Ches gosses d'asteur i n'ont pont el chance qu'in a eu.
Pace que nous, ed nou temps, in savot s'amuser.
Tous ches jux qu'in faijot chétot toudis dins l'rue.
Pont com me eusse qui sont pindus d'vant leu télé.
Com me amusemints ch'étot pont compliqué,
Ches juets, si in veux bien les appeler comme cha,
Ch'est tous des trucks qu'in avot nous-mêmes bricolés,
Des trucks qui nous arvenottent pont quer de ch'fait là.
In juot à : « Marie Coco combien j'ai d'dogts ? »,
Aux mappes (1) et pi in fesot des courses ed cerceaux,
A l'pèque, ein' casserole troée servot d'puisette
Pour attraper épinoques et Marie grosses têtes. (2)
In juot à l'guisse, à l'torcaine (3), aux biscaiens(4),
In allot à ch'bos faire des arcs et des épées
Pour pouvoir, in arvenant, juer aux indiens,
Quand ej raconte cha, y-in a qu'cha fait rigoler.
Et quand in avot soif in cueillot des gavrons (5),
Ch'étot amer mais surtout cha désalterot,
In mingeot des poiriettes (6) même si chétot pont bon,
Et pi, bien souvint, à I'marotte (7) cha s'terminot.
Pi, el jour qui pleuvot, in juot aux batiaux,
Pour cha in utilisot ches batons d'Gelco
Sur qui in marquot des noms ed coureux à vélo
Qu'in mettot à l'l'iau pour faire des courses dins ches gulots .
L'hiver, pace que dins I'temps in avot des hivers,
In fesot ess que tout l'monde, dins l'neiche, fait:
Des bonhommes bien sur, qui s'dréchottent dins l'rue tout fiers.
Des batalles à coups d'boules qu'in fésot bien serrées.
Et pi, quand in veillot qu'à nuit i allot géler,
In jetot des seaux d'iau dins ch'gulot.
Comme cha, el lendemin, notte glichate étot trouvée,
Et là, à joujouque, même sur ein pied cha y allot.
Ouais tchiot, nous in n'avot pont d'ordinateur ;
Pont d'Game boy, ed plaisse Techune ou d'machin chouette,
In avot des jux qu'el souvenir nous donne gros coeur
Pace que ch'est notte jeunesse qui arpasse dins nou tête.
Richard KLIMCZAK
I - billes
2 - tétards
3 - toupie
4 - billes
5 - prunelles
6 - fruit de !'aubepine
7 - maraude
8 - ruisseaux