L'courti au printemps
Tche plaiji pou ch'ti la qui comprind la nature
D'wetti sin p'tit courti qui s'revel au printemps !
D'vir el'z'arpes tout morts s'covrir edl'fraîch'verdure
D'vir el tierr' toudis jeun' comme s'il avot 20 ans !
Tchan qu'in vot chés p'tits pouss' vudi duchmint de l'tierre
In s'dit qu'leu vertes tiches port'ront betot des fleurs...
Et in vodrot savoir si ch'est par l'même mystère
Que l'printemps, chaque année, y rajonnit nou t'choeur ?
Chti qui sait busier y est heureux dins l' vie
Y vot grammint d'affaires que l'z'autes y n'vottent pos
Et ch'ti la qui s'continte, sans orgueul, sans invie,
D'vir pousser sin courti, y est pu bénèche qu'un ro !
Du matin in s'élevant y arwette les nuaches :
Y s'dit "y va pluvoir" ou bin "y va faire beau"
Si l' tierre i est trop sèque y souhaite d'l'orache
Et y appellle el' solé si y a tché assez d'eau.
Du soir, après s'jornée, t'chan tout y dvint trint'chille
Y r'wette sin p'tit courti, y r'fait acor el'tour
Y acoute vin l'lointain l'mauviard qui babille
Et y busi tout bas :"ch'est bieau la fin du jour !"
In vot là tout au fond l'solé qui dvint tout rouche
Y dvint mate li aussi : d'pus l'matin y a lommint!
Cha veut dire pour tertous qu'y est betot timps qu'in s'couche
Et in laiche sin courti....qu'in artrouff'ra l'lindemain !
Et l'printemps, pindant l'nut, fait s'n'ouvrache su les plantes,
Su les graines, su les arpes, su les t'champs, su les bos...
Y ardonne de l'jeunesse et des fos in s'demante
Pourquo qu'nou'z'autes aussi in n'arquemincherot pos ?
Pourvu qu'à chaque année l'même miraque y r'queminche
Que d'pus que l'monte est monte, cha n'a jamais mant'chi
Qu'avril t boute sin nez et l'bouenne nature s'arrinche
Pour faire bousser les feulles pour'l'z'ojeux faire leurs nids.
In est bin forchi d'croire qu'ch'est essin qu'cha dot être
In est bénèche quand même d'vir...malgré les ch'veux blancs
Qu'tous les ans, au printemps, t'chan que l'courti y est in fête
Si nou corps s'invilit...nou t'cheur a toudis 20 ans !