole là dû qui a des fils et el lumière al est alleumée, bin j'vos pas m'boussole s'affoler, al continue d'indiquer ch'nord sans broncher.

A m'mote qu'elle a peur de ti. T'as déjà buqué dessur tchand qu'elle t'a perdu?

qu'est-que vous avez tous et toutes contre ché boyaux rouches? i s'ont pas pus pire que les autes.et peut ete meme miux.

j'ai rin contre les boyaux rouches, j'dis que "caire" est un mot qu'in implot pas par chez nous !

Batisse j'm'a jamais perdu, j'sors raremint l'boussole, 2 ou 3 fos d'pis que j'randonne, aujourd'hui ch'étot pas pou m'arpérrer mais pou vérifier s'que disot Pébé, bin j'sus pas pus avinché qu'avant.

Eh, Marcel, ch'étot pour de rire hein... Je sais bin que te connos tin coin par tchoeur et que te pourros faire les cartes de l'IGN de mémoire, les ys feurmés, avec eune guimpe in l'air.

Pour te perte dins tes montagnes, i faudrot que t'aiches eune sacrée pronne.

2 ou 3 coups quind même que te dis? Cha reste raisonape. Ch'étot à quo?

Sacré Marcel.

Je l'sais bien qu'té rigoles. Mais té sais je n'sus pas toudis à randonner dins min coin, in mai in (in bus complet in principe) s'in va tros jours in Ardèche et j'sus in train d'préparer des randos.
J'fais tout à partir d'eun' carte IGN et ch'te fos chi j'cros qu'in va aller ar'pérer pou vire si cha passe, passe que souvint mi j'vais dû qu'chest pas balisé.
L'sortie de l'boussole cjh'étot à causse du brouillard et un aut' fos ch'étot pou marcher à tant ed degré à partir d'un point pou in ar'trouver un aut', sans quoi j'suis ches quemints ou ches pistes sus l'carte IGN au 25000ème.
Ichi d'sous ch'est du côté d'Anduze

[img][/img]

Ouais chelle là je l'connos par coeur, mais si i in a qui connottent des randos in Ardèche in d'sous d'Aubenas j'sus preneur, ch'est première fos qu'in va aller rindonner dins ch'coin là.
Mi j'ai prévu du côté de ch'bos d'Paiolives, les gorches du Chassezac, mais ch'dossier i est pas bouclé.

Ch'est vous qui avez raison les gars, l'cop d'el boussole cha peut pas marcher, l'courant qui deschind dins un fil, i armonte dins l'aute in sens inverse créant un champ magnétique du sins contraire du premier et...cha s'annule ! ! ! I n'a qu'à côté l'interrupteur qu'cha dot s'affoler mais cha nous dit pas du qu'is passent ches fils dins l'mur....
. In principe, si l'installation primitive alle est bien faite, les fils is doivtent passer à l' verticale au dessus des prisses et des interrupteurs ! !....si matante à n'd'avot......

Rin à vire aveu nous matante à nous zautes bin sur ! ! !

Batisse t'maizon ché inne vrai centrale?????

Te veux dire eune prison, comme à Fleury Mérogis?

Ben i n'a nin grammint de prisonniers alors!

Si te parles de cintrale éleuctrique, te dos confonte avec t'bielle soeur l'presseuse d'olifes. Elle ouais, elle produit du courint à s'majon. T'es au courint?

ouais Batisse tiote bellotte elle produit du courint in l'appèlle la fée electrique.

Ah bon? Même les fées cha marche à l'éleuctrique à ch't'heure? Comme les tiots lapins duracell? J'espère que dins sin cas elle n'a nin perdu le couverque de l'trappe.

Pour s'babelle elle doit avoir eune pile à part. Ch'est nin possipe autremint.

Pauvre tiote, in la fait toudis marcher. A m'mote qu'elle serot inquiète si qu'in ne le ferot nin hein?

Bon, ne vous inquiétez nin pour min silinche des prochains jours: ch'est eune semaine de route! A pluche.