J'pinse qui n'a pont des masses
Qu'i-ont écrit quiq'cosse su l'esport ...
Conme qu'i faut bin q'quiqu'un qui l'fasse,
J'vas assayer d'faire ein effort.
Faut dire eq du temps q'j'étos jon-ne,
In n'avot pont b'zon de s'muscler ;
Cha s'faisot tout seu pou tout l'mon-ne
Si abile qu'in savot marcher:
Mette el tape et l'débarasser,
Porter l'z épluchures aux lapins,
Vidier l'bac à chèmes, balayer,
Aller ramasser du crottin,
Intre écosser les n'tits pos,
Ramaser les feules n'dins l'gardin,
Apprinte à casser du n'tit bos,
Cacher l'affourée aux lapins.
Al fos dev'nu ein peu pu grand,
Tot temps d'apprinte à gardiner
Et d'aller ouvrer n'dins les camps
Sans minme printe el temps d's'écauffer.
Quiq'z'ans d'puss ... cha n's'arringeot pas
Soit n'dins les camps au su l'chantier,
I fallot seurtout des gros bras,
(Les fins d'jornees, dures à saquer)
Cha n'étot pont sept heures tros quart,
L'semain-ne Inglaisse n'éxistot point,
Tout cha faijot rintrer bin tard
Bin q'parti timpe au matin,
Pasqu'j faut parler du trajet
Q'pou les tros quarts des overriers,
S'faijot à velo ou à pied ...
Fallot la eun' sacrée santé!
Aussi, i n'a pont b'zon d'vous dire
Q'tout cha, pi l'ouvrache au gardin ...
In n'avot pont besoin d'courir,
Cha suffisot conme intrain'mint :
In n'conichot pont l'mot "foutinge",
Ni "VTT" ni "mobylette",
In n'avot mie b'zon d'ein "joguinge"
Pou fouir ou pousser l'brouette,
In fait d"'baskets", des bons brosquins,
Eun' veste, ein patalon "lafont",
Ein viux velo (quiq'fos sans freins),
In fsot d'assez, ch'étot bin bon!
Achteur, in arrife in auto
Pou faire ein parcours VTT,
L'diminche, faut eun' tenue fluo
(N'serot-ti q'pou s'faire armarquer)
I faut pouvoir dire el lundi :
"Hier, j'a fait soixante kilomètes" ...
Et l'lind'main, t'artreufe ech ti chi
Qui n'minque pont d'sortir es carette
Pour aller jusqu'au bout de l'rue,
Acater sin paquet d'gitanes"
Et qui serot vraimint pardu
L'fos que s'n auto querot in panne ...
Mais i faut vife aveuc sin temps
Et ch'est pitête miux ajord'hui :
Faijez du sport, O'z avez l'temps,
Profitez.in, pou vous plaisi ...
Mais, parlant sport, j'aros voulu
Qu'in installe eun' dynamo
D'su chés apparels ed museu:
Cha frot du courant: frais zéro!
Raymond COUDERT